Proverbios 11 - Old Testament Quechua Wanca（QVW）

1Ingañacü balansacunacta Tayta Dios millachicunmi;

mana suwä balansactañatacmi ichá allinpä licaycun.

2Nunatucüca pinꞌayćhümi camacanꞌa;

mana nunatucücäñatacmi ichá yaćhayniyu canꞌa.

3Allin nunacunäta allin cayninmi allinpä puśhaycun;

juyu nunacunätañatacmi ichá quiquinpa mana allinnin pampaman muyuchin.

4Cäraycunan muyunćhuꞌa rïcu caypis manamá imapäpis bälinꞌachu;

allin tincüllanman cawsaycuycämi ichá wañuycäpi libraycamanchic.

5Allin tincüninman cawsayniyu nunäta allincämá allin caminup puśhaycun;

mana allin nunätañatacmi ichá quiquinpa mana allinnin palpachin.

6Tincüllanman cawsayninpamá allin nunacunaca libraculcan;

juyu nunacunäñatacmi ichá juchanćhu ćhänalapäcun.

7Juyu mana allin nuna wañucuptinꞌa chalapacuyninpis camacanmá;

ima cäninman chalapacuśhanpis chincacunmá.

8Ñacaycunapïta allin nunaca libraycuśhamá;

mana allin nunäñatacmi ichá chay ñacayman ćhulaycuśhalä canpis.

9Juyu nunacunäpa shimin nuna-masinta pampamanmi muyuchin;

allin nunacunäñatacmi ichá yaćhayninwan libraculcan.

10Allin nunacunaca allin caycäliptinꞌa malcaca cushicunmá;

mana allin nunaca wañucuptinñatacmi ichá malcaca cushicuypi lüyatityapäcun.

11Allin nunacunap allin cawsayninwanmá malcaca altuman juluycuśha;

juyu mana allin nunacunap shiminwanñatacmi ichá malcaca pampaman muyuchisha.

12Mana tantiayniyücämá lisinacuśhanta jamuyan;

tantiayniyücäñatacmi ichá upälla cacun.

13Waśhalima nunaca pacäśha cäcunätapis willapacunmá;

chalapacuna nunäñatacmi ichá ima willaycuśhantapis śhunꞌullanćhu uywaycun.

14Yaćhaywan mana puśhaycuptinꞌa malcaca mana allincämanmá ćhaycunꞌa;

achca limapaycücuna captinñatacmi ichá malcaca allin caycunꞌa.

15Mana lisinacuśhan nunacta garantiyalꞌa llaquimanmi ćhulacun;

mayantapis mana garantiyalꞌa jawcam cawsaycun.

16Allin śhunꞌuyu walmica allinpä licaycuśhamá capäcun;

juyu nunacunäñatacmi ichá sumä cäniyü-cama capäcun.

17Llaquipayniyu nunacunaca quiquintapis allintamá lulacun;

juyu nunäñatacmi ichá quiquillan mana allinninta ashicun.

18Juyu mana allin nunacunäpa ima talishanpis yanꞌal-yanꞌalpämá;

tincüninman allincäta luläcäñatacmi ichá mana camacä cäninta ćhasquiycun.

19Allin tincüllanman lulayca cawsaycämanmi ćhaycachin;

mana allin cawsaycäñatacmi ichá wañuyman puśhaycun.

20Juyu śhunꞌuyücunäta Tayta Dios millachicunmi;

allin cawsäcunätañatacmi ichá allinpä licaycun.

21Mana allin nunaca imayläpis rasunpa mućhuycachishamá canꞌa;

allin cawsäcäñatacmi ichá libraycuśha canꞌa.

22Mana tantiayniyu tuquish walmica cayan

cuchip sinꞌanćhu üru surtijanümi.

23Allin nunacunäpa munaynin allincällaćhümá camacan;

mana allin nunacunäpa munayninñatacmi ichá mana allinllaćhu camacan.

24Mayantañapis uycüca uycuśhanpïta mastalämi cällanman ćhasquiycälin;

quiquillanpä chalacuycücá imapïpis palpüśhamá cayan.

25Allin śhunꞌuwan uycücá imaćhüpis allinmá caycunꞌa;

nuna-masinta uycücá paypis uycuśhatacmá caycunꞌa.

26Cayäpuptinpis trïgucta quiquillanpä ćhulacuycücätá, malcaca mana allin cananpämá niycälin;

mana ćhulacuycul lanticücätañatacmi ichá allinpä licaycälin.

27Allin lulayta ashïcunacá allinpä licaycuśhamá canꞌa;

mana allincäta ashïcunätá mana allincällañamá aticaćhanꞌa.

28Imapis cäninman chalapacücá awïshanümá canꞌa;

allin nunacunäñatacmi ichá lanta tuqui chillquimuśhannülla wiñapämunꞌa.

29Wasinta tuquip mana licaycücá mana cämanmanmá muyuchin;

luclucá yaćhayniyücäpa uywayninmi licalin.

30Allin nunacunaca allin cawsaytamá wayuycälin;

yaćhayniyücá juccunactamá allinman puśhaycun.

31Allin nunaca cay allpällaćhülä allincäta ćhasquiyaptinꞌa,

maynüläćha juchasapacunäwan juyu nunacunacá tincüninman ćhasquiycälinꞌapis.