Deuteronomio 16 - Old Testament Quechua Wanca（QVW）

Tayta Dios Libraycuśhan Fista Exo 23.14-17; 34.18-24

1“Tayta Diosniqui Libraycuśhan FistactamExo 12.1-20; Lev 23.5-8; Num 28.16-25. Abib quillaćhu lulapäcunqui. Chay quillaćhümari tutanpa Egiptopïta Tayta Diosniqui julapämuśhulanqui.

2“Tayta Diosniqui yaćhananpä aclaśhan sityućhümari chay Tayta Dios Libraycuśhan Fistaćhu wäcacta, uwishta payman uycälinqui.

3“Chay uycuśha uywacta mana libadürayu tantantintam micapäcunqui. Egiptopi mana-mana yalapämuśhayquipïtam mana libadürayu llaquicuy tantacta anćhish muyun micapäcunqui. Chaynüpam Egiptopïta yalamuśhayquita cawsapäcuśhayquicama yalpapäcunqui.

4Jinantin malcäćhümi anćhishnintin muyunca libadüra mana canꞌachu. Chay wamä muyun tardićhu aycha uycuśhayquica chay walantinpá manañam puchunmanñachu.

5Tayta Diosniqui mana aclaycuśhan malcacunäćhuꞌa Tayta Dios Libraycuśhan Fistacta amam lulapäcunquichu.

6Sinuꞌa Tayta Diosniqui yaćhananpä aclaycuśhan sityullaćhümi lulaycälinqui. Egiptopi yalamuśhayqui inti patac tardi üram chay fistaćhu uycunayquita uycälinqui.

7Quiquin Tayta Diosniqui aclaycuśhan sityućhümari cancaycul micapäcunqui. Chay walantintañatacmi wasiquita cutïpäcunqui.

8Süta muyunmari mana libadürayu tantacta micapäcunqui. Anćhish muyuncäñatacmi Tayta Diosniquipä sumä fistacta lulapäcunqui; chay muyun amam ima lulayllactapis lulapäcunquichu.

Simäna Fista

9“Trïgu lutuy allaycuśhanpïta anćhish simäna pasäluptinmi,

10Tayta Diosniquita alawayniquiwan Simäna FistaLev 23.15-21; Num 28.26-31. nishanta lulapäcunqui. Chayćhümi Tayta Diosniqui uycuśhuśhayquimannu śhunꞌuyquipi yalamuśhanta uycälinqui.

11Chay Tayta Diosniqui yaćhananpä aclaycuśhan sityućhümi fistachaculcanqui chuliquicunawan, uyway nunayquicunawan, malcayquićhu yaćhä Levi ayllucunäwan, juc caśhtacunäwan, mana taytayü-mamayücunäwan, jinaman amcunaćhu yaćhä japanyäśha walmicunäwanpis cushiculcanquim.

12Amcunapis Egiptoćhu cayalcal uyway nuna capäcuśhayquita yalpapäcuyꞌari. Chaymi cay camachicuycunacta uyalicul lluy cäsuculcänayqui.

Chucllachacuy Fista

13“Chaynütac trïgu jaluchishayquicunacta, jinaman übayquita apchïta camacälälil anćhish muyunmi Chucllachacuy Fista nishanta lulapäcunqui.Lev 23.33-36, 39-43; Num 29.12-38.

14Chay fistaćhu amcuna, chuliquicuna, uyway nunayquicuna, Levi ayllucuna, amcunaćhu yaćhä juc caśhtacuna, mana taytayü-mamayücuna, amcunaćhu yaćhä japanyäśhacunäwanpis cushiculcanquim.

15Tayta Diosniquita alawaywanmi aclacuśhan sityućhu anćhish muyun fistachaculcanqui, pay ima talpuyniquitapis, lulayniquitapis allinpä licaycuśhanpïta. Jinaptinćha cushicuyniqui cabal caycunꞌa.

16“Tayta Dios aclacuśhanmanmi watäćhu quimsa cuti wayapanllanllan lipäcunꞌa. Chay sityućhümi Mana Libadürayu Tanta Fistacta, Simäna Fistacta, Chucllachacuy Fistactapis lulapäcunꞌa. Manam mayanpis cala maquillá Tayta Diosman aśhuycunmanchu.

17Tayta Diosniqui allinpä licaycul uycuśhuśhayquimannümari lluy uycälinqui.

Yaćhayniyücunaca cällanman tincüllanman licaycunanpämi nin

18“Tayta Diosniqui ayllunpa-cama uycuśhuśhayqui malcacunäta tincüninman-cama allinpä licaycunanpä ćhulaycälinqui fiscunactawan puydïcunactam.

19Allincäta ama mana allinman muyuyalcächïchu; amatac mayanninmanpis śhalcuyalcaychu, nïtac suburnachicuyalcaypischu. Suburnuca yaćhayniyu nunacunäta aplachinmi; allincunätamari mana allinta limachin.Exo 23.6-8; Lev 19.15.

20Amcuná allincällactam, tincüllanman cäcällactam lulaycälinayqui. Chayćha Tayta Diosniqui uycuśhunayqui allpaćhu duyñuchaculcul yaćhapäcunqui.

21“Tayta Diosniquipä uycuna patac lulaśhayquip sircanmanꞌa amam mamacha Aserapa ilucta śhalcachipäcunquichu.Exo 34.13.

22Amatacmi lumipïtapis taytachacunacta śhalcachipäcunquichu.Exo 23.24; Lev 26.1. Chaycunacta Tayta Diosniqui millachicunmari.