Oseas 6 - Old Testament Quechua Wanca（QVW）

1Malcamasïcuna, acuchun Tayta Diosman cutiycuśhun.

Paymi camacaycämälanchic; paytacmi allinyaycachimäśhunpis.

Paymi dañädümälanchic; paytacmi jampiycamäśhunpis.

2Ishcay muyunllactamá pay cawsapacächimäśhun.

Quimsa muyuncätá śhalcächimäśhunñamá.

Chayćha paypa puntanćhu cawsaycuśhun.

3 Tayta Diosta lisiycuyta callpanchacuśhunꞌari.

Maynümi intica mana jamaycul walan-walan yalaycamun,

chaynümi Tayta Diospis yaꞌanchicman yalaycamunꞌa.

Maynümi tamyaca cay allpäman imaypis ćhaycamun,

chaynümi Tayta Diospis yaꞌanchicman ćhaycamunꞌa.

Maynümi allpacta acutaycachinanpä punta tamyaca tamyamun,

chaynümi paypis ćhaycamunꞌa.

4Tayta Diosmi nin: “Israel, ¿imactamá amwan lulaycuśhä?

Juda, ¿imactamá amwan lulaycuśhä?

Amcunap chalapacuna cayniqui wäla pucutaycänüllamá,

ütac wälanpa cä śhullipaycänüllamá pasacülla cayan.

5Chaymi willacücunäwan ticshiy pawälälilac;

shimïwanmi, limaynïwanmi wañülälichilac.

Cäraycuyní räyunümi camacaycüśhunqui.

6Rasunpa cuyamänayquitamá yaꞌa muná,

manamá śhunꞌüta suwaycalimänallayquitachu.

Lisipämänayquitamá yaꞌa muná,

manamá cañaywan uycunacta uycälimänallayquitachu.

7Ñatac paycuna limalicuśhäta Adannümá jalutacälälin.

Chaynümari yaꞌacta ipanchäläliman.

8“Galaad malcaćhu, mana allinta lulä nunacunallamá timpuyan;

yawarllawan chapunacüśhamá cayalcan.

9Awaytayalcä suwacunänümá

achca sasirdüticuna juntunacüśha alcayalcan.

Shiquem läducta lï caminućhümá wañuchipäcun,

pinꞌay anla lulaycunacta lulapäcun.

10Israel lädućhu millachicuy lulaycunactamá licalá:

Efrain waticacuśhanta,

Israel pasaypi anlatacuśhantamari.

11Juda, ampäpis cusichactanümá mućhuycachinacpä listu alcayächic.