1Israel läducuna,
Tayta Diospa nishanta uyalipäcuy.
Cay nasyuntamá caycunapi Tayta Dios caynu cäraycun:
“Cay malcaćhu chalapacuna manañamá canñachu,
nï limalicuśhanta lulaycüpis canñachu,
nï Tayta Diosta lisïpis canñachu.
2Aśhwanpa limalicuyalpis manam lulaycälinquichu,
articunalla, wañuchinacuycunalla,
suwacuycunalla, mansibacuycunallamá cayan.
Wañuchinacuycunallamari manaña camacaycü cayan.
3Chaymi cay allpaca llaquipäña cayan.
Chayćhu cä jinantin nunacunaca mana callpayüñamá capäcunꞌa.
Munti uywacunaca, sïlüćhu pälïcunaca,
lamarcäćhu challwacunäpis lluyñamá wañupäcunꞌa.
4“Amaña mayanpis juccunäta tumpayächunchu ütac cäraycuyächunchu.
Sasirdütiwan chalanacücänümá nunayquicuna cayalcan.
5Muyunpamá am mitcacacunqui.
Tutanpañatacmi willacüpa pasachicücunaca amwan cusca cućhpapäcunꞌa.
Mamayqui Israeltañatacmi camacaycüśhä.
6Malcá mana yaćhayniyu caśhanpïtamá camacaycüśha cayan.
Yaćhachicuynïta juc läduman wicapaycuśhayquipïtamá
sasirdüti cayniquipi yaꞌapis wicapäśhayqui.
Tayta Diosniquip camachicuyninta unꞌaycuśhayquipïtamá
yaꞌapis milayniquicunacta unꞌaycuśhä.
7“Sasirdüticunaca mas achca capäculꞌa
mana allinllactam yaꞌap cuntrá masta lulapäcun.
Chaymi altuman ćhulaycunätá pinꞌaymanña ćhulaycuśhä.
8Malcaca juchancunapïta uycapäcuśhancunawanmá
sasirdüticunaca cawsapäcun.
Chaymi masta juchacuyllaćhu cananpa wañupacuynin.
9Malcaca caśhannümá sasirdütincunapis cayalcan.
Chaymi imanuy cawsapäcuśhanpi yaꞌa lawćhaycuśhä.
Imam lulapäcuśhanman tincütamá mućhuycachishä.
10Yaꞌa Tayta Diosta sirbiyta caćhaycuptinmá
micapäculpis mana maćhaycapäcunꞌachu.
Jucwan-jucwan cayaptinpis manamá milaynincunapis canꞌachu.
11“Waticacuyal, bïnullacta, aswallacta upyayalmi
mana tantiayniyüña licalïlälin.
12Malcá imactapis yaćhayta munal
cullupi cä taytachacunactamá tapupäcun.
Chay cullu niycunantamá alcapäcun.
Mansibacuypi wañupacuyninmi pantächin.
Tayta Diosninpi japächacuyculmá waticaculcan.
13Ulꞌucunäpa puntancunaćhümá cañaywan uycunacunacta uycapäcun.
Tacsha ulꞌucunäćhu cä roble, alamo, encina lantacunap
llantuynincuna allin captinmá
chayćhu insinsiucunacta cañaycapäcun.
“Chaymi wamla chuliquicuna waticaculcan;
llumchuyniquicunapis jucwan-jucwan caculcan.
14Ñatac ¿imapïmá wamla chuliquicunacta waticaculcäśhanpi,
llumchuyniquicunacta jucwan-jucwan
caculcäśhanpi mućhuycayächïman?
Am wayapacunäpis chaynüllamari watica walmicunäta ashiyalcanqui
capillacunäćhu uycunayquita uycunayquipä.
Chaynu mana tantiayniyu malca capäcuśhayquipïmá pampaman muyupäcunqui.
15“Am Israel lädu waticacuyaptiquipis
Juda lädu amari juchacuchunchu.
Gilgalman ama yaycuychu.
Bet-avenman ama liychu.
Amatac Tayta Diosta śhaycaycachil limalicuyaychu.
16Chucaru malta ćhina wäcacunänümá
Israel läducunaca liculcan.
¿Chaychun, jawca cacü uwishcunactanu
jatun pampacunaćhu yaꞌa Tayta Dios michiycüman imamá?
17Efrain ayllucunaca taytachacunactañamá alawayalcan.
Chaynu jina lulaculcächunñari.
18Paycuna upyayllactamá wañupaculcan;
camacälulñatacmi mana jamaycul waticaculcan.
Puydïnincunapis pinꞌay lulaycunallactamá ama-pacha nipäcun.
19Chaynu taytachancunacta uycapäcuśhanpïmi
sumä waywa licalilcamul apacunꞌa.
Chaylämi pinꞌayćhu quïdapäcunꞌa.
Who We AreWhat We EelieveWhat We Do
2025 by iamachristian.org,Inc All rights reserved.
