1Niptinmi Naamat lädu Zofar nin:
2“Caynu-caynüpaña limäcäta ¿manachun mayanpis
upällächinanpä can imatá?
¿Ancha-anchap limaśhallayquipchun,
‘mana juchayüñam canqui’ nipäcuśhayqui imatá?
3¿Shimiqui chalaśhan limaycunallawanchun
upällachipämanquiman imatá?
¿Tayta Diosta jalutacuyaptiqui mayanpis manachun upällachishunquiman imamá?
4Amꞌa ‘allincäćhümi cayá’ niyanquimá.
‘Tayta Diospa ñawquinćhu chuyam cayá’ niyanquilamá canpis.
5Ima allinlä canman Tayta Dios limämuptin.
Ima allinlä canman cuntrayqui pay nishuptiqui.
6Rasunpa, tantiaśhayquipïpis mas sasamá.
Chay tantiaśhayquipïpis ishcay cuti mas-mas sasalämari canmanpis.
Chayurá tantianquimanmi jucha lulashayquimannu Tayta Dios
anchap mana mućhuchishuśhayquita.
7“Am, ¿¡Tayta Diospa pacacuynincunacta yaćhälunquimanchun imatá!?
¿¡Sumä munayniyu Tayta Diospi lluytachun yaćhälunquiman imamá!?
8Sïlüpïpis mas jatun cayaptinꞌa ¿imanuypatá lisïlunquiman?
Allpap śhunꞌunpïpis mas lulićhu cayaptinꞌa ¿imanuypatá tantialunquiman?
9Cay pachäpïpis mas jatu-jatunmá;
lamarcäpïpis mas anchu-anchumá.
10Pay śhalcamul prïsu ćhulaycul cäraycuśhuptiqui,
¿mayanmá manalcachinman?
11Pay tuquictamá artish nunacunäta tantiayan;
mana allincunäta pay licayal ¿caćhaycülunꞌachun imamá?
12Cay luclupïtá munti aśhnupi nuna näsimücäpis tantiayniyülämá canman.
13“Ñatac Tayta Diosman śhunꞌuyquita ćhulaycul,
uyshuycuyniquiwan maquiquitapis payman chacchalcul,
14jinaman ima jucha lulaśhayquitapis caćhaycul,
wasiquićhu mana allincunätapis wicapayculꞌa,
15imapïpis mana pinꞌacullalmi umayquita altuman pallalcunqui.
Jinaman imactapis mana manchacullal masïsu tacyaycunqui.
16Chaynütac cay pasaśhayquicunacta unꞌalunquimari
ütac yalpalpis yacu pasaśhantanüllamá yalpalcunqui.
17Jinaman cawsayniquipis ćhawpi muyuncäpa acchinpïpis mas-maslämi acchiycunꞌa;
masqui sasachacuyniqui tutawyaycänu captinpis muyun ayllishancänümi caycunꞌa.
18Tayta Diosman chalapaculmi jawca cawsaycunqui;
pay ñawillanćhu caycachishuptiquim jawca puñuycunqui.
19Puñunquipis imactapis, mayantapis mana manchachicullalmá.
Mayanñapis śhapämunꞌa yanapaycunallayquipäñamá.
20Juyucunäñatacmi ichá yanapäninta ashilpis mana taliycunꞌachu.
Maycäman pacacunanpäpis manamá talipäcunꞌañachu.
Paycunap alcaynin piswalpuycällañamá” nil.
Who We AreWhat We EelieveWhat We Do
2025 by iamachristian.org,Inc All rights reserved.
