1 Samuel 24 - Old Testament Quechua Wanca（QVW）

Davidpa maquinćhu Saul cayaptinpis manam wañuchinchu

1Chaynu Filisteo läducunäta Saul aticaćhaśhanpi cutïluptinmi willaycälälin En-gadi chunyäcäćhu David caśhanta.

2Chaymi Saul jinantin israelpïta quimsa walanga (3,000) nunancunacta aclala. Paycunawanmi Davidta lluy nunancunactawan ashimü liculcan Munti Capish nishan aꞌacunäman.

3Chay lishanćhümi uwishcunap canćhanman ćhälälin. Chayćhu juc maćhay caśhanmanmi Saul ishpacü yaycülun. Davidñatacmi lluy nunancunawan maćhaypa tunäninćhu pacalayalcäla.

4Chayćhümi Davidta nunancuna nin: “Cayꞌari ćhämun Tayta Dios limalicuśhuśhayquica: ‘Ćhïnicüniquicunacta yaꞌami maquiquiman ćhulaycamuśhä’ nishanca. Chayurá paywan munaśhayquitari lulay” nil.

Davidñatacmi śhalcuculcul mana musyachillal Saulpa müdananpa manyanta cuchülun.

5Ñatac chay cuchuśhanpïtam śhunꞌun mana jawcachu cacuyan.

6Chaymi nunancunacta nin: “Tayta Diospa aclacuśhan mandacücäta caynu lulaśhäpïta Tayta Dios libraycamächun. Paypa aclacuśhan captinmi maquïta mana pallalcümanchu” nil.

7Chaynüpam David lluy nunancunacta manalcächila Saulta supayapachipäcunanpïta. Saulñatacmi maćhaycäpi yalulcul licun.

8Chaypïtam David maćhaycäpi yalalcamul ayaycaćhacuyan: “Mandacüní taytallay, mandacüní taytallay” nil.

Chayćhu Saul muyulcämuptinmi David unꞌulacuycul pampäcama uyshucuycul nin:

9“Mandacü taytallay, ¿imapïtam chay ‘Davidmi mana allinniquita ashiyan’ nil nïcunäta ćhasquiyanqui?

10Canan quiquiquim licaycunqui maćhaycäćhu maquïman Tayta Dios ćhulaycamuśhuśhayquita. Nunäcuna wañuchinacpä jicutapämaptinpis manam wañuchiyta munalacchu. Aśhwanpam nilá: ‘Tayta Diospa aclacuśhan captinmi mandacünïman maquïta mana ćhulaycümanchu’ nil.

11“Taytallay, licayꞌari maquïćhu aptiläśhäcäta. Müdanayquip manyanta cuchuyalpis manamá wañuchilacchu. Chayurá manamá ima mana allinniquitapis nï ipanchaytapis ashiyächu. Amñatacmi ichá wañuchimänayquipä ashiyämanqui.

12Tayta Diosninchicꞌari ishcayninchicta cäraycamäśhun. Pay quiquinmá tincüniquiman uycuśhunqui. Ñatac yaꞌa manam anman maquïta pallalcuśhächu.

13Punta limaypis niyanmi: ‘Juyu nunacunämi mana allinta lulan’ nil. Chaymari yaꞌa mana imaypis maquïta pallalcuśhayquichu.

14¿Israel caśhtacunap mandacünin mayanpa cuntranmá yalämunqui? ¿Mayantamá aticaćhayanqui? ¿¡Yaꞌa allꞌu wañüśhanu cäcätachun icha usanu cäcätachun imatá!?

15Quiquin Tayta Diosꞌari pulanchicta cäraycamäśhun. Paytacꞌari śhunꞌüćhu cäcäta licaycul maquiquipïta libraycamächun” nil.

16Chaynu David limayta camacäluptinmi Saul nin: “¿Cay limamüca manachun chulillá David?” nil. Nilculmi apalcaćhaypa Saul waꞌayta allacuycun:

17“Yaꞌapïtá anmi mas allinta lulaycunqui. Mana allinniquita ashiyaptïpis allincäwanmi cutiycächimanqui.

18Cananmari llaquipayniquita licaycachimanqui. Maquiquiman Tayta Dios yaꞌacta ćhulaycayämaptinpis manamá wañuchimälanquichu.

19¿Mayanmá ćhïnicüninta talïlul mana imananmanpischu? Canan muyun yaꞌawan lulaycuśhayquipïta Tayta Diosꞌari allinpä licaycuśhunqui.

20Cananmi ichá tantiaycú mandacüca canayquita. Amwanꞌa Israel caśhtacunaca sumämi tacyaycälinꞌa.

21Cananꞌa Tayta Diospa ñawpäninćhu limalicamayꞌari ayllücunacta, milaynïcunacta mana chincachinayquipä” nil.

22Niptinmi chayćhu David limalicula. Chaypïtam Saul wasinta cuticula; Davidñatacmi lluy nunancunawan pacacunancäman liculcäla.