2 Cronicas 15 - Old Testament Quechua Wanca（QVW）

Mandacü Asa lulaśhancuna 1Rey 15.13-15

1Chaypi Obedpa chulin Azarias Tayta Diospa Ispiritunpa munayninćhu cayalmi,

2Asaman talipalcul nin: “Mandacü Asa, Juda ayllucuna, Benjamin ayllucuna uyalipämay. Amcuna Tayta Dioswan caycäliptiquim paypis amcunawan caycunꞌa. Ashiycälilꞌa talipäcunquim. Caćhaycäläliptiquiꞌa paypis caćhaycälälishunquim.

3Achca-achca watam israelcunaca Tayta Diosta caćhaycälälila. Yaćhachinanpäpis sasirdüticuna manam calachu; mana camachicuyniyu imam capäculapis.

4Ñatac llaquicuyninćhu israelcunap Tayta Diosninman filtacalcämul ashiycälilmi ichá taliycälila.

5Chay timpucuna mayanpäpis manam jawca cawsay cayculachu, sinuꞌa manchacuyllañam jinantin nasyuncunäćhu cacula.

6Tayta Dios imaymanawan mućhuchiptinmari nasyun-pula, malca-pula camacanaculcäla.

7Ñatac amcuna mana jucmanyällal callpanchaculcay; allin lulayniquiman tincütamá uycuśha capäcunqui” nil.

8Chaynu Obedpa chulin willacü Azarias nishanta Asa uyalïlulmari callpanchacula. Jinalmi jinantin Juda, Benjamin läducunäćhu, jinaman Efrainpa ulꞌunćhu pudiracuycuśhan malcacunäćhu cä millachicuy taytachacunacta camacaycüla. Jinaman Tayta Diospa alawana wasinpa ñawpänin patyućhu cä, uycuna patactapis caśhanmi śhalcachila.

9Jinalculmi Juda, Benjamin läducunäta, chaynütac paycunaćhu yaćhä Efrain, Manases, Simeon ayllucunätapis juntülun. Tayta Dios mandacü Asawan caśhanta licalmari achca Israel läducuna payman jucllachaculcäla.

10Chaynu Jerusalenćhu juntunaculcäla mandacü Asapa, ćhunca pichayu (15) wata quimsa quilla mandacuyninćhümi.

11Chay muyunmi Tayta Diosman uycälila waycapämuśhanpi anćhish paćhac (700) wäcacunacta, anćhish walanga (7,000) uwishcunacta.

12Jinalculmi awquilluncunap Tayta Diosninta llapan śhunꞌunwan, llapan callpanwan ashipäcunanpä limaliculcäla.

13Jinaman israelcunap Tayta Diosninta mana sirbïcunätá jatunpis uchuyllapis, umripis walmipis wañuchisha cananpämi limaliculcäla.

14Chaynu apalishtin callpa-callpawanmi Tayta Diosman limaliculcäla, curnitillacuna wäla curnitacuna tucayaptin.

15Jinantin Juda läducunaca llapan śhunꞌunwan limaliculcäśhanpi, llapan cawsayninwan Tayta Diosta ashiycälil ćhasquiycälishanpïmá cushiculcäla. Chaymari Tayta Dios yanapaycula, jinaman lluy malcacunäwanpis jawca cawsayta uycula.

16Chaynütac Asera mamachacta alawananpä śhalcachisha ilucta lulachishanpïtam, awilan Maacacta puydï cayninpïta, mandacü Asa wicapäla. Chay mamachactapis wicapalculmari Cedron wayućhu cañaycüla.

17Ñatac Israelpa altunnin ulꞌucunäćhu cä uycunacunäta mana camacaycuyalpis, Tayta Diospa munaśhanmannümi mandacü Asa imaypis cawsaycula.

18Chaynütacmi papänin, quiquin japächaśhan ürucunäta, illaycunäta, sirbichicunapä cäcunätapis Tayta Diospa alawana wasinman ćhulaycula.

19Mandacü Asa quimsa ćhunca pichayu (35) wata mandacuynincamá pilyaycuna manamari calachu.