Proverbios 10 - Old Testament Quechua Wanca（QVW）

Salomonpa yaćhachicuynincuna

1Salomonpa limaśhan yaćhachicuynincuna caycunamá:

Yaćhayniyu chulicá taytanta cushichinmi;

luclu wawicá mamanta llaquichinmi.

2Mana allin lulaycunawan rïcuyayca yanꞌal-yanꞌalpämi;

tincüllanman allin cawsaycücämi ichá wañuycäpi libracun.

3Allin nunaca micuypi wañunanta manamá Tayta Dios munanchu;

juyu mana allin nunacunätañatacmi ichá munapayäta caćhaycun.

4Illacunacá wacchallam cayan;

lulacücäñatacmi ichá cäniyu cayan.

5Tantiayniyu nunacá cusicha timpullaćhümá pilwacuycun;

cusicha timpućhu jitalaylla-jitaläcunäñatacmi ichá pinꞌaypä cayan.

6Allin nunaca allincunactamá ćhasquiycun;

juyu nunacunäñatacmi ichá mana allincällacta pacalayächin.

7Allin nunaca lluy lulaśhanpi yalpaśhamá canꞌa;

juyu mana allin nunacunäñatacmi ichá mana yalpaśha ismunꞌa.

8Allin śhunꞌuyücunaca yaćhachicuyta cäsucunmá;

luclunu yanꞌal limäcá mana allinninćhümá camacanꞌa.

9Allincällaćhu cawsaycüca jawcamá puliycun;

mana allinćhu pulïcäñatacmi ichá talichicüśha canꞌa.

10Mana allinta lulananpä ñawinta imchipaycücá ñacaynintamá ashicuyan;

luclunu limäcá mana allinćhümá camacan.

11Allin nunap limaynincuna cawsachicü chuya yacunümá;

mana allin nunacunäpa limaynincunaćhüñatacmi ichá juyucunalla pacalayan.

12Ćhïninacuyca pilyullactam śhalcachimun;

cuyacuycäñatacmi ichá ima mana allincunactapis pampachaycun.

13Allin tantiayniyücäpa shiminćhuꞌa yaćhaycällamá cayan;

mana fisyuyücäpa waśhanpäñatacmi ichá asutica cayan.

14Yaćhayniyüca yaćhaytam uywayan;

luclüpa limayninñatacmi ichá ñacayta apamun.

15Alli cäniyüca cäninman atinïdum;

wacchäñatacmi ichá imaman chalapacunanpis nï canchu.

16Allin nunäpa lulaynincuna cawsaypämi cayan;

juyu nunäpa lulaynincunañatacmi ichá juchapa cayan.

17Limapäcuycäta ćhasquïcá allin cawsaymanmi liyan;

limapäcuycäta jitapäcäñatacmi ichá chincayman liyan.

18Casquicta limäcämi ćhïnicuyninta mana tantiachicunchu;

luclümi tumpayllacta ashiyan.

19Anchap limäcá anchap mana allintam liman;

shiminta sujitacücäñatacmi ichá yaćhayniyu.

20Allin nunap shiminꞌa sumä ćhaniyu illaynümi;

juyu mana allin nunap śhunꞌunñatacmi ichá imapäpis mana ćhaniyu.

21Allin nunap shiminꞌa allin cawsaytam achca nunacta talichin;

mana tantiayniyücunäñatacmi ichá luclu cayninwan wañuyta talin.

22 Tayta Diospa allinpä licaycuyninꞌa allin cäniyu caytam apamun;

manamá llaquicuyta apamunchu.

23Luclucunacá mana allin lulaynincunapïmi cushicun;

yaćhayniyücäñatacmi ichá allin yaćhayninpi cushicun.

24Juyu mana allin nunäta imapis manchacuśhancälämi ćhälun;

allin nunäñatacmi ichá imapis munaśhantalä ćhasquiycun.

25Sumä waywa pasacuśhannümi juyu mana allin nunaca chincacun;

allin nunäñatacmi ichá wiña-wiñaypä tacyaycun.

26Caćhäninpä illa nunaca quilucta nanachï binagrinümi;

ñawi waꞌachï untaynümi.

27 Tayta Diosta manchacuywan cäsucücunaca mas watacunam cawsapäcunꞌa;

juyu mana allin nunacunäñatacmi ichá ashchay watalla cawsapäcunꞌa.

28Allin nunacunätá cushicuymi alcayan;

juyu mana allin nunacunäpa alcayninñatacmi ichá yanꞌal-yanꞌalpä.

29Allin nunäcunäpá Tayta Diosmi pacaycünin;

mana allinta luläcunätañatacmi ichá pampaman muyuchin.

30Allin nunaca manamá cuyuchishachu canꞌa;

juyu mana allin nunacunäñatacmi ichá cay allpäćhu mana caycälinꞌachu.

31Allin nunap shiminpïtá yaćhaycällam yalamun;

mana allin limäcäpa allunñatacmi ichá cuchüśha canꞌa.

32Allin nunap shiminpïtá tuqui limaycunallamá yalamun;

juyu nunacunäpa shiminpïtañatacmi ichá mana allincunalla yalamun.