1Niptinmi Job nin:
2“Cunsuylaycamänayquipä
cay limaśhätari sumäta uyaliycamay.
3Limaycuśhäcama uyaliycälimayꞌari;
chaypïtá masqui asipäcalcämaypis.
4“Tayta Diosmanmi yaꞌa quijacú, manamá nunacunällamanchu.
Jawca mana cayänäpä rasunní canmari.
5Sumäta licaycälimay, äśhalayllaman camapäcuy,
shimiquitapis chapacuycul licapayllaman camapäcuy.
6Aśhta yaꞌapis cay ninäcäta tantiayculꞌa sumä-sumätamá
manchalí, aychäpis shillillinyanmá.
7“¿Imapïtá mana allin nunacunaca yaśhayänancama
allin cawsapäcul, mas cäniyu-camalä capäcunpis?
8¿Imapïmá chulincuna, willcancuna lädunćhu
allin wiñaycälishantapis paycuna licaycapäcunlä?
9¿Imapïtá wasinćhu manchacuycäpis mana caycunchu?
¿Imapïmá Tayta Diospa piñacuyninpis mana ćhaycunchu?
10¿Imapïmá wäcancunapis alli-cama padrillucunalla?
¿Imapïtá ćhinancunapis mana śhullupäcü-cama?
11¿Imapïmá chulincunapis uña uwishcunanu
paćhcalcul-paćhcalcul awsaculcan?
12¿Imapïtá cushisha-cama tinyawan,
arpawan, pincullucunawanlä paćhcaycaćhapäcunpis?
13¿Imapïtá cushisha allinlla cawsapäcun?
¿Imapïtá allinlla wañuycämanpis ćhäpäcun?
14Chaynu cawsapäcun masqui Tayta Diosta caynu niyalcalpis:
‘Ama piñachipämaychu; ima munaśhayquitapis manamá yaćhayta munapäcüchu.
15¿Mayantá sumä munayniyüca sirbiyalcänapä?
¿Imactamá julucunchic payta mañacuśhanchicwan?’ nil.
16Má, paycuna tantiapäcun imapis alli cänincuna quiquincunallapi śhamuśhantamá.
Chaynu pinsaśhancunactanuꞌa manamá uchuyllapis yaćhaycuyta yaꞌa munächu.
17“¿Imaytá mana allin nunacunäpa achquin wañuycula?
¿Imaytá mana allinca paycunaman ćhaycula?
¿Imaytá piñacuyninćhu Tayta Dios ñacaycachila?
18¿Imaytá waywa apaśhan päśhanu capäcula?
¿Imaymá sumä wawya apaśhan amunu capäcula?
19“Limaycämi nin: ‘Papäninpa juchanpïtamá chulincuna mućhuchisha’ nil.
Aśhwanpa quiquin jucha luläca mućhuchisha cachun yaćhaycunanpä.
20Ñacayninta ñawinwan quiquin licaycuchun.
Sumä munayniyücäpa piñacuyninta upyaycälichun.
21Chay nunaca ash muyunllaña wañucunanpä cacuyaptinꞌa,
manañamari quïdä aylluncunapi imapis ucunchu.
22“Ñatac ¿mayanmá Tayta Diosta yaćhaycachinman
janay pachäćhu cäcunätapis cäraycüca pay cayaptinꞌa?
23Waquincunamá timpullanćhu cayalcal wañuculcan;
imapapis janallanćhu jawca cayalcal,
24allinlla cayalcal,
aychanpis śhaśhay-śhaśhay cayalcalmi liculcan.
25Waquincunañatacmi quiquinpa piñacuyllanćhu cayalcal,
allin cawsaycuytapis mana talil wañupäcun.
26Imanuy cacuptinpis pulanpis allpäpa śhunꞌunćhümá camacapäcunꞌa;
ishcayninpis culup micüśhamá camacapäcunꞌa.
27“Má, tuquictamari yaćhayá imacunacta śhunꞌuyquićhu uywapäcuśhayquitapis;
cuntrá imacunacta pinsapäcuśhayquitapis.
28‘¿Mayćhütá cay nunatucü rïcüpa wasin cayan?
¿Imatá pasälun cay mana allincunäpa wasinwan?’ nipäcunquimá.
29Chaynu niyal, ¿imapïtá caminunpa pasäcunällactapis mana tapuculcanquichu?
¿Imapïtá paycunap limaśhallantapis mana uyaliycälinquichu?
30Paycunapis: ‘Mana allin nunacunacá mućhuchicuy
muyunpïta libraculcanmi;
piñacuy muyunpïta salbaculcanmi’ nipäcuśhunquimari.
31¿Mayantá cawsaynin imanuy caśhantapis cäranćhu niycun?
¿Lulayninman tincüta mayantá mućhuycachin?
32Wañucuptinpis sumälämá pampapäcun;
sipultüranćhüpis täpapäcunlämá canpis.
33Pampamüpis achca-achcalämá liwshipäcun;
jinantin malcantinmá cumpañapäcun,
allpa lulićhu jawcalämá jamapäcunpis.
34“Chayurá ¿shimiqui chalaśhallanwanchun cunsuylayta ćhapayalcämanquiman imatá?
Ima nipämäśhayquipis janä shimillayquiwanmá cayan” nil.
Who We AreWhat We EelieveWhat We Do
2025 by iamachristian.org,Inc All rights reserved.
