1Canan má, ishcay ćhunca picha (25) watayümi mandacuyta Amasias allaycula. Ishcay ćhunca isun (29) watam Jerusalenpïta mandacula. Mamanñatacmi Jerusalen malcayu Joadan śhutiyu cala.
2Amasiasꞌa Tayta Diospa ñawquin allintam lulaytá lulaycula, masqui mana allin śhunꞌunwan lulayalpis.
3Amasias mandacuyninćhu tacyälul, mandacü papäninta wañuchï puydïcunätam lluy wañüchila.
4Ñatac Moisespa camachicuyninćhu isquirbïsha caśhanmannümi, wañuchïcunäpa chulintá nï wañuchilachu. Tayta Diosmari camachicuyćhu nin: “Chulicunäpa juchanpïta taytacunaca manam wañupäcunmanchu, nïtac taytacunäpa juchanpïtapis chulicunaca wañupäcunmanchu. Juchanpïta-camam quiquincuna wañupäcunan” nil.
5Chaypïta Amasiasꞌa, Juda aylluctawan Benjamin ayllucta juntuycachilmi, paćhac (100) pilyäpä, walangap (1,000) pilyäpä puydïnincuna capäcunanpä ćhulaycula. Jinalcul ishcay ćhunca (20) watayüpi janaman sinsachiptinmi, quimsa paćhac walanga (300,000) pilyapäcunanpä cacula. Paycunamari lansayü-cama atajachicuyü-cama pilyananpä listu cayalcäla.
6Jinaman quimsa walanga quimsa paćhac (3,300) quïlu illaywanmari alli-cama paćhac walanga (100,000) pilyäta Israelpi mincämula.
7Ñatac Amasiastam Tayta Diospa nunan ćhaycul nin: “Tayta Amasias, Israel pilyäcunaca amcunawan ama lipäcuchunchu. Tayta Dios manamari israelcunätapis, Efrain ayllucunätapis yanapanchu.
8Sïchuśh paycunawan yanapächicuptiquiꞌa, ćhïnicüniquicunap maquinmanmi ćhulaycüśhunqui. Tayta Diospa maquillanćhümari yanapäśhunayquipäpis, pampaman muyuchishunayquipäpis cayan” nil.
9Niptinmi Amasias: “Chayurá, ¿imanaśhätan israelcunäman quimsa walanga quimsa paćhac (3,300) quïlu illay uśhäcäwanꞌa?” nin.
Niptinmi: “Chaypïtapis mastalämi Tayta Dios uycuśhunquiman” nin.
10Niptinmi Efrain ayllupi śhamücunäta laquilcul, wasinta-cama liculcänanpä Amasias nila. Jinäluptinmi paycunañatac Judapa sumä piñälälisha wasinta-cama cuticulcäla.
11Jinalculmi Amasias callpanchaculcul Caćhi Pampäcama pilyänincunawan lipäcula. Chayćhümi ćhunca walanga (10,000) Seir läducunäta wañüchila.
12Jinaman Judapa chulincunam ćhunca walanga (10,000) nunacunacta prïsu chalälälila. Jinalculmi aꞌap puntanman ishpilcachil, chaypïta jitalpälälimula. Jinaptinmari lluy ñutüśha wañülälila.
13Jinapäcuśhancama Amasias laquilcul, wasinta-cama cutichishan pilyäcunäñatacmi, Samariapi aśhta Bet-horoncama lluy Juda lädu malcacunäman yaycaycälil, quimsa walanga (3,000) nunacunacta wañüchila. Jinaman cänincunactapis achca-achcactam apaculcäla.
14Amasiasñatacmi Edom lädu pilyäcunäta wañuchimuśhanpi cutipämula Seir nunacunap taytachancunacta apacälälisha. Jinalmi diosnincunapäña licaycul insinsiucunacta cañaycul alawala.
