Isaias 2 - Old Testament Quechua Wanca（QVW）

Śhamü timpućhümi Tayta Dios mandacunꞌa Miq 4.1-3

1Juda lädu, Jerusalen malcanwan śhamü timpućhu imanuy cananpäpis Amozpa chulin Isaiastam Tayta Dios licachin:

2Śhamü timpucunäćhümi Tayta Diospa alawana wasin caśhan ulꞌuca,

mas allin puydïnin caycunꞌa.

Altunnin ulꞌucunäpïpis mas altunninmanlämari

juluycuśha canꞌa.

Chaymanmá lluy nasyuncunaca Tayta Diosta alawä śhapämunꞌa.

3Achca-achca nasyuncunapi śhapämulmi nipäcunꞌa:

“Acuchun, Tayta Diospa ulꞌunman,

Jacobpa Tayta Diosninpa wasinman lishun,

pay imanuy cawsanapä yaćhaycachimaptinchic

munaśhanmannu puliycunapä” nil.

Sionpïmá yaćhachicuyca yalaycamun;

Jerusalenpïmá Tayta Diospa limapäcuynin śhaycamun.

4Quiquin Tayta Diosmá lluy nasyuncunacta tincüninman cäraycunꞌa.

Paymá nasyuncunäpa ćhïninacuynincunacta allichaycunꞌa.

Jinaptinmi ispädancunactapis arädup rïjanmanña muyülächinꞌa;

lansancunactapis cüśhamanña muyülälichinꞌa.

Nasyun-pulapis manañamá pilyapäcunꞌañachu;

nïtac gïrrapäpis yaćhapaculcanꞌañachu.Nunatucücunäta mućhuycachinanpämi nin

5Jacobpa milaynincuna śhapämuy;

Tayta Diospa achquiyninćhüñari puliycuśhun.

6Awari, Tayta Diosmari malcayquita, Jacobpa milayninta caćhaycülun.

Chay inti ishpimunan lädupi apamuśha

custumricunawan shipuchicüśha cayalcaptinmá,

chaynütac inti jiꞌalpunaćhu cä Filisteo läducunänu rüjacuycunaćhu,

jinaman juc lädu nunacunawan limalinacälälisha cayalcaptinmari caćhaycülun.

7Cay Israel malca üruwan illaywan juntäśhamá cayan;

cänincuna mana camacaycuyñamá.

Cay malca pilyupä cä cawallucunawan juntäśhamá cayan;

carritancunapis mana camacaycuyñamá.

8Allpancunapis taytachacunawan juntäśhamá cayan.

Maquincunawan, dïduncunawan

lulaśhancunällamanmá uyshuycälinpis.

9Chaymi canan pinꞌayćhu capäcunꞌa;

lluy uyshulächisha capäcunꞌa.

Chayurá Taytay, amañari śhalcachiyñachu.

10Lluy nunacuna, Tayta Diospa

sumä manchay cayninpïtari aꞌacunäman pacaculcay;

allpacunäman śhaticaculcay.

11Nunatucüśha cäcunaca mana caśhanmanmá muyüchisha canꞌa;

nunacunäpa wäpu cayninpis uyshulächishamá canꞌa.

Chay muyunca quiquin Tayta Diosllamá altuman juluycuśha canꞌa.

12Sumä munayniyu Tayta Dios cäraycunanpämá,

unanchaśhan muyunnin cayan.

Chayćhümá lluy allintucücunäta, nunatucücunäta, puydïtucücunäta camacaycülunꞌa.

13Libano lädućhu altu-cama cedro ilucunänu cäcunäta,

Basanćhu sumä-cama encina ilucunänu cäcunätapis camacaycülunꞌamá.

14Chaynütac altu-altu ulꞌucunäta,

jatućhaćhä ulꞌunpalcücunätapis pampatälunꞌamá.

15Jatu-jatun türricunäta,

sumä-cama pilacunätapis cućhpächinꞌamá.

16Tarsis lädu sumä-cama barcunu cäcunäta,

allin-cama barcunu cäcunätapis camacaycülunꞌamá.

17Nunäpa nunatucuynin mana cämanmá muyunꞌa;

nunäpa wäpucaynin uyshulächishamá canꞌa.

Chay muyunćhu Tayta Diosllamá altuman juluycuśha canꞌa.

18Lluy taytachacunaca pampaman muyüchishamá canꞌa.

19Chaynu sumä manchay cayninpïta Tayta Dios cay pachäman

śhamuptinmi nunacunaca allpäpa

lälancunaman śhaticaculcanꞌa;

Tayta Diospa piñacuyninpïta, chuya-chuya

cayninpïtamari ulꞌucunäpa ućhcuncunaman śhaticaculcanꞌa.

20Chay muyunmá nunacunaca alawananpä

ürupïta, illaypïta quiquin lulaśhan taytachancunacta

ucuśhcunämanña, maśhucunämanña wicapaycälälinꞌa.

21Cay pachäta mućhuchinanpä sumä manchay cayninpi Tayta Dios

śhamuptin, ulꞌucunäpa ućhcuncunaman,

aꞌacunäpa lälancunamanmari nunacunaca śhaticaculcanꞌa;

Tayta Diospa piñacuyninpïta,

sumä-cama cayninpïtamari ayipäcunꞌa.

22Chayurá nunacunällaman amari chalapacuyalcaychu.

Paycuna mana ćhaniyu, jämaynülla pasacüllamá.