Daniel 11 - Old Testament Quechua Wanca（QVW）

1“Medo lädu Dario, wamä wata mandacuyninćhümi anjil Miguelta callpanchaycul yanapälá.

2“Cananmi rasuncäta lisiycachishayqui. Persia lädućhu quimsa mandacülämi canꞌa. Tawa mandacücäñatacmi chay quimsacunäpïta mas-mas cäniyüman muyülunꞌa. Chaynu cäninman atinïdum juccunäta jicutapanꞌa, Grecia lädup cuntran śhalcapäcunanpä.

3“Chaypïtam pilyapä sumä ishpisha-ishpisha cä mandacü śhalcamunꞌa. Paymi nasyuncunäta maquinćhu caycachil munaśhanta lulanꞌa.

4Chaynu gubirnun śhalcächisha cacuyaptinmi tawa läduman laquicaculcul lluy chiꞌilälinꞌa. Chay gubirnun manañam milaynincunaman uycuśhachu canꞌa. Manañatacmá punta caśhannüñachu sumä munayniyu canꞌa. Mandacuyninta sapipi chutalculmi juccunap maquinman ćhulaycuśha canꞌa.

5“Sur lädu mandacücämi mas callpayüman muyunꞌa. Ñatac jucnin puydïninmi paypïta mas allin munayniyüman licalïlunꞌa. Chaypa mandacuynin sumä-sumämá cacunꞌa.

6“Watacuna pasäluptinñatacmi limanaculcanꞌa, sur lädu mandacücäpa wamla chulinta, nurti lädu mandacücäwan casarachinanpä. Chaynu limanacälälilmi jawca allinllaña cawsapäcunꞌa. Ñatac chay wamla chulinpis wayapanpis limanacuśhanćhu manamá tacyaycunꞌachu. Chay wamla, wawintin, wayapantin, täpänin nunantinmá ipanchäśha capäcunꞌa.

7Ñatac walmip jucnin ayllunmi pilyänincunawan nurti lädu mandacücäpa cuntran śhalcapäcunꞌa. Mandacücäpa sumä sigüru cä malcanman yaycuyculmari paycunawan pilyapäcul llallipäcunꞌa.

8Egipto lädumanmari fundïsha taytachancunacta, ürupi illaypi cänincunactapis apaculcanꞌa. Chaypïta achca watacamam nurti lädu mandacücäwan achäquicta mana ashinacullal jawca tïpupaycälinꞌa.

9“Chaypïta nurti lädu mandacüca sur lädu mandacücäpa cuntranmi śhalcunꞌa. Ñatac malcanman mana imayümá cuticulcanꞌa.

10Chaypïta nurti lädu mandacücäpa milaynincunam achca-achca pilyänincunawan malluypa-mallul sur läduman lipäcunꞌa. Jinalmi llülla apaśhancänu imactapis camacaycuśhtin sumä sigüru caśhancäman ćhäpäcunꞌa.

11“Chaymi sur lädu mandacüca sumä piñacülul, nurti lädu mandacücäwan pilyä yalunꞌa. Masqui nurti läduca achca-achca pilyänincunawan liyalcalpis pasaypi llallïshamá capäcunꞌa.

12Chaynu llallishanwanmá chay sur lädu mandacüca sumä-sumä nunatucunꞌa. Ñatac achca-achca pilyäcunacta wañuyächiptinpis munaynin manamá unaypächu tacyaycunꞌa.

13“Chaypi achca watapïñatacmi nurti lädu mandacüca caśhanñatac pilyä yalunꞌa. Chayćhuꞌa puntapïpis mas-mas pilyäcunawanñam, mas armancunawanñam sur läduwan pilyä lipäcunꞌa.

14“Chay timpu sur lädu mandacücäpa cuntran achca-achcam śhalcapäcunꞌa, aśhta juyu-cama malca-masiquicunapis cuntranmá śhalcapäcunꞌa. Ñatac manamá llallipäcunꞌachu. Chaynüpamá suyñuyninćhünu licaśhanca lulacacunꞌa.

15“Chaypïta nurti lädu mandacüca śhalcamulmi malcap muyülïninman allpacta juntuycunꞌa. Jinalculmi sumä murälläśha malcaman yaycälälinꞌa. Sur läducunäñatacmi alli-cama pilyänincunawanpis nï śhaycachipäcunꞌachu.

16Nurti lädu yaycü pilyäcunämi munaśhanmannu lulapäcunꞌa. Manamá mayanpis śhaycachiyta atipanꞌachu. Aśhta sumä cuyayllapa cä allpaćhüpis taycacaycälilmi maquinćhüña lluy cachinꞌa.

17Chay mandacüca jinantin sur läducta, chalacuycuyta munayninwanmi sur lädu mandacücäwan limalinaculcanꞌa. Chaymi nurti lädu mandacüca jucnin wamla chulinta sur lädu mandacücäwan casarachinꞌa. Chaynu lulaycunꞌa sur lädu mandacücäpa gubirnunta camacaycünan-laycumá. Ñatac munaśhanmannüchu manamá yaluycunꞌa.

18“Chaypïta chay nurti lädu mandacüca lamarpa pantanćhu cä malcacunätapis munapalmi achca malcacta llallilcul chalacuycunꞌa. Ñatac chay nunatucuyninta juc malcap pilyänincunap jucnin puydïninmá llallilcul pinꞌayman ćhulaycülunꞌa.

19Jinaptinmi nurti lädu mandacüca sumä sigüru caśhancäman cuticunꞌa. Ñatac mana atipaculculmi supayapälunꞌa; pasaypiñamá chincacunꞌa.

20“Paypa pudirnin jucñamá śhