1 Cronicas 11 - Old Testament Quechua Wanca（QVW）

Israelćhu Davidmi mandacuyta allaycun 2Sam 5.1-5

1Chaypïta jinantin Israel lädu Hebron malcaman lipäculmi Davidta nipäcun: “Taytallay, juc taytallap yawarllanmi, aychallanmi canchic.

2Saul unay mandacü caśhanpïñamari jinantin Israel pilyäcunäta am mandalanqui. Jinaman Tayta Diosniquipis amtamá limalicuśhulanqui: ‘Anmi Israel malcäta caminaycüca, puydïnu mandaycüca canqui’ ” nil.

3Chaynümi Israelpa lluy yaśhancuna Hebronman lipäcul mandacü Davidwan limapäcula. Chayćhümi mandacü David Tayta Diospa ñawquin limalicula. Chaypïtam Samuelwan Tayta Dios nichishanmannu Israelpa mandacünin cananpä Davidta japächaycapäcula.

Sion malcactam David llallin 2Sam 5.6-10

4Mandacü Davidmi Israel nunancunawan lipäcula Jebus läducunäwan pilyamü. Chay timpu Jerusalenta Jebus nipäcula, chayćhu Jebus caśhtacunaca yaćhapäcuptinmari.

5Paycunam Davidta nipäcula: “Cayman manam yaycamunquimanchu” nil. Niyaptinpis sumänin cä Sion malcactam David duyñuchacuycula. Chaytam Davidpa Malcan nipäcun.

6Davidmari limalicula: “Mayanpis Jebus läducunäwan pilyä puntacta yaycücätam, pilyäcunäpa puydïninpä ćhulaśhä” nil.

Chaymi Sarviap chulin Joab puntacta yaycüluptin pilyäcunäpa puydïninpä ćhulaśha cala.

7Chay sumänin cä malcaćhu David yaćhaptinmi Davidpa Malcan nipäcula.

8Davidmari chay malcap muyülïninta śhalcachila, Milopïta aśhta murälläśha caśhancama. Camacalpuypa cäcunätañatacmi Joab allichalpachila.

9Sumä munayniyu Tayta Dios yanapaptinmi Davidpa munaynin masta-masta tacyalpula.

Davidpa allinnin pilyänincuna 2Sam 23.8-39

10David mandacü cayaptinmi allinnin pilyänincuna, yanapänincuna cala. Paycunam Tayta Dios willacachishannülla mandacü cananpä jinantin israelcunäwan ćhulapäcula.

11Má, Davidpa quimsa sumä-cama allinnin pilyänincunap śhutincunam caycuna: Hacmonipa chulin Jasobeam. Paymi quimsa ćhunca (30) allinnin pilyäcunap puydïnin cala. Paymari juc pilyućhu quimsa paćhac (300) nunacunacta lansawan wañüchila.

12Jucnin allincäñatacmi Ahoh lädu Dodop chulin Eleazar cala. Paypis quimsanpïta jucnin allinninmari cala.

13Paymi Davidwan Pasdamimćhu juntunacüśha cayalcäla Filisteo läducunaca israelcunäwan pilyapäcunanpä. Chayćhümi juc ćhaclaćhu siwä wiñayäla. Chaymi Filisteo läducunäpïta Israel pilyäcunaca ayiyalcämuptin,

14paycunañatac siwä ćhawpićhu śhaycucuycul llallïlälila. Chaynüpa Tayta Dios salbayculmari Filisteo läducunäta camacaycüla.

15Juc cutićhümi quimsa ćhunca (30) alli-cama pilyäcunäpïta quimsa lipäcula Adulam maćhayćhu David caśhancäman. Filisteo pilyäcunäñatacmi Refaim pampaćhu cayalcäla.

16Chay sumänin cäcäćhu David cayaptinmi parti Filisteo pilyäcunäñatac Belenćhüña cacuyalcäla.

17Ñatac alli-allicta yacunäcuyaptinmi David nin: “¡Belen yaycunaćhu cä püsupïta mayanllalä yacucta uycallämanman!” nil.

18Niptinmi quimsan alli-cama pilyänincuna Filisteo capäcuśhancäman yaycuycul Belen püsupïta jululcul Davidman apapäcula. Ñatac David upyayta mana munalmi Tayta Diosta alawaycuyninwan jićhaycula:

19“¡Cay yacucta upyanäpi Tayta Diosꞌari libraycallämächun! Cay nunacunaca yacucta apamuyninwan cawsayninta wañuypa patanman ćhulaycuśhancäpïchun upyayämanlä canpis” nil. Chaynu nilculmi upyayta nï munalachu.

Caynümari quimsan allin pilyäcunäpa sumä lulaśhancuna.

20Chay quimsa ćhunca (30) alli-cama pilyäcunäpa puydïninmari Joabpa wawꞌi-caśhan Abisai cala. Paymi juc cutićhu quimsa paćhac (300) nunacunacta lansanwan wañüchila. Chaynüpam quimsa ćhunca (30) allinnin pilyänincunapïta mas lisisha cacula.

21Quimsa ćhuncacunäpi mas allinnin calmari paycunap puydïnin Abisai cala. Ñatac chay quimsa sumä allinnin pilyäcunämanꞌa manam iwalalachu.

22Cabseel lädu Joiadap chulin Benaiaspis sumä allin pilyänin calmi sumäcunacta lulaycula. Paymari Moab lädu Arielpa ishcay alli-cama pilyä chulincunacta llallïla. Paytacmi juc muyun laśhtayämuptinpis ućhcuman yaycuycul liyunta wañüchila.

23Paytacmi ishcay mitru ćhawpin callwan Egipto nunactapis wañüchila. Pay jatu-jatun lansanwan cayaptinpis Benaiasꞌa caśhpillanwanmari cayäla. Ñatac chay caśhpillanwanmari lansanta quitalcul wañüchila.

24Chaycunacta Joiadap chulin Benaias lulaycuśhanpam quimsa ćhunca (30) allinnin pilyäcunäpa puydïnin cayman ćhaycula.

25Chaynu allin cayalpis manatacmi quimsa sumä allinnin cäcunänüchu cala. Paytamari David ćhulala tapänincunap puydïninpä.

26Chay alli-cama pilyanincunam:

Joabpa wawꞌi-caśhan Asael,

Belen lädu Dodop chulin Elhanan,

27Harod lädu Samot, Pelon lädu Heles,

28Tecoa lädu Iquespa chulin Ira,

Anat lädu Abiezer,

29Husha lädu Sibecai,

Ahoh lädu Ilai,

30Netofa lädu Maharai,

Netofa lädu Baanap chulin Heled,

31Benjamin ayllu Gabaa lädu Ribaipa chulin Itai,

Piraton lädu Benaia,

32Gaas mayu lädućhu yaćhä Hurai,

Arbat lädu Abiel,

33Bahur lädu Azmavet

Saalbon lädu Eliaba,

34Gizon malcayu Hasempa chulincuna,

Arar lädu Sagep chulin Jonatan,

35Arar lädu Sacarpa chulin Ahiam,

Urpa chulin Elifal,

36Mequer lädu Hefer, Pelon lädu Ahias,

37Carmel lädu Hezro,

Ezbaipa chulin Naarai,

38Natanpa wawꞌi-caśhan Joel,

Hagraipa chulin Mibhar,

39Amon lädu Selec,

Beerot lädu Naharai. (Paymi Sarviap chulin Joabpa atajachicuncunacta apawshïnin cala.)

40Jinamanmi Itri lädu Irawan Gareb,

41Het lädu Urias,

Ahlaipa chulin Zabad,

42Ruben ayllućhu cä Sizap chulin Adina. (Paymari Ruben ayllucunäpa puydïnin cala. Paypam quimsa ćhunca nunancuna capäcula.)

43Jinamanmi Maacap chulin Hanan,

Mitna malcayu Josafat,

44Astarot malcayu Uzias,

Aroer malcayu Hotampa chulin Samawan Jehiel,

45Simrip chulin Jediael,

Tizi malcayu wawꞌi-caśhan Joha,

46Mahav malcayu Eliel,

Elnaampa chulin Jerebaiwan Josavia,

Moab lädu Itma,

47Eliel, Obed, jinaman Mesob malcayu Jaasielpis.