1Willacü Habacucmi taquishtin mañacun.
2 Tayta Diosllay, ampïta
uyalïlulmi sumä manchälú;
sumä lulayniquicunapi uyalilmi äśhalayllaman camälú.
Chaynu puntacta lulaśhayquinuꞌari cananpis lulaycullay,
cananpis camalaycachillay.
Llaquipayniyu caśhayquipi piñacuyniquićhu yalpalcullayꞌari.
3Teman lädupïtamá Tayta Dios śhayämun;
Paran ulꞌupïmá Chuya Cäca śhayämun. Selah
Sumä caynin janay pachätamá juntaycula;
jinantin cay pachäćhümá payta alawapäcula.
4Llipyayä räyunümá chipyala;
räyup achquinnümá maquinpïta yalayämula.
Chayćhümari sumä munaynin pacaläla.
5Ñawpänintamá wañuchicü ishyay puntamula.
Ipantañatacmi sumä ishyay atimula.
6Śhaycuycuptinmi jinantin allpaca catcatapäcula;
licalcuptinmi lluy nasyuncunaca chucchupäcula.
Unaypïña cä ulꞌucunäpis maśhtacaculcälamá.
Punta ulꞌunpalcücunäpis pampamanmá muyupäcula.
Cayninpamari Tayta Dios una-unaypïtaña pulila.
7Cusan lädućhu cäcunätam
pasaypi llaquićhu cayalcäta licälú.
Madian lädu carpaćhu cäcunätam
manchacuywan chucchuyalcäta licälú.
8 Tayta Diosllay, ¿mayucunäpächun piñacülanqui?
¿Sumä liyä mayucunäpächun rabyälanqui?
¿Śhunꞌuyquipis lamarcäpä timpuyaptinchun
cawalluyquicunaman sillacülanqui,
llallinayquipä cä carritayquicunamanpis ishpïlanqui?
9Flïcha ćhächicuyquita ćhulalänanpi julülanquiñamá.
Lluy flïchayquicunapis listu-listullañamá cacuyan. Selah
Mayucunäwanmá allpäta laꞌalächilanqui.
10Ulꞌucunaca amta licälälilmi chucchupäcula.
Tamyapis yacu jillpüśhanümá ćhämula;
lamarpis luli-lulipïtam apalishtinnu
altu-altuman mächicacamula.
11Flïchayquip llipyayninwan,
lansayquip sumä chipyayninwanmá
intïwan quilläpis chay caśhancällaćhu śhaycälälila.
12Sumä piñäśhamá jinantin allpäta muyuyämulanqui.
Sumä rabyäśhamá nasyuncunäta jaluypa pawälanqui.
13Malcayquita libraycümá yalamulanqui.
Aclacuśhayquita salbaycümá lilanqui.
Mana allin nunacunap mandacünincunactamá camacaycülanqui;
ćhaquinpi umancamamá calapatactanu caćhaycülanqui. Selah
14Sumä waywanu camacaycälälimänanpä
nunatucüśhamá pilyänincuna śhacayalcämula.
Camacaycüluyta, pampaman muyuchiyta
munacayalcämaptinpis yaꞌacuná imanaytapis manamá atipapäculächu.
Amñatacmi ichá quiquincunap lansancunawan
puydïninta waꞌachälanqui.
15Amꞌa cawalluyquicunawanmi lamarcäćhu jalutaculanqui;
yacucunäta pushumachishtinmá pulilanqui.
16Lluy caycunacta uyalïluptïmari almäpis licula.
Limaśhayquita uyalïluptïmi shimïpis chucchüla.
Aśhta tullümanpis ismuycämi yaycüla;
jinaptinmi chay caśhäcällaćhu chucchuyälá.
Ñatac yaꞌa jawcallam alcayäśhä
chay ćhïnimänïcunap llaquicuy
muyunnin ćhämunanta.
17Yaꞌa cushicuśhämi masqui ïgusca mana waytaptinpis;
üba lantap wayuynin mana captinpis,
ulïbuspa wayuynin ashlla captinpis,
ütac ćhaclacunaca imacta mana wayuptinpis,
ütac canćhaćhu uwishcuna mana captinpis,
ütac puñunancunaćhu wäcacuna
manaña captinpis cushicuśhämari.
18Chaynu mana captinpis
Tayta Diosćhümari yaꞌa cushiculläśhä;
salbaycamäní Tayta Diosćhümá cushicuśhä.
19 Tayta Diosmá pacaycamäní;
paymá ćhaquïtapis luychup ćhaquintanu lulaycaman;
jinalculmá altunnincunaćhu puliycachiman.
Cuirdayu tucanacunawan taquinapä; taquïcunap puydïninpämi.
Who We AreWhat We EelieveWhat We Do
2025 by iamachristian.org,Inc All rights reserved.
