1Chaynütac mayanpis ćhacla micuy cüsacta Tayta Diosta uyculꞌa allinnin arinacta uycuchun. Chaymanmi asayticta jillpuycunꞌa, insinsiuctapis ćhulaycunꞌa.
2Jinalculmi Aaronpa chulin sasirdüticunäman uycunꞌa. Paycunam asayticta, apti arinacta aptilcul insinsiuntinta cañaycunꞌa uycuna patacćhu. Cay uycuyca yalpana uycuymari canꞌa. Chaynu cañaywan uycuśhanmi Tayta Diosman tuqui mishqui aśhnä ćhaycunꞌa.
3Chay uycuna ćhacla micuypi partiñatacmi Aaronpäwan lluy chulincunapä canꞌa. Cay cañaywan uycuśhancämari Tayta Diosllapä sumä chuya caycunꞌa.
4Chaynütac ćhacla micuyta uycul, urnućhu yanüśha captinꞌa tantacta ütac panquïquictam uycälinqui. Tantämi canꞌa mana libadürayu, allinnin arinapi, asaytiwan chapüśha. Panquïquïñatacmi mana libadürayu asaytiwan llusïsha caycunꞌa.
5Chaynütacmi ćhacla micuyta uycul, casitućhu ancäśha captinꞌa mana libadürayu, allinnin arinawan, asaytiwan chapüśha canꞌa.
6Chaytamari uchuy uchuyllaman cuchulcul asayticta jillpuycunqui. Cay cayan Tayta Diosman uycuna ćhacla micuymari.
7Chaynütac ćhacla micuyta uycul, mancaćhu yanüśha captinꞌa allinnin arinawan, asaytiwan chapüśham canꞌa.
8Uycunacta chaynu lulalculmi Tayta Diosman uycunayquipä sasirdütiman apaycunqui. Payñatacmi uycuna pataccäman apaycunꞌa.
9Chayćhümi chay apamuśhancäpi particta japächaycul uycuna pataccäćhu cañaycunꞌa yalpanapä cä uycunacta. Cay cañaywan uycuśhancämi Tayta Diosman tuqui mishqui aśhnä ćhaycunꞌa.
10Chay uycuna ćhacla micuypi partiñatacmi Aaronpäwan chulincunapä canꞌa. Cay cañaywan uycuśhancämari Tayta Diosllapä sumä chuya caycunꞌa.
11Chayurá Tayta Diosman ćhacla micuycunacta uycuśhayquićhuꞌa mana libadürayütam uycapäcunqui. Chaynu cañaywan uycuśhayquićhuꞌa urunwaypa mishquinta, chaynütac libadüractapis amam cañanquichu.
12Chay libadüractawan mishquicta wamä cusichapi uycuśhactanuꞌa uycunquimanmi. Ñatac Tayta Diosman tuqui mishqui aśhnätanuꞌa manam uycunquimanchu.
13Chay lluy uycuśhan ćhacla micuycunaca caćhiyümi caycunꞌa.Mar 9.49. Amamá faltaycunꞌachu Tayta Diospa limalicuśhanta camalaycachï caćhica. Lluy uycuśhayquićhümari caćhica caycunꞌa.
14Chaynütac ćhacla micuyta uycuśhayquićhu wamä cusichaśhayquita Tayta Diosman uyculꞌa puꞌuśha siwäta ancalcul aꞌaśhactam uycunqui. Chaymari canꞌa wamä cusichayquicunapi uycunayquipä.
15Chaymanmi asaytictawan, insinsiucta ćhulaycunqui. Chaynu ćhulaycunqui ćhacla micuyćhu uycuna captinmi.
16Chaypïta yalpanapä cä uycunapämi sasirdütica ishcüśha trïgucta asaytintinta, insinsiuntinta cañaywan uycunꞌa. Caymi Tayta Diosta yalpaywan uycuyca canꞌa.
Who We AreWhat We EelieveWhat We Do
2025 by iamachristian.org,Inc All rights reserved.
