2 Samuel 15 - Old Testament Quechua Wanca（QVW）

Davidpa cuntranmi chulin Absalon śhalcun

1Chay unaypïtañatacmi Absalon pilyananpä carritanwan, cawalluncunawan, picha ćhunca (50) pilyänincunawan pulicuyä cala.

2Paymi wäla-wälalla śhalcuculcul malcaman yaycunan caminup patallanćhu śhäcula. Chayćhu mayanpis mandacücäman ima quijallantapis arinlaycunanpä śhamücunätamari ayalcul nin: “¿Mayan ayllupïmi canqui?” nil. Ñatac Israel caśhtap jucnin ayllunpi captinꞌa,

3Absalon nilam: “Quijacuyniqui allinmi; tincüllanmanmari. Ñatac mandacü partipïtá manam mayanpis licaycüniqui canchu” nil.

4Jinaman nilpulatacmi: “¡Maylä cay nasyunpä fisnin ćhulälälimanman! Ima quijayücunätapis cäninman-camaćh allichaycüman” nil.

5Jinaman mayanpis uyshuycünincunactá maquinta chacchayculmi śhalcalcachil macallaycula, muchaycula.

6Chaynümi Absalon lulaycula mandacücäman quijacunacta arinlaycunanpä lï Israel caśhtacunäwan. Chaynüpamari lluy israelcunäpa śhunꞌunta suwaycula.

7Tawa watapïtañatacmi mandacücäta Absalon nin: “Mandacü taytallay, ama chaynu caychu, Hebron malcaman lilläśhä Tayta Diosman limalicuśhäta lulaycunäpä.

8Siria lädućhu cä Gesurćhu yaćhayalmi cay nunallayqui limaliculá: ‘Jerusalenman Tayta Dios cutiycachimaptinꞌa Hebronćhümi alawaycuśhä’ ” nil.

9Niptinmi mandacüca: “Jawcalla liy” nin.

Niptinmi Hebron läducta Absalon pasacul,

10jinantin Israel ayllucunäman pacallap willacachimula: “Curnitilla tucalpamüta uyalïlälilmi nipäcunqui: ‘¡Hebronćhu Absalonmi mandacüca!’ ” nil.

11Jinaman Jerusalenpïtam ishcay paćhac (200) ayachishan nunacunäta puśhala. Paycunamari imactapis mana yaćhal allin śhunꞌunwan lipäcula.

12Chaypïta Tayta Diospa cañaywan uycuśhancamam papänin Davidpa caminaycüninta Absalon ayächila. Paymi Gilo malcaćhu yaćhä Ahitofel śhutiyu cala. Chaynu lluy-lluy lulaśhancunawanmari papäninpä cuntran śhalcapäcunanpä Absalon lulayta ćhapala; śhalcünincunapis mas-mastañamari milacuyalcäla.

Jerusalenpïtam David ayicun

13Juc willacüñatacmi Davidman willaycula: “Jinantin Israel caśhtacunäpä śhunꞌunmi Absalonćhüña cacuyalcan” nil.

14Niptinmi Jerusalenćhu lluy puydï yanapänincunacta David nin: “Absalonpïtá manam iscapachwanchu. Canan-pacha śhalcuculcul ayishun. Mana apuracuptinchicꞌa yanꞌalätac pay llallïmä imachwan. Alcansälulꞌa jinantin malcantintaćh ispädawan camacaycämaśhun” nil.

15Niptinmi puydï yanapänincuna: “Taytay, nishayquita lulapäcunäpämi yaꞌacuna cayalcällá” nin.

16Niptin-pachallam mandacü David palasyunćhu lluy cäcunäwan pasaculcan. Ćhunca uywanacuśhan walmincunallactañamari wasinta täpananpä David caćhaycülun.

17Chaynu lluy nunancunawan yalälälilmi malcap manyanchüña cä wasićhu śhaycälälin.

18Chayćhu lluy puydïnincuna paypa lädunman ćhulanacäläliptinmi Gatpïta atipämü Ceret, Pelet ayllucunaca, jinaman süta paćhac (600) Gat läducunäpis mandacücäpa ñawpäninpa pasapäcula licaycuśha capäcunanpä.

