Salmos 35 - Old Testament Quechua Wanca（QVW）

Libraycunanpämi mañacunDavid isquirbishan taquinapä.

1 Tayta Diosllay, ćhinicüní śhamücunäpa cuntran śhalcuy;

pilyä śhamücunäwan pilyaycuy.

2Jatun atajachicuyquita

apaculcul yanapaycamäní śhamuy.

3Lansayquita apticulculꞌari aticaćhamänïcunawan chalanacuy.

“Yaꞌami salbaycüniqui cá” niycamayꞌari.

4Wañuynïta ashïcunaca pantäśha pinꞌayćhu capäcuchun.

Mana allinnïta ashïcunaca pinꞌacüśha ayipäcuchun.

5Päśhacta waywa apaśhancänu caycälichun;

Tayta Diospa anjilninwan wicapäśha caycälichun.

6Caminuncunapis tutapälla, lluchcalla caycuchun;

Tayta Diospa anjilninwan aticaćhaśha caycuchun.

7Yanꞌal-yanꞌalpïmá trampacta ćhuläläliman.

Yanꞌal-yanꞌalpïmá palpachiyta munayninwan ućhcucta ućhcülälin.

8Quiquincunamanꞌari mana allinca unꞌaypi ćhächun,

quiquinpa trampanꞌari chalächun,

quiquinpa ućhcupäcuśhanmanꞌari palpupäcuchun.

9Chayćha Tayta Diosćhu cushicuśhä.

Salbaycamäśhanpïmá śhunꞌullá cushicunꞌa.

10Llapan śhunꞌüwanćha nisha:

“¿Am Tayta Diosnuꞌa mayantá canman?” nil.

Mana mayanpis yanapäniyu cäcunätamá

sumä munayniyütucüśhacunäpi libraycunqui.

Usuchisha cäcunätamá usuchïnincunapïta salbaycunqui.

11Juyu tistïgucunämi śhalcatityalcamul

mana yaćhaśhäcunacta tapupäman.

12Allincäta lulaycuptïpis mana

allincäwanmá cutiycälichipäman.

Chaymá śhunꞌüta nana-nanaypa ćhaycaman.

13Paycuna ishyapäcuptinñatacmi sumä

llaquicul shicacü müdanacunawan ćhulaculcul ayunalá;

Tayta Diospa mana uyaliycuśhamá mañacuy-mañacuy cayälá.

14Wawꞌi-caśhäpïnümi, apanacuśhäpïnümi llaquisha pulilá.

Mamäta wañupacüśhanümi pasaypi jucmanyäśha calá.

15Yaꞌa palpüluptïñatacmi ichá juntunacaycälil asipapäman.

Mana lisisha nunacunänümi manaña jamaycul ñacachipäman.

16Usuchipämalmi palapäman.

Ćhïnipayalmi quiluntapis licaycachipäman.

17Taytallay, ¿caynüta imaycamañamá licayämanqui?

Camacaycü cäcunäpïta julaycallämayꞌari.

Cay cawsaylläta malta liyuncunap shiminpïta libraycallämayꞌari.

18Jinantin nunacunaca juntunaculcäśhanćhümá sulpäta uycuśhayqui.

Achca-achca nunacunäpa ñawpäninćhümá alawayculläśhayqui.

19Yanꞌalpi ćhïnimänïcuna amañari cushiculcächunchu.

Yanꞌalpi cuntracamänïcuna amañari ñawinwanpis micalpayämächunñachu.

20Paycuna manamá tuquillapchu limaycamanchic.

Aśhwanpa allin cä nunacunäpa cuntranmá limanaculcan.

21Shimintapis maćhaytanu quićhayculmi nipäcun:

“Cananꞌari mana allinman palpuśhanta

ñawinchicwan licaycunchic” nil.

22 Tayta Diosllay, caycunacta am tuquictamá licalanqui.

Amari upällacuycuychu.

Taytallay, amari caćhaycallämaychu.

23Tayta Diosllay, tincünïman licaycamänayquipä

licaćhacul śhalcuyñari.

Tayta Diosllay, śhalcallämayñari.

24 Tayta Diosllay, tincüllanman cäraycü

caśhayquimannuꞌari cäraycamal:

“Allinmi canqui” niycallämay.

Yaꞌapïta amañari cushiculcächunñachu.

25Amañari śhunꞌunćhu niculcächunchu:

“Caynu canantamá munalanchic” nil.

Amañari nipäcuchunchu:

“Chayꞌari pasaypicta lulälunchic” nil.

26Llaquicuynïpi asipämäcunaca

pinꞌayćhüñari pantäśha capäcuchun.

Yaꞌapïta mas yaćhätucüśhäcunaca

uyshulächisha pantäśha capäcuchun.

27Ñatac allincäćhu canäta munäcunacá

cushicuypïta taquipäcuy.

Imaypis nipäcuyꞌari: “Nunallayquip allinninta

ashiycü Tayta Dios altuman juluycuśha cachun” nil.

28Tincüninman-camalla licaycü

caśhayquipïmá shimillá limaycunꞌa.

Walan-walanmá alawaycuśhayqui.