1Chaypïta Tayta Diosmi niman:
2“Wañucülla nuna, Seir ulꞌuman ñawiquita ćhulaycul chaypa cuntran willacamuy.
3Caynümi Tayta Dios niyäśhunqui:
“ ‘Seir ulꞌu, ampa cuntrayquim cayá.
Ampa cuntrayqui maquïta ćhulayculmi
pasaypi chunyäman muyüchishayqui.
4Malcayquicunactam pampaman muyüchishä;
pulumäśhañamá quïdanqui.
Jinaptïmari yaꞌa Tayta Dios caśhäta yaćhapäcunqui.
5“ ‘Amcuna, Israel läducta imaypis ćhïnipalmi cuntran capäculanqui. Paycuna juchanpïta mućhuycachisha cayalcaptinpis amcuná ispädawanlämari camacaycälälilanquipis.
6Chaymi yaꞌa Tayta Dios rasunpa cawsaśhänu ní: Amta wañuypa maquinman ćhulaycuptïmá wañuyca aticaćhaśhunqui. Wañuchiycäta “ama-pacha” nishayquipïmá wañuycällaña muyupayäśhunqui.
7Seir ulꞌucta pasaypi chunyämanmi muyüchishä. Chaypi ayïcätapis, cutimücätapis camacaycüśhämari.
8Chay ulꞌuyquicunaman wañüśha pilyäniquicunactamá maśhtaypa maśhtaycüśhä. Pampacunäćhu, ulꞌunpalcücunäćhu, wayucunäćhu ispädawan wañüśha nunallañamá maśhtaläculcanꞌa.
9Pasaypipämá pampaman muyüchishayqui. Malcayquicuna manañamá imaypis śhalcachishachu canꞌa. Chayćhümi Tayta Dios yaꞌa caśhäta yaćhapäcunqui.
10“ ‘Anmi nilanqui: “Masqui Tayta Dios cay ishcaynin nasyuncäćhu cayaptinpis yaꞌapamá ishcaynin nasyunca allpantin-cama canꞌa. Yaꞌamá pudiracuycuśhä” nil.
11Chaymi yaꞌa Tayta Dios rasunpa cawsaśhänu niyá: Israelta ćhïnicuywan, piñacuywan, rabyacuywan lulaśhayquinümá yaꞌapis amwan lulaycuśhä. Chaynu mućhuycachiptïmá mayan caśhätapis israelcunaca lisipämanꞌa.
12Chayćha Israel ulꞌucunap cuntran jamuyayniquiwan limaśhayquita, yaꞌa Tayta Dios uyalishacta, am yaćhaycunqui. Anmari nilanqui: “Pulumäśhañamá cacuyan. Cananmi ichá lacsacalpuśhun” nil.
13Chaynu nunatucüśha nipämäśhayquita, nunatucüśha cuntrá limayta ćhapapäcuśhayquita, yaꞌa uyalilämari.
14“ ‘Chaymi yaꞌa Tayta Dios niyá: Am Edomta pampaman muyüchiptí lluy nasyuncunamá cushiculcanꞌa.
15Awari, maynümi aclacuśhá Israel läducunaca pampaman muyüchisha captin cushiculcälanqui, chaynümi am Seir ulꞌupïta yaꞌapis cushicuśhä. Rasunpa jinantin Edom läduwanmá am camacaycüśha capäcunqui. Chayćha yaꞌa Tayta Dios caśhäta Israel lädu yaćhapäcunꞌa’ nil.
Who We AreWhat We EelieveWhat We Do
2025 by iamachristian.org,Inc All rights reserved.