19Chayćhümi Gat lädu Itaiman aśhuycul mandacüca nin: “¿Am imapätan yaꞌacunacta atiyämanqui? Malcayquipi alüśha, juc caśhta cayalꞌa cuticuyꞌari mandacü Absalonwan quïdacamü.

20Anyanllala ćhäyämuptiqui ¿imanuypam yaꞌawan linayquita munaśha, quiquïpis may lishätapis mana yaćhayalꞌa? Aśhwanpa lluy malca-masiquita puśhaculcul cuticuy. ¡Tayta Diospa cuyacuyninwan chalapacuna caśhanca amcunawan caycuchun!” nil.

21Niptinmi Itai nin: “¡Tayta Dios-laycu, am mandacü-laycum cawsaypäpis wañuypäpis amwan cusca maytapis lilläśhä!” nil.

22Niptinmi mandacüca: “Allinmi. Yaꞌacunawanꞌari lishun” nin.

Niptinmi Davidtawan lluy nunancunacta Gat lädu Itai liwshila.

23Lluy-lluymi apalcaćhaypa waꞌaśhtin lipäcula. Chay Cedron mayucta David lluy nunancunawan pasälälilmi chunyä ulꞌu läduman liyta allacaycälila.

24Paycunaćhütacmi Sadocpis Tayta Diospa limalicuśhan chuya babulninta apä levitacunäwan cusca liyäla. Paycuna babulcäta Abiatarpa ñawpäninman ćhulaycäläliptinmi uycula lluy nunacunaca malcapi yalupäcunan-cama.

25Ñatac sasirdüti Sadoctam mandacü David nin: “Tayta Diospa babulninta malcaman caśhan cutichiy. Tayta Dios llaquipaycamaptinꞌa cutichimanꞌaćh chuya babulnintawan carpanta licaycunapäpis.

26Ñatac ‘śhunꞌüpänüchu manam canqui’ nimaptinꞌa yaꞌawan imactapis munaśhanmannu lulaycuchun” nil.

27Jinaman nin: “Am Sadoc allin licaycüca cayalꞌa malcamanꞌari Abiatarwan cuticulcay. Ampis chuliqui Ahimaaswan, Abiatarpis chulin Jonatanwanꞌari cutipäcuy.

28Yaꞌañatacmi cay chunyä pampäćhu quïdacuśhä ima pasaśhancunactapis willaycälimänayqui-cama” nil.

29Niptinmi Abiatarwan Sadoc Jerusalen malcaman Tayta Diospa babulninta cutichipäcul chayćhu quïdacalcämula.

30Ñatac David llaquicuypïmi calaćhaquilla Olivos ulꞌucta uman śhucupacüśha waꞌaśhtin ishpila. Chaynütacmi lluy liwshïnincunapis uman śhucupacüśha-cama waꞌaśhtin ishpipäcula.

31Chayćhümi Davidman willaycälälin Absalon partiman Ahitofelpis jucllachacüśhanta. Chaymi David mañacula: “Tayta Diosllay, Ahitofel lulay munaśhancunaca mana caśhanman muyuchun” nil.

32Chaynu chay ulꞌup puntanćhu Tayta Diosta alawanapä caśhanman David ćhäluptinmi Ar lädu Husai yalämun müdanan laćhyäśha, umanmanpis allpawan maśhucüśha.

33Chayćhu Davidñatacmi nin: “Yaꞌawan lilꞌa uma nanaynïćha canquiman.

34Aśhwanpa Jerusalenta cutil Absalonta nimuy: ‘Mandacü taytallay, papäniquita unay sirbishänümi canan amtapis sirbilläśhayqui’ nil. Chaynüpaćh Ahitofelpa lulay munaśhanta pampaman muyuchiyta yanapämanqui.

35Chayćhümari sasirdüti Sadocwan Abiatarpis capäcunꞌa. Chaymi chay palasyućhu ima uyalishayquitapis paycunaman willaycunqui.

36Chaynütacmi chayćhu capäcunꞌa Sadocpa chulin Ahimaaswan, Abiatarpa chulin Jonatanpis. Paycunawanmá willaycachimanqui ima yaćhaśhayquicunactapis” nil.

37Chaypïta Jerusalenman Absalon yaycuycuyaptinmi Davidpa apanacuśhan Husaipis malcaman ćhälun.