Ezequiel 7 - Old Testament Quechua Wanca（QVW）

Camacaycüśha canan timpu jananćhüña caśhantam willacun

1Chaypïtam Tayta Dios niman:

2“Am wañucülla nuna, sumä munayniyu Tayta Dios nishanta Israel läducunäman willacamuy:

“ ‘Lluy allpayqui camacaycüśha cananpä janayquićhüñamá cayan.

Jinantin nasyunniquip camacaynin cayllaćhüñamari cacuyan.

3Am camacaycüśha canayquipäpis ćhämuśhunquiñamá.

Sumä piñacuynïtamari amcunaman caćhaycämuśhä.

Imanuypis cawsaśhayquiman tincütamá cäraycuśhayqui;

millachicuy lulayniquicunapïtamá mućhuycachishayqui.

4Ñawïwan manañam licaycuśhayquichu nï llaquipaycuśhayquichu.

Aśhwanpamá mana allin cawsayniquipi,

millachicuy lulayniquipi camacaycüśhayqui.

Chaymi yaꞌa Tayta Dios caśhäta yaćhaycunqui’ nil.

5“Yaꞌa Tayta Diosmi ní:

“¡Sumä mana allinllamá imaypis mana pasaśhannu atinacuylla śhacayämun!

6¡Camacaycüśha canayquipä jiꞌacaycayämunñamá; janayquićhüñamá cacuyan!

¡Amcunap cuntrayquimá śhacayämun;

cayllaćhüñamá cacuyan!

7Cay nasyunćhu cäcuna, ürayqui ćhämunñamá.

Chay muyunniqui jiꞌacaycayämunñamá.

Timpuca janayquićhüñamá cacuyan.

Chay ulꞌucunäćhu manchacuyllañamá cacuyan;

cushicuycá chincacunñamá.

8Piñacuynïta amcunaman ćhaycachimuśhäñamá.

Chaynüpamari piñacuynïta pasächishä.

Mana allin cawsayniquimannümá cäraycuśhayqui;

amtapis muyüliniquićhu lluy cäcunätapis

millachicuy lulayniquimannümari camacaycüśhayqui.

9Ñawïwanpis manañam licaycuśhayquichu nï llaquipaycuśhayquichu.

Aśhwanpamá mana allin cawsayniquiman tincüta,

millachicuy lulayniquiman tincüta uycüśhayqui.

Chaymi yaꞌa Tayta Dios mućhuycachïca caśhäta yaćhaycunqui.

10“¡Licay! Chay muyunca ćhämunñamá;

janayquićhüñamá cacuyan.

Mana allincällañamari waytayan;

nunatucuycällañamari birdilayan.

11Supayapachinacuyca licalïmul mas-mastamá milachinpis.

Mana allinca camacäluptinꞌa amcunaćhu manañamá

imallapis quïdanꞌachu, nï wacchäpapis nï rïcüpapis.

Mana imayüllañamari chaycusca lluypis caycälinꞌa.

12Chay muyunca ćhämunñamá; chay üraca janayquićhüñamá.

Chayurá lantïca manañamá cushicunanñachu;

lanticücäpis manañamá waꞌananñachu.

Lluy nunacunämanñamá piñacuyní ćhaycun.

13Masqui lanticücunaca cawsayalcalpis

manañamá lanticuynincunaman imanuypa cutiycunanpäpis canñachu.

Tayta Diosmari imam lulanancäta niycun.

Chaytá manañamá mayanpis manalcachinmanchu.

Mana allin lulayninpïta manamari jucllayllapis cawsayniyu quïdaycunchu.

14“Chay jinantin nunacunämanmá sumä piñacuyní ćhaycun.

Chaymi lluy alistäśhaña cacuyaptinpis, gïrraman yalunanpä curnitillacta

tucamuptinpis nï yalapäcunchu.

15Malcap waśha lädunćhuꞌa pilyallañamá cayan;

lulićhuꞌa micuy wanaywan ishyaycunallañamá muyuyan.

Ćhaclaćhu cäcunaca ispädawanmi wañupäcun;

malca lulićhu cäcunäñatacmi micuy wanaywan ishyaywan camacapäcun.

16Waquin quïdäcunaca ulꞌucunämanmi ayipäcun.

Chayćhüpis juchancunapïmá ulpaynüpis

cücüyaśhtinnu awćhupäcun.

17Mana callpayüñamá licalipäcun;

manchacuypïmi unꞌulnincunapis chucchupäcun.

18Llaquicuypïmi shicacü müdanawan müdaculcan.

Manchacuypïtamá catcatapäcun;

pinꞌacuypïmá cärapis pucayacüśha-cama cacuyalcan;

ächantapis siplay-siplaytamá lutuculcan.

19“Illaynincunacta caminucunämanmá wicapapäcun;

ürupïtalä cäcunätapis mana bälï anlactanümá wicapälälin.

Chay illayninpis ürunpis Tayta Diospa

piñacuyninpïtá manamá salbaycunchu.

Chaycuna manamari micanaynintapis

pasachinchu nï maćhaycachinpischu.

Chay üruncuna, illaynincunamari mana allincäman jitalpälälin.

20Chay aläjancunawan nunatucülälilmari

anla taytachacunacta lulacälälin.

Chaymi chay aläjancunacta millachicuyman muyüchí.

21Chay cänincunacta mana lisisha nunacunäwanmi suwächí.

Juchasapa nunacunawanlämi waycächïpis.

Chaynüpamá chay aläjancunacta millachicuyman muyuchipäcun.

22Paycunapïta yaꞌa japächacuptïmari

sumä allin yaćhanäcäta millachicuyman muyuchipäcun.

Juyu nunacunaca yaycuyculmari jalutaculcal millachicuyman muyuchipäcun.

23“Chay nasyunćhu wañuchinacuycunallañamá cayan;

chay malcaćhu mana allincunallañamá timpuyan.

Chaymi paycunapä cadinacunacta alistaycunqui.

24Pasaypi chay juyu-cama nasyuncunätamari puśhayämú

wasiquicunacta pudiracaycälinanpä.

Sumä sigüru cayninwan nunatucuyninta chincächiśhämá;

chuyapa licapäcuśhan sityucunäpis millachicuyman muyüchishamá cayan.

25Camacaycüśha cananpä jananćhüñamá cacuyan.

Jawca cawsayta maynu ashipäcuptinpis llaquicuyllañamá cayan.

26Supayapachinacuycunallañamá atinacuylla jicutayan;

mana allin willacuycunallañamá atinacuylla muyuyan.

Yanꞌalñamá Tayta Diospa willacünintapis

ashipäcun willaycälinanpä.

Yaćhaycachï sasirdütipis manañamá canñachu;

limapaycälinanpäpis manañamá yaśhacunäpis canñachu.

27Mandacücäpis llaquicuywan ñitïshañamá cayan;

puydïcäpis jucmanyäśhañamá licalïlun;

jinantin malcäpis chucchuyalcanmá.

Imanuy cawsaśhanmannümari yaꞌa licaycuśhä;

imanuy lulaśhanmannümari yaꞌa cäraycuśhä.

Chaylämi yaꞌa Tayta Dios caśhäta yaćhapäcunꞌa” nil.