Jueces 15 - Old Testament Quechua Wanca（QVW）

Filisteo läducunätam Sanson cutichicun

1Unay caśhanpïtañatacmi Sanson trïgu cusichaćhu walminman watucü uña capischacta apaculcul lila. Ćhayculmi suydrunta nin: “Walmïta watucuycümi śhamulá. Pasaycuśhäri cuartunman” nil. Niptinmi yaycunanta mana munal suydrun nin:

2“Manañapisćha munanchu nilmi fistayquićhu cä jucnin müsuwanña cuscächilá. Ñatac śhullcanwanñari cuscachishayqui. Payꞌa mayurcäpïpis mas tuquishllalämi canpis” nil.

3Niptinmi Sanson: “Cananmi ichá am Filisteo läducunäta cäniquipïtalä mana allinta lulapäcuśhayqui” nin.

4Nilculmi quimsa paćhac (300) atücunacta chalalcamul ishcay-ishcayta mataycachil ćhupapulacta wataśhancäman michacta watälun.

5Jinalculmi chayman ninacta lataycachil caćhaycüla Filisteo läducunap trïgu ćhaclancunaman. Chaymi ïraćhu cäcunäta, lluy ćhaclaćhu lutuypa cäcunätapis ninaca camacaycüla. Aśhta übas lantapis, ulïbus lantapis lluymi lupäla.

6Jinäluptinmi Filisteo läducunaca mayan lulaśhantapis ashicuyalcan. Chaymi yaćhälälila Sansonpa walminta suydrun Timnat jucwan cuscächiptin, cutichicuypi chayta lulaśhanta. Chaymari lluy Filisteo läducunaca Sansonpa walminta, suydrunta lluy cañaycälälila.

7Jinäläliptinmi Sanson nin: “Cananmi ichá licacamanqui; lluy cutichicunäcama jamaytapis manamá taliycuśhächu” nil.

8Nilculmi Filisteo läducunäta sumä piñäśha camacaycüla. Jinalculmi Etam ulꞌüćhu cä maćhayman licul, chayćhu yaćhala.

Aśhnup caquichcunwanmi Filisteo läducunäta Sanson llallin

9Jinaptin Filisteo läducunaca Juda läduman yaycapäculmi aśhta Lehicama jamapäcula.

10Chaymi Juda lädu nunacunaca: “¿Imapïtam yaꞌacunawan pilyä śhapämulanqui?” nin.

Niptinmi Filisteo läducunaca: “Yaꞌacuna śhayalcämú Sansonta chalämi. Pay lulapämäśhannu tincüninman cutichiculcänäpämi” nin.

11Niptinmi quimsa walanga (3,000) Juda nunacuna Etam ulꞌüćhu maćhaycäman lipäcula. Chayćhümi Sansonta nipäcun: “¿Manachun yaćhanqui Filisteo läducunäpa maquinćhu caśhanchicta imamá? ¿Imapïmá caycunaman jitaycälälimanqui?” nil.

Niptinmi Sanson: “Paycuna yaꞌawan lulaśhanmannüllamá cutiycachilá” nin.

12Niptinmi: “Yaꞌacuna śhapämulá chalalcul Filisteo läducunäpa maquinman ćhulaycälinacpämi” nin.

Niptinmi Sanson: “Rasunpa mana wañuchipämänayqui captinꞌa limalicalcämayꞌari” nin.

13Niptinmi: “Manam wañuchipäcuśhayquichu, ćhänalcul Filisteo läducunäpa maquillanmanmi ćhulaycapäcuśhayqui” nin.

Nilculmi Sansonta muśhü watuwan ćhänalcälil pacaläśhan maćhaycäpi julapämula.

14Chaynu ćhänacüśhacta Lehi ulꞌüman ćhälälichimuptinmi Filisteo läducunaca cushicuypi apalishtin talipapämula. Chay üratacmi Tayta Diospa Ispiritun juclla Sansonta pudiracuycuptin maquinćhu ćhänalä watüta, lupäśha lïnu puchcactanülla laćhuy päwälun.

15Jinalculmi chayćhu muśhü wañüśha aśhnup caquichcunta jululcul chaywan walanga (1,000) Filisteo läducunacta wañüchila.

16Jinalculmi Sanson nin:

“Aśhnup caquichcunwanmi

ishcay quimsa muntunta śhuntuycülú;

aśhnup caquichcunwanmi walanga (1,000)

nunacunacta wañüchí” nil.

17Nilculmi chay aptiläśhan caquichcucta wicapäla. Chay ulꞌütañatacmi Ramat-lehi nipäcula.

18Chayćhu alli-allicta Sansonta yacunäcuyaptinmi Tayta Diosta mañacula: “¿Cay Filisteo läducunäpi libraycayämalchun, cananñatac yacupïta wañuyächimanquiman cay mana lisishüniqui nunacunäpa maquinćhülä canpis?” nil.

19Niptinmi Lehi ulꞌućhu uclupïta yacucta Tayta Dios yalächimula. Chayta upyacuyculmi Sanson yapañatac cawsapacülun. Chaymi yacu yalamuśhan Lehi sityucta canancamapis En-hacore nipäcun.

20Chay Filisteo läducunäpa maquinćhu Israel caśhtacunaca caśhan timpućhümi Sanson ishcay ćhunca (20) wata israelcunäpa caminaycünin cala.