1 Tayta Diosnillay, amllamá
altuman juluycuśha canqui; manamá yaꞌacunachu.
Llaquipayniyu caśhayquipi, rasunca caśhayquipïmá
śhutiqui altuman juluycuśha caycun.
2¿Imapïtá juc nasyuncunaca:
“¿Mayćhütá chay Tayta Diosnin cayanman?” nil nimanchic?
3Tayta Diosninchicꞌa janay pachäćhümá cayan.
Payꞌa lluy imactapis munaśhantamá lulaycun.
4Paycunap taytachancunañatacmi ichá
ürullapïta, illayllapïta cayan.
Nunacunap lulaśhancunallamari cayan.
5Shiminꞌa caytá cayanmi, manatacmá limanchu.
Ñawinpis caytá cayanmi, manatacmá licanchu.
6Linlinpis caytá cayanmi, manatacmá uyalinchu.
Sinꞌanpis caytá cayanmi, manatacmá imactapis aśhnachicunchu.
7Maquinpis caytá cayanmi, manatacmá chalanchu.
Ćhaquinpis caytá cayanmi manatacmá pulinchu.
Cuncanpis caytá cayanmi, manatacmá imallactapis paćhyachinchu.
8Chaynümá chay taytachacunap lulänincuna cayalcan.
Chaynümá payman chalapacünincuna cayalcan.
9Am israelcunäñatac, Tayta Diosman chalapaculcay.
Paymá yanapaycamäninchic, pacaycamäninchic.
10Aaronpa milaynincuna, Tayta Diosman chalapaculcay.
Paymá yanapaycamäninchic, pacaycamäninchic.
11 Tayta Diosta manchacücuna, payllaman chalapaculcay.
Paymá yanapaycamäninchic, pacaycamäninchic.
12 Tayta Diosmá yaꞌanchicpi yalpälul
allinpä licaycamäśhun.
Israelpa milaynintamá allinpä licaycunꞌa.
Aaronpa milaynincunactamá allinpä licaycunꞌa.
13 Tayta Diosta manchacuywan cawsäcunätá
uchuchäcunällactapis jatućhäcunätapis allinpamá licaycunꞌa.
14 Tayta Diosmá amtapis
chuliquicunactapis milaycachishunqui.
15Cay pachätapis janay pachätapis
lulä Tayta Diosmá allinpä licaycälishunqui.
16Janay pachacá Tayta Diospamá.
Cay allpätañatacmi ichá nunacunäman uycamälanchic.
17Wañüśhacunaca Tayta Diosta manañamá
alawapäcunmanchu nïtac wañüśhacuna caśhanman
jiꞌalpücunäpis alawapäcunmanchu.
18Yaꞌanchicñatacmi ichá cananpis imaycamapis
Tayta Diosta altuman juluycuśhun.
¡Tayta Diosta alawapäcuy!
Who We AreWhat We EelieveWhat We Do
2025 by iamachristian.org,Inc All rights reserved.
