Isaias 7 - Old Testament Quechua Wanca（QVW）

Isaiasmi mandacü Acazta willan

1Juda läducta Acazmi mandacuyäla. Pay Jotampa chulinmi, Uziaspa willcanmi cala. Chay tinpum Siria lädup mandacünin Rezin, Israel lädu Remaliaspa chulin mandacünin Peka nishanwan yalapäcula, Jerusalen malcacta pudiracuycü. Ñatac manamá atipapäculachu.

2Chay pasaśhantam mandacü Acazman lluy aylluntinman willaycälila: “Siria läducunaca Efrain nunacunäwanmi cuntranchic jucllachanacälälin” nil.

Niptinmi lantacuna sumä-sumä waywawan chucchupäcuśhannu manchacuypïta mandacü Acaz lluy malcantin chucchucuyalcan.

3Chayćhümi Isaiasta Tayta Dios nin: “Chuliqui Sear-jasubta puśhaculcul mandacü Acazman liy. Paywan tincunqui janay lädu istanquipi yacu yalamuśhancäćhümi. Chay cayan täśhanapä cäcäman lï caminućhümari.

4Paytam ninqui: ‘Jawcayay, ama lücutacuychu. Siria lädu Rezinwan Remaliaspa chulin Peka nishanta ama manchacuychu nï śhunꞌuyquipis jucmanyächunchu. Paycuna piñacuyninwan sumä walayalcalpis, ishcay untayä ilucunänüllamá cayalcan.

5Siria läducunämari Efrain läducunäwan jinaman Remaliaspa chulin Pekawan cuntrayqui lulananpä limanacälälin:

6“Juda läduman yaycuycul pudiracuycuśhun. Maquinchicćhüña cayaptinꞌa malcamasinchic Tabeelpa chulintaña mandacü cananpä ćhuläśhun” nil.

7Chaynu nipäcuptinpis Tayta Diosñatacmi nin:

“ ‘¡Chay nipäcuśhanca manamá lulacacunꞌachu;

pinsaśhannüchu manamá canꞌa!’ nil.

8-9Awari, Siria nasyunca manamá capitalnin Damascopi maschu;

Damascopis manamá mandänin Rezinpi maschu.

Israel lädupis manamá capitalnin Samariapi maschu;

Samariapis manamá Remaliaspa chulin mandacü Pekapi maschu.

Ñatac süta ćhunca pichayu (65) watacamam,

Israel camacaycüśha cal licanallapäpis nï canꞌañachu.

Amcunapis cay nishäcunaman mana chalapaculcalꞌa

manamá sumächu tacyapäcunqui” nil.

Emanuel śhamunantam willacun

10Chaypïta mandacü Acazta yapañatacmi Tayta Dios nin:

11“Nishäca rasunpa caśhanta tantianayquipä yaꞌa Tayta Diosniquita mañacamay juc siñalta altu sïlüćhüpis ütac cay allpäćhüpis licaycachinacpä” nil.

12Niptinmi Acaz: “Manamá yaꞌa mañacuśhächu; Tayta Diosta yaćhapaycunäpä manamá ima siñaltapis mañacümanchu” nin.

13Niptinmi Isaias nin: “Mandacü Davidpa milaynin Acaz, sumäta uyalipäcuy. ¿Manachun nunacunäta piñachipäcuśhayquiwan amipäcunqui imamá? ¿Tayta Diostapis piñachipäcunquilächun imatá?

14Má, canan quiquin Tayta Diosmá juc milagructa licachipäcuśhunqui. Manalä umricta lisï wamlam, patayu licalilcul walaśhta ishyacunꞌa. Paypa śhutintam Emanuel nïta ćhulanꞌa.

15Chay walaśh mana allincäta juc läduman wicapaycul allincäta aclayta yaćhälulmi lichi timpullactawan urunwaypa mishquillanta micunꞌa.

16Chay walaśhca mana allincäta juc läduman wicapaycul allincäta aclayta manalä yaćhayaptinlämi, chay manchacuśhayqui ishcay mandacücunap nasyunnincuna pulumäśha canꞌa.

17“Cananꞌa Tayta Diosmá sumä-sumä ñacayta anman, aylluyquiman, malcayquiman ćhächimunꞌa. Caynu ñacaycuna Juda lädupi, Israel lädupi laquicuśhan muyunpïtapis manamá calachu. (Chay ñacachishüniqui Asiria nasyunpa mandacüninmi canꞌa)” nil.

18Chay timpućhu Tayta Dios wishyaywan ayaptinmi Egiptop pilyänincuna chuspicunanu śhapämunꞌa; Asiria lädupïñatac urunwaycunanu śhapämunꞌa.

19Achca-achca śhapämulmi chunyä wayucunäćhu, maćhaycunäćhu, caśha-caśhacunäćhu, uywacuna yacu upyanancunaćhu, jinaman mayćhüñapis ćhulanacälälinꞌa.

20Chay muyunćhümi Tayta Dios puśhamunꞌa Asiria lädup mandacüninta Eufrates mayup chimpan lädupi lïtaśha cä cuchilluctanu. Chaywanmi Judapa ächanta, śhaplanta, aychanćhu cä wachancunactapis calaypa-calaycülunꞌa.

21Jinaptinmi chay timpu jucllay wäcallan, ütac ishcay uwishllan captinpis cushisha-cushisha cacunꞌa.

22Ashllaylla quïdäcuna captinmari lichillá achca-achca cacunꞌa. Jinalmi lichi timpuctawan urunwaypa mishquillanta maćhaycälinancama micapäcunꞌa.

23Chay timpu ćhämuptinmi walanga (1,000) üba lantayu ćhaclapis, walanga (1,000) illay ćhaniyu ćhaclaćhüpis imaymana caśhacuna juntäśhallaña cacunꞌa.

24Chaynu imaymana caśhacunalla muntiyaptin, munti uywacunalla cayaptinmá, nuna yaycücäpis uywacunacta chalä yaycapäcunꞌa.

25Caśhacunallaña cayaptinmi asadunwan lulaśhan wätacunämanpis manaña pipis yaycunꞌañachu. Chaycuna wäcacuna, uwishcuna, capishcuna micapäcunallanpäñamá cacunꞌa.