1 Samuel 19 - Old Testament Quechua Wanca（QVW）

Davidtam Saul wañuchiyta munan

1Chaypïtam Saul nila chulin Jonatantawan lluy yanapänincunacta David wañuchisha cananpä. Ñatac Saulpa chulin Jonatanmi Davidta anchap cuyala.

2Chaymi willaycula: “Papäní Saulmi wañuchiyta munayäśhunqui. Chayurá wälaman maymanpis mana talishunayquiman pacacämuy.

3Yaꞌañatacmi papänïwan am caśhayqui läduman yalapämuśhä. Chayćhümi ampïta limapäśhä. Jinaman ima nimäśhantapis willaycuśhayquim” nil.

4Chaypita Davidpa allinnintam papänin Saulta Jonatan niycula: “Mandacü taytallay, uywayniqui Davidta ama ima mana allintapis lulallaychu. Pay manamá ima mana allintapis lulalachu; aśhwanpam lluy lulaycuśhancunaca allinniquipälä cala.

5Payꞌa wañuytapis mana manchaculmi Goliatta wañüchila. Chaynüpam Tayta Dios chay muyun lluy Israel caśhtacunäta libraycamälanchic. Ampis chayta lical cushiculanquimari. Chayurá ¿imapïtam mana juchayu cayaptin yanꞌal wañuchiyta munayanqui?” nil.

6Chaynu chulin Jonatan nishanta Saul uyaliyculmi nin: “Tayta Diosta licäpä śhaycaycachilmi limalicú mana wañuchinäpä” nil.

7Chaypïtam Jonatan Davidta ayalcamul lluy limaśhancunäta willaycula. Jinalculmi Saulman puśhaycuptin chayćhu David caśhan yanapänin caycula.

8Chaypïta Filisteo läducunäwan yapa pilyu talcüluptinmi David pilyamü lila. Chayćhu sumä-sumä camacäcuyaptinmi Filisteo läducunaca ayiculcäla.

9Ñatac Saul lansan apticüśha dispächunćhümi täcuyäla. Chayćhümi Tayta Diospa caćhamuśhan mana allin ispirituca yaycülun. Davidñatacmi arpanta tucayäla.

10Chayćhümi Saul lansanwan pilaman läcacüpa uycüluyta munala. Davidñatacmi juclla aśhüluptin lansaca piläman läbacacülun. Chaymi chay tuta David lluptïlul ayicula.

11Saulñatacmi nunancunacta caćhälun Davidpa wasinta walächi licapapämunanpä, jinal wäläluptin wañulächinanpä.

17Jinaptinmi Micalta Saul nin: “¿Imapïtá caynüpa ingañämanqui? ¿Imapïmá ćhïnicünïta caćhaycülunqui?” nil.

Niptinmi Mical: “ ‘Mana caćhaycamaptiquiꞌa wañuchishayquim’ nimälamari” nin.

18Chaynüpa David ayiculmi Rama malcacta Samuelman licula. Chayćhümi willaycula payta ima mana allinta Saul lulay munaśhantapis. Chaypïtam Samuelwan liculcäla Naiotćhu yaćhapämü.

19Saultañatacmi willaycälälin: “Rama lädup sircan Naiot malcaćhümi David cayäña” nil.

20Niptinmi Davidta puśhapämunanpä nunancunacta Saul caćhälun. Chayman ćhaycälilmi licälälin Samuelwan cusca willacücuna willacuyalcäta. Chayćhümi Saulpa nunancunaman Tayta Diospa Ispiritun ćhämuptin paycunapis willacuyta allacaycälin.

21Chayta Saul yaćhälulmi juc nunancunactapis caćhäla. Paycunapis willacuytam allacaycälila. Chaypïta quimsa cutictañam nunancunacta caćhala. Paycunapis chaynüllatacmi willacuyta allacaycälila.

22Chaypïtam quiquin Saul Rama malcaman licun. Chaymi Secu lädućhu cä püsuman ćhaycul tapupacun: “¿Mayćhümi Samuelwan David cacullan?” nil.

Niptinmi jucnin: “Rama lädup sircan Naiot malcaćhümi cayalcan” nin.

23Niptinmi Naiotta Saul licun. Chay lishanćhu paymanpis Tayta Diospa Ispiritun ćhäluptinmi willacuśhtin Rama malcap Naiotcama lila.

24Chayćhümi paypis müdananta juluculcul calalla willacücuyal Samuelpa puntanman cućhpälul tutay walächi pampäćhu ayllila. Chaymi cay limay cala: “¿Saulpis willacüñachun?” nil.