1 Cronicas 21 - Old Testament Quechua Wanca（QVW）

Davidmi sinsachin 2Sam 24.1-17

1Chaypïta israelcunäpa cuntran SatanaśhJob 1.6; Zac 3.1; Apo 12.10. śhalcülulmi, Davidta umachäla Israel caśhtacunäta sinsachinanpä.

2Chaymi Joabtawan malcap puydïnincunacta David nin: “Canan israelcunäman lipäcul Beersebapi aśhta Dancama sinsapämunqui, ayca nunacuna pilyananpä capäcuśhantapis yaćhanäpä” nil.

3Niptinmi Joab nin: “Mandacü taytallay, quiquin Tayta Dios malcanta canan caśhanpïtapis, paćhac (100) cuti mastalä milaycachichun. Ñatac taytallay, ¿¡manachun lluypis sirbïniquicuna cayalcá imamá!? ¿Imapätan sinsachiyta munanqui? ¿Imapätan israelcunäman mana allincunacta ćhäyächishun?” nil.

4Chaynu niyalpis mandacücäpa nishantam Joab lulaycunan cala. Chaymi jinantin israelcunäta sinsalcamul Jerusalenman cutimula.

5Chayćhümi ayca nuna capäcuśhantapis Davidman Joab willaycula. Jinantin Israelćhu juc millun paćhac walanga (1 100,000) nunacunam pilyananpä cacuña. Judaćhüñatacmi tawa paćhac anćhish ćhunca walanga (470,000) nunacuna caña.

6Ñatac sinsananpä mandacü camachishanca Joabpa mana allin captinmi, Levi, Benjamin ayllucunätá manaña sinsapäculañachu.

7Chaynu David sinsachishanca Tayta Diospa mana allin captinmi, israelcunäta mućhuycachila.

8Jinaptinmi Tayta Diosta David nin: “Jatun juchactam luclunu lulällá. Ama chaynu callaychu, cay nunallayquip juchanta pampachaycallämayꞌari” nil.

9Chaymi Davidpa tapucunan cä Gad nunacta Tayta Dios nin:

10“Davidman willaycamuy, yaꞌa Tayta Dios caynu nishäta: ‘Cay quimsa mućhuchicuycäpïta jucninta aclaycuy, chaywan mućhuchisha canayquipä’ ” nil.

11Niptinmi Davidman lilcul Gad nin: “Tayta Diosmi caynu nin: ‘¿Mayannintam aclanqui?

12¿Malcayquiman quimsa wata intïru micuy wana ćhämunantachun aclanqui? Ütac ¿ćhïnicüniqui quimsa quilla pilyućhu llallishunayquitachun aclanqui? Ütac ¿malcayqui quimsa muyun juyu ishyaywan mućhuchishä canantachun aclanqui? Chay juyu ishyaywanmari Tayta Diospa anjilnin jinantin Israel lädućhu camacaycülunꞌa. Chayurá sumäta tantiaycul aclaycuy, caćhamänïta imacta niycunapäpis’ ” nil.

13Niptinmi David: “Canan jatun llaquićhümi cacuyällá. Nunacunäpa maquinman palpunäpïtá mas allin canman sumä-sumä llaquipayniyu Tayta Diospa maquinman palpuycuymi” nin.

14Chaymi jinantin Israelman juyu ishyayta Tayta Dios caćhämuptin anćhish ćhunca walanga (70,000) israelcuna wañülälila.

15Chaypïta anjilca Jerusalenta camacaycüśha nicuyaptinmi, chay nunacunäta Tayta Dios caśhan llaquipaculcun. Chaymi anjilcäta nin: “¡Caćhaycuy! Amaña wañuchiychu” nil.

Tayta Diospa anjilnin cayäla, Jebus lädu Ornanpa ïran lädunćhümari.

16Chayćhu David licalcuśhanćhümi licälun, cay pachap altunninćhu Tayta Diospa anjilnin, ispädan apticüśha Jerusalen malcaman tucsilayämüta. Chaymi Davidwan puydï yaśhacunaca shicacü müdanawan müdacälälil, pampäcama cärantapis ćhulacaycälil unꞌulacaycälin.

17Jinacuyculmi Tayta Diosta David nicuyan: “Yaꞌami sinsachilá. Yaꞌami mana allinta lulaynïwan juchacülú. ¿Cay nunacunaca ima juchayümá capäcullan? Chayurá yaꞌactawan ayllücunactari mućhuycälichillämay. Cay malcayquiman amari juyu ishyay ćhaycamuchunchu” nil.

Uycuna patactam David śhalcachin 2Sam 24.18-25

18Chaypïtam Gadta Tayta Diospa anjilnin nin: “Jebus lädu Ornanpa ïranćhu, Tayta Diospä juc patacta David śhalcachipuchun” nil.

19Chaynu Gadwan Tayta Dios nichishanmannülla lulaycümi David lila.

20Ornanñatacmi trïgunta jaluyächil anjilcäta licälun. Tawan chulincunañatacmi pacacamü ayiculcan.

21Chayćhu David jiꞌacaycayämuśhanta Ornan licälulñatacmi jaluchishanpi yalalcamul, Davidpa puntanćhu pampäcama uyshucuycula.

22Chayćhümi Ornanta nin: “Cay ïrayquita lanticämay, Tayta Diospa juc uycuna patacta lulaycapunäpä. Wañuchicü juyu ishyayca malcäćhu śhaycunanpämi, ayca ćhanin caśhantapis pägaśhayqui” nil.

23Niptinmi Ornan: “Mandacü taytallay, lluy munaśhayquita chalay jinalla. Cañaywan uycunayquipäpis, cayćhu wäcacunapis cayanmi; walachinayquipäpis jurquitacunapis cayantacmi. Cayantacmari trïgupis uycunayquipä. Lluy-lluytamari uycullá” nin.

24Niptinmi mandacü David: “Dinbaldilla manamá canmanchu. Imam ćhaninman tincütam pägaśhayqui. Ampaćhuꞌa manamá Tayta Diospä cañaycapuśhächu. Manatacmi dinbaldilla talishätapis uycümanchu” nin.

25Chaynüpam Ornanpa ćhaclantawan uywanta süta paćhac (600) üruwan David lantila.

26Chayćhu David juc patacta lulayculmari Tayta Diospä cañaycapula, jinaman allin cawsaśhanpi uycunapä uycunactapis uyculmi mañacula. Jinaptinmi Tayta Dios uyaliycul uycuna patacman janay pachäpïta ninacta jiꞌalpachimula.

27Jinalculmi ispädanta ćhulalänanman anjilca cutiycachinanpä Tayta Dios nila.

28Chaynu Jebus lädu Ornanpa ïranćhu Tayta Dios uyaliycuptinmi, chayćhu David uycunancäta cañaywan uycula.

29Chay timpu chunyäcäćhu Moises lulaśhan Tayta Diospa carpanpis, uycuna pataccäpis Gabaon malcällaćhülämi cayäla.

30Ñatac Tayta Diospa anjilnin ispädanwan cacuyaptin manchälulmi, Gabaon malcaman tapucü David manaña liyta atipälañachu.