1Cawsayllay, llapan cawsayniquiwan Tayta Diosta altuman juluycuy.
Llapan callpayquiwan chuya Tayta Diospa śhutinta altuman juluycuy.
2Cawsayllay, llapan cawsayniquiwan Tayta Diosta alaway.
Lluy uycuśhuśhayquicunacta amari jucllantapis unꞌaycuychu.
3Paymá lluy juchayquicunactapis pampachaycuśhunqui.
Lluy ishyayniquicunactapis paymá allinyaycachishunqui.
4Paymá wañuycäpïta libraycuśhunqui.
Paymá llaquipaynintawan cuyacuyninta juntaycachishunqui.
5Śhunꞌullay, munaśhayquicunacta allincunäwan paymá jawcayaycachishunqui.
Ancactanümá jacyay-jacyay sumä müsuctanu muyuycachishunqui.
6 Tayta Dios tincüninman-camamá cäraycun.
Usuchisha cäcunäta paymá tincüninman-cama licaycun.
7Pay imanuy caśhantapis Moisesmanmá lisiycachila.
Lulaynincunacta Israel malcanmanmá camalaycachila.
8 Tayta Diosꞌa cuyacuyniyümi, llaquipayniyümi.
Ñacayta piñacü, ancha-anchap llaquipayniyümá.
9Anyälulpis manamá pasaypipächu anyämanchic.
Piñacülulpis manatacmá pasaypipächu piñacülun.
10Mana allin lulayninchicmannüchu manamá lawćhaycamanchic.
Juchanchicmannüchu manamá mućhuycachimanchic.
11Cay pachäpi altu-altu sïlücamanu mana camacaycütamá
altunninman juluycünincunacta cuyan.
12Inti ishpimunanpi aśhta inti chincalpunan camamannülämi
juchanchiccunacta ñawi chincaycuycama wicapälun.
13Cäsucünincunacta sumämi llaquipaycun.
Juc tayta chulinwan tuqui cuyaywan caycuśhannümá cayan.
14Pay tuquictamá yaćhan imallapi luläśha caśhanchictapis.
Pay sumätamá lisiyan allpallapi caśhanchicta.
15Nunacunäpa cawsayninꞌa ulanüllamari cayan.
Puluncunäćhu wayta wiñäcänüllamá cayan.
16Waywa licalïmul chincächinmá.
Manañamá mayćhu caśhantapis yaćhanñachu.
17Ñatac Tayta Diospa llaquipayninꞌa
cäsucünincunäpämi wiña-wiñaypä cayan.
Tincüninman licaycuyninꞌa lluy milaynincunapämi cayan.
18Caynu caycunꞌa yaćhachicuynincunacta cäsucücunäwanmá.
Limalicuynincunacta mana unꞌallal cäsucücunäwanmari.
19 Tayta Diosmi dispächunta janay pachäćhu tacyaycachin.
Lluy ima cäcunäpis maquillanćhümá cayan.
20Willacünin anjilcuna, Tayta Diosta alawapäcuy.
Nishuśhayquita luläcuna, payta alawapäcuy.
21 Tayta Diospa sirbïnincuna, payta altuman julaycäliy.
Paypa munaśhanta lulä sirbïnincuna, alawaycäliy.
22Jinantin allpäćhu lluy lulaśhancuna,
mayćhu calpis Tayta Diosta alawapäcuy.
¡Cawsayllay, ampis llapan cawsayniquiwan Tayta Diosta altuman juluycuy!
Who We AreWhat We EelieveWhat We Do
2025 by iamachristian.org,Inc All rights reserved.
