Jueces 8 - Old Testament Quechua Wanca（QVW）

Mandacü Zebactawan Zalmunactam Gedeon llallin

1Chaypïta Efrain ayllucunämi Gedeonta piñapäcuyalcan: “¿Imapïtá Madian läducunäwan pilyä lipäcuśhayquita mana nipämälanquichu? ¿Imapïmi mana willapämälanquichu?” nil.

2Niptinmi Gedeon nin: “Yaꞌa Abiezer ayllup milaynin lulaśhäpïtá am Efrain ayllucuna lulapäcuśhayquica, ¿manachun mas allin caśhanta tantiapäcunqui imamá? Yaꞌa achcacta cusichayaptïpis am cusichaśhayquicunacá mas allinlämá cayan.

3¿Manachun amcunap maquiquimanlä Madian läducunäpä puydïnin Orebta, Zeebtapis Tayta Dios ćhulaycamula, imamá? Caynu lulapäcuśhayquiwan yaꞌapa lulaśhäta tincuycachishá manamari imapischu” nil. Chaynu Gedeon niptinmi Efrain aylluycunäpa piñacuynin tallpüla.

4Chay Gedeonmi quimsa paćhac (300) nunancunawan Jordan mayucta chimpälälin. Masqui sumä pishipäśha cayalcalpis ćhïnicünincunacta jinallalämi aticaćhayalcäla.

5Chaymi Sucot malcaćhu yaćhä nunacunäta Gedeon nin: “Ama chaynu capäcullaychu, cay nunäcuna piswalpuyalcanñam; imallayquitapis uycälillay. Madian läducunäpa puydïnin Zebacta, Zalmunacta ashïmi liyalcá” nil.

6Niptinmi Sucot malcap puydïnincuna nin: “¿Zebacta, Zalmunacta maquiquićhüñachun cayalcächinqui imamá, pilyäniquicunacta micachipäcunäpä?” nil.

7Niptinmi Gedeon: “Cananmi cacunqui, Zebactawan Zalmunacta Tayta Dios maquïman ćhulaycämuptinmi cutilcamul, amcunacta caśhacunawan, caśhayu jaćhacunawan aychayquita lluy lawćhälächiśhayqui” nin.

8Chaypïta Peniel malcaman ishpïlälilpis Sucot malcaćhu mañacuśhannüllam mañacula. Paycunapis Sucotćhu nipäcuśhannüllatacmi nipäcula.

9Chaymi paycunacta Gedeon nin: “Llallishäpi cutïmulmi cay türriquita pampäman muyüchishä” nil.

10Ñatac Zebawan, Zalmuna Carcor ulꞌüćhümi cayalcäla. Paycuna ćhunca pichayu walanga (15,000) cachacuncunallawanñam cayalcäla inti yalamunan lädupi śhamü pilyäcunaca. Paćhac ishcay ćhunca walanga (120,000) nunacunañamari camacaycüśha capäcula.

11Chay capäcuśhanmanmi Gedeon ishpila ćhaqui caminup inti jiꞌalpunan lädu Noba, Jogbeha malcacunäpa. Chayćhu jawca cayalcaptinmi unꞌaypi yaycaycälil allacaycälila.

12Jinaptinmi Madian läducunäpa mandacünin Zebawan Zalmuna ayiculcaptin Gedeon aticulcal chalälälila. Chayćhümi Madian läducunäpa lluy pilyänincunapis sumä-sumä manchäśha-cama wicta-cayta ayiculcäla.

13Chaynu llallilcul Joaspa chulin Gedeon cutiyämulmi Jeresta pasayämuśhanćhu,

14Sucot malcapi müsucta chalalcul tapucuyan. Chaymi chay müsuca Sucot malcap anćhish ćhunca anćhishniyu (77) puydïnincunap, yaśhancunap śhutincunacta isquirbiycul uycula.

15Jinaptinmi Sucot malcäman Gedeon yaycuycul jinantin malcäta nin: “¿Yalpayalcanquichun Zebapi, Zalmunapi limaptí pinꞌayman ćhulapämäśhayquita? Nunäcuna piswayalcaptin micuyta mañacuptí manam uycapämälanquichu: ‘Maquiquićhu manalä cayaptinꞌa ¿imanuypatan uyäśhayqui?’ nil. Cananꞌa ¡cayꞌari chay puydïcunaca!” nil.

16Nilculmi Gedeon chay Sucot malcap yaśhancunacta caśhayu jaćhacunawan, caśhacunawan lawćhäla. Chaynüpam mayan caśhantapis licachicula.

17Chaynütacmi Peniel malcap türrintapis pampaman muyulcachil lluy nunancunacta camacaycüla.

18Chaypïtam Zebactawan Zalmunacta Gedeon tapula: “Tabor malcaćhu wañuchipäcuśhayqui nunacunaca, ¿imanuymi capäcuña?” nil. Niptinmi paycuna nin: “Amnüllam capäcuña. Malcap mandacüninpa chulincunanüllam capäcuña” nil.

19Niptinmi Gedeon apalcaćhälun: “¡Wawꞌi-caśhäcunam capäcula! ¡Juc mamallapi capäcuśhätam wañülächinqui! Tayta Diospis yaćhanmi, paycunacta mana wañuchipäcuptiquiꞌa canan manaćh wañuchipäcucmanchu cala” nil.

20Nilculmi Gedeon mayur chulin Jeterta nin: “Canan, cay ishcayninta wañuchiy” nil. Ñatac Jeter chulinꞌa müsullalä calmi manchacul ispädanta mana jululachu.

21Jinaptinmi Zebawan, Zalmuna nin: “¡Umrica manamá ćhinaśhchu! ¡Umri calꞌa, má quiquiquiꞌari wañuchipämay!” nil.

Niptinmi Gedeon śhalculcul pulanta wañüchila. Jinalculmi camïllu uywancunap cuncanćhu aläja apaśhancunactapis lluy julucüla.

22Chayćhümi Gedeonta Israel caśhtacunaca nin: “Cay Madian läducunäpa maquinpïta libraycayalcämalꞌa caminaycüní amñari caycuy, chaynütac chuliquipis, willcayquipis caycuchun” nil.

23Niptinmi Gedeon nin: “Manam chulïpis nï yaꞌapis Israel caśhtacunap caminaycünin cämanchu. Tayta Diosllamari caminaycüniqui” nil.

24Nilcuśhanpïmi nin: “Ñatac mañaculcac ućhipämuśhayqui surtijacunapi, ariticunapi jucta-cama lluypis uycapämanayquitam” nil. Ismael läducuna capäculmari üru surtijayu-cama capäcula.

25Niptinmi nipäcun: “Allinmi; chaytá lluymi uycälishayqui” nil. Nilculmi chusicta maśhtaycälil chayman surtijacta ćhulaycälila.

26Chaynu apapämuśhan surtijam ćhälun ćhunca isunniyu (19) quïluman. Ñatac imaymana aläjacunaca, Madian läducunäpa murädu mandacünincunap fïnu müdanancunaca, jinaman camïllu uywancunap cullarnincunapis manañam fintaśhachu cala.

27Jinaptinmi chay üruwan Gedeon juc pichïructa lulalcachil Ofra malcanman ćhulächila. Chay pichïructa lluy Israel caśhtacunaca alawapäculmi Tayta Diosta ipanchälälila. Ñatac chay pichïrum Gedeonpäpis, chulincunapäpis cunca cuchuynin cala.

28Chaynüpam Madian läducunaca Israel caśhtacunäpa maquinćhüña capäcula; manañam umanta pallalcapäculañachu. Gedeon cawsaśhancama tawa ćhunca (40) watam jawcallaña israelcunäćhu cala.

29Joaspa chulin Jerobaalwan śhutichäśhan Gedeonmi wasinman cuticul chayćhu yaćhala.

30Paypa achca walmin captinmi chulincuna anćhish ćhunca (70) cacula.

31Gedeonpa chulin calam Shiquem malcaćhu cä chuli waćhäninćhüpis; paytam Abimelecwan śhutichäla.

32Chaypïta Joaspa chulin Gedeonmi anchap yaśhaña wañucula. Paytam taytan Joaspa pampaläśhancäman pampapäcula. Chay cala Abiezer caśhtacuna caśhan Ofra malcaćhümi.

33Chaynu Gedeon wañucuptin-pacham Israel caśhtacunaca Tayta Diosta caćhaycälil waticacuyta caśhallan allacaycälila. Baal taytachacunap ipanta pasaculcalmari Baal-berit taytachactaña diosninpä aclacälälila.

34Muyülïninćhu lluy ćhïnicünincunapïta Tayta Dios libraycuśhantapis unꞌälälilañam.

35Israel caśhtacunaca manañamari Jerobaal ayllucta allinpañachu licapäcula; Gedeonpa lluy allin lulaśhancunätapis manañamá yalpalcälilapischu.