15Chaymi Tayta Dios sumä piñacülul willacüninwan Amasiaspa cuntran nichila: “¿Imapïtam ampa maquiquipïta malcantapis libraycuyta mana atipä nasyuncunap diosnincunacta ashicälälinqui?” nil.
16Chaynu niyällaptinlämi mandacüca nïlun: “¿Mandacücäpa caminaycüninpä ćhulaśhachun canqui imatá? Wañuyta mana munalꞌa upälla cay” nil.
Niptinmi willacüca camacalpula: “Caynu lulaśhayquipi jinaman limapäśhactapis mana uyalicuśhayquipi Tayta Dios camacaycüśhunayquipäñam cayan” nil.
17Chaypïtam Juda lädup mandacünin Amasias caminaycünincunacta tapucuycul, willacünincunacta caćhäla, Israel lädup mandacünin Joasman: “Licanacunapä cayman śhamuy” nil. Cay Joas cala Jehupa willcan, Joacazpa chulinmari.
18Chaynu nichiptinmi Israel lädup mandacünin Joas caćhala Juda lädup mandacünin Amasiasman caynu nil: “Libano muntićhu cä caśhacham, Libanućhu cä sumä cedroctalä nicuyan: ‘Wamla chuliquita walaśhnïwanlä casarachishun’ nil. Niyaptinpis Libanućhu cä juyu munti uywacuna chayninpa pasalshi caśhacta jaluypa lluy pawäña.
19Edom läducunäta llallishayquiwan nunatuculculmi, mas nunatucuytalä ashiyanquipis. Ñatac aśhwanpa wasillayquićhu quïdacuy. ¿Imapïmi quiquiquip jinaman Juda lädup mana allinnintapis ashiyta ćhapayanqui?” nil.
20Nichiptinpis Amasiasꞌa manam uyalïtuculachu. Chaynu cala Edompa taytachancunaman chalapacuśhanpïta, Joaspa maquinman Tayta Dios ćhulaycunan captinñamari.
21Jinalmi Israel lädup mandacünin Joas, Juda lädup mandacünin Amasiaswan pilyä Bet-semesta pasacun. Cay Bet-semes malca Juda lädućhümari cayan.
22Chayćhu Israel läducunäwan Juda läducunaca llallichiculculmi wasinta-cama ayiculcan.
23Chay Bet-semesćhümari Israelpa mandacüninca, Juda lädup mandacünin Amasiasta chalalcul, Jerusalenta prïsu puśhacula. Paymari Joaspa chulin, Joacazpa willcan cala. Jerusalenpa murällantañatacmi Efrain puncupi aśhta Isquina puncucama paćhac pusä ćhunca (180) mitructa tunïla.
24Jinaman Tayta Diospa alawana wasinćhu Obed-edom täpaśhanćhu, mandäcäpa palasyućhu cä ürucunacta, illaycunacta, sirbichicunapä ima cäcunactapis pudiracuyculamá. Chaynütacmi waquin nunacunacta chalalcul Samariaman prïsu puśhacula.
25Chaynütac Israelpa mandacünin Joacazpa chulin Joas wañucuśhanpïta, Juda lädup mandacünin Joaspa chulin Amasias, ćhunca pichayu (15) watalämi cawsala.
26Ñatac Amasiaspa mandacuyninćhu lluy lulaśhancuna, allaycuyninpi camacaynincama Juda lädup, Israel lädup mandacünincunap isquirbishan librunćhümari cayan.
27Amasiasꞌa Tayta Diospi japächacüluptinmari paypa cuntran Jerusalenćhu lluy limanaculcäla. Masqui Laquis malcaman Amasias ayicuptinpis atipäculmi chayćhu wañülächila.
28Jinalculmi cawalluman ćhulcalcälil Jerusalenman cutichipäcula. Chay awquilluncuna pampaläśhan Davidpa Malcan nishanmanmi Juda lädućhu pampälälila.
Who We AreWhat We EelieveWhat We Do
2025 by iamachristian.org,Inc All rights reserved.
