Daniel 6 - Old Testament Quechua Wanca（QVW）

Liyuncuna wićhaläśhanmanmi Danielta jitaycachin

1Mandacü Dariom paćhac ishcay ćhunca (120) puydï yanapänincunacta jinantin nasyunćhu yanapänanpä ćhulala.

2Chay puydïcunäpa mas puydïninpä quimsactam ćhulaycula. Cay quimsanmanmi puydï yanapäcunaca ima lulaśhancunactapis niycälinan cala. Chaynu ćhulaycula mandacücäpa mandacuynin allinlla caycunanpämá. Chay quimsan puydïcäpïta jucninmi Daniel cala.

3Ñatac Danielꞌa sumä yaćhaywan ima licaycuśhancunaćhüpis lulaycuśhanpam lluy puydïcunäpïpis mas allin caycula. Chaymi mandacüca jinantin nasyunpa puydïninpä ćhulaycuyta munala.

4Chaymi chay puydï yanapäcunäwan puydï-masincuna Danielta tumpapäcunanpä lulayninćhu ima mana allinllactapis ashiycapäcula. Ñatac Daniel chalapacuna nuna calmi ima lulayllanćhüpis cällanman, tincüllanman lulaycula. Chaymi ima mana allinllactapis mana talipäculachu.

5Jinalmi nipäcun: “Cay Danielćhuꞌa manamá imallatacpis tumpaycunapä talishunchu. Aśhwanpa Tayta Diosninpa camachishancunapïtam tumpaycuchwan” nil.

6Ninaculculmi Danielpa puydï-masincuna, chay puydï yanapäcunäwan mandacücäman lipäcula. Ćhayculmi nipäcun: “¡Mandacü tayta Dario, wiña-wiñaypä cawsachun!

7Cay mandacuyniquićhu cä yaꞌa puydïcunaca, puydï yanapäniquicuna, caminaycüniquicuna, lluy-lluymi limanacälälí am mandacüní juc camachicuyta jululcul tacyalpachinayquipä. Chay camachicuyćhu ninꞌa, quimsa ćhunca (30) muyuncama amllacta mañacapäcuśhunayquipämi. Sïchuśh mana cäsucuycul juc nunacta ütac taytachacta alawäcätá liyuncuna caśhanman wicapalpüśha cananpä camachiy.

8Chaynu niyäta jululcul firmaycüluy camachicuy cananpäña. Chayćha Media, Persia läducunäpa camachicuyninnüña ipaman mana cutichishañachu canꞌa” nil.

9Nipäcuptinmi chay camachicuyman mandacü Dario firmäla.

10Chay camachicuyta mandacüca firmaśhanta yaćhälulmi Daniel wasinman licul cuartunman yaycucuycula. Chay cuartunpa bintanan Jerusalen läduman licalayäcätam quićhaycula. Chayćhümi unꞌulacuycul Tayta Diosta alawaycula, mañacula. Chaynümari quimsa cuti walan-walan unaypïta lulaycuśhannu lulaycula.

11Ñatac cuntran cä nunacunaca ćhälälimulmi Danielta talïlälin, Tayta Diosninta mañacuyäta.

12Chaymi mandacücäman pasaculcan caynu niycälimü: “Mandacü taytay, ¿manachun juc camachicuyta camachilanqui imamá? ¿Manachun quimsa ćhunca (30) muyuncama amllacta mañacapäcuśhunayquipä camachisha cala imamá? ¿Manachun mana cäsucuycul juc nunacta ütac taytachacta mañacücätá liyuncuna caśhanman wicapalpüśha cananpä camachisha cala imamá?” nil.

Niptinmi mandacüca: “Aw, chaynümari cayan. Cay camachicuyca Media, Persia läducunäpa camachicuyninnüñamá ipaman mana cutichishañachu canman” nil.

13Niptinmi paycuna: “Juda lädupi prïsu puśhamuśhan Danielmi am mandacünïta mana cäsucuśhunquichu; camachishayquita manamá imapis ucunchu. Aśhwanpa Tayta Diosninman jinallam quimsa cuti muyuncäćhu mañacuyan” nipäcun.

14Chayta mandacüca uyalïlulmi sumä llaquicülun. Chaymi Danielta imanuypapis salbaycuyta munala. Chaymi inti yaycunancama libraycuyta imanuypapis ashiycula.

15Ñatac Danielpa cuntran nunacunämi mandacücäman lilcälil: “Mandacü taytallay, tuquictam yaćhanqui Media, Persia läducunäpa camachicuyninchiccuna firmäśha cayalꞌa ipaman manaña cutichisha cananta” nicuyalcan.

16Nipäcuptinmi Danielta puśhalcachimul liyuncuna wićhaläśhancäman mandacüca jitaycächila. Ñatac manalä jitaycäliptinmi mandacüca nin: “Daniel, imaypis sirbishayqui Tayta Diosniquim salbaycuśhunqui” nil.

17Chayćhu Danielta jitayculmi jatun lumiwan liyuncuna caśhanta wićhaycüla. Jinalculmi chay lumicta mandacüca anilluwan sïllaycula. Chaynütacmi puydï yanapänincunap anillunwanpis sïllaycula camachicuyćhu nishanmannu Danielpa cuntran lulaycuśha captin, mayanpis imanaytapis manaña atipänanpä.

18Jinalcul mandacüca palasyunman cuticulmi puñunanmanpis mana micuśha-ima yaycucuycun. Tucanacta tucäcunäpis manañamá tucalachu. Tutay walächi mana puñuśhamá achicyälunpis.

19Wäläluptin-pacham mandacüca śhalcuculcul liyuncuna wićhaläśhancäman mana-mana pasacun.

20Jiꞌaycuyalmi llaquisha ayaycaćhacuyan: “Cawsä Tayta Diosta sirbï Daniel, ¿imaypis sirbishayqui Tayta Diosniqui liyuncunäpi salbaycuśhunquichun?” nil.

21Niptinmi liyuncuna wićhaläśhancäpi Daniel nin: “¡Mandacü taytallá, wiña-wiñaypä cawsachun!

22Tayta Diosnïmi anjilninta caćhaycamul mana imanapämänanpä liyuncunäpa shiminta wićhälun. Tayta Dios tuquictamá yaćhan mana juchayu caśhäta. Am mandacünïpa cuntranpis manamá ima mana allinllactapis lulayculächu” nil.

23Chayćhu mandacüca sumä cushicülulmi chay wićhaläśhancäpi Danielta julachimula. Julälälimuptin manamá ima lapćhiycuśhallapis cañächu. Payꞌa Tayta Diosninmanmari chalapacula.

24Chaymi Danielta yanꞌalpi tumpäcunäta mandacüca puśhalcachimul liyuncuna wićhaläśhancäman jitaycächila walmintinta, chulintinta. Paycuna pampäman manaläpis ćhäpäcuptinmá liyuncunaca paćhcalcälil tulluncunactapis lapaćhaćhyaylla caćhucalpälin.

25Chaypïtam mandacü Dario jinantin malcacunäman, nasyuncunäman, imaymana limayta limäcunäman cay camachicuyta apachila: “¡Jawca allin cawsay lluypa cachun!

26Camachilá jinantin mandaśhá malcacunaćhu lluy nunacuna, Danielpa Tayta Diosninta altuman julaycälinanpämi.

“Pay cawsä Tayta Diosmá.

Payꞌa wiña-wiñaypä cayäcämá

Paypa gubirnun manamá imaypis camacaycüśha canꞌachu.

Paypa munaynin chaynüllamá imaypis caycunꞌa.

27Paymi salbaycun, libraycun.

Payllam imaymana milagrucunacta

cay pachäćhüpis, janay pachäćhüpis lulaycun.

Paymá liyuncunap shiminpïta

Danieltapis libraycula” nil.

28Chaynüpam Daniel allin puydï cala Dario mandacü cayaptin, jinaman Persa lädup mandacünin Ciro cayaptin.