1Israel caśhtacunaca chunyä Sin lädućhu jamapäcuśhanpïtam Tayta Dios nishanpa allipïta lipäcula. Chaypïta Refidim nishanćhu jamapäcuptinmi chayćhu upyapäcunanpä yacu mana calachu.
2Chaymi Moisesta nicuyalcan: “Yacunäcayalcämanmi yacucta upämay” nil.
Niptinmi Moises: “¿Imapïmi yaꞌacta nipämanqui? ¿Imapïmi Tayta Diospa munayninpi ishcayapäcunqui?” nin.
3Chayćhu yacupïta wañucuyalcalmi Moisesta yapa nicuyalcan: “¿Imapämi Egiptopi julapäcamälanqui? ¿Cayćhu lluy chulintin, uywantin yacupi wañuchipämänayquipächun julapäcamälanqui imamá?” nil.
4Chaymi Tayta Diosta Moises mañacula: “¿¡Taytay, cay malcäwan imactañamá lulaśhä!? Ñaćhañam lumiwanpis tamśhälälimanꞌa” nil.
5Niptinmi Tayta Dios: “Israelcunap yaśhancunawan puntapäcuy, jinaman Nilo lamarta wipyaycuśhayqui garutiquitapis apay.
6Yaꞌañatacmi Horeb nishan ulꞌup wancanćhu alcaśhayqui. Chay wancacta wipyaycuptiquim yacu yalamunꞌa israelcunaca upyapäcunanpä” nin. Chay nishantanümi lluy yaśhacunäpa ñawquin Moises lulaycula.
7Chay paräjictam Meriba śhutiwan śhutichäla, chayćhu quijaculcäśhan-laycu. Chaynütacmi Masah śhutiwan śhutichäla Israel caśhtacunaca: “¿¡Yaꞌanchicwanchun cayan Tayta Dios imamá!?” nil ishcayapäcuśhan-laycu.
Amalec caśhtacunäwanmi pilyapäcun8Chaypïtam Amalec caśhtacunaca Refidim läduman śhapämula Israel caśhtacunäwan pilyapäcunanpä.
9Chaymi Josueta Moises nin: “Allinnin nunanchiccunacta aclalcul Amalec caśhtacunäwan pilyamü liy. Yaꞌañatacmi wala muyun ulꞌup puntanćhu Tayta Diospa garuti umäśhanta chacchalämüśhä” nil.
10Chay nishannümi Josue Amalec läducunäwan pilyä lila. Moisesñatacmi Hurwan Aaronwan ulꞌup puntanman ishpipäcula.
11Chayćhu Moises garutinta chacchalaptinmi Israel caśhtacunaca llallipäcula; garutinta mana chacchalaptinñatacmi Amalec läducunaca llallipäcula.
12Ñatac Moisespa liclan uticaptinmi lumicta ćhulaycul chayman taycaycälichila. Aaronwan Hurñatacmi Moisespa liclanta wicpi caypi chalalapäcula. Chaynüpam inti jiꞌalpuycunancama Moisespa maquin tacyaycula.
13Jinaptinmi Amalec caśhtacunäta Josue ispädanwan camacaycüla.
14Chaymi Moisesta Tayta Dios nin: “Cay pasaśhanta yalpanapä juc libruman isquirbiy. Josuetañatac niycuy: ‘Cay pachäpïta Amalec läducunäta camacaycüśhämá; licachillapäpis manañamá capäcunꞌañachu’ ” nil.
15Chayćhümi Tayta Diospa uycunanta Moises śhalcachila “Tayta Diosmi llallichimäní” nil.
16Chayćhümi nin: “Tayta Diospa llallïnin maquinćhümá cayan. Tayta Diosmi Amalec caśhtacunäwan wiña-wiñaypä gïrraćhu cayan” nil.
Who We AreWhat We EelieveWhat We Do
2025 by iamachristian.org,Inc All rights reserved.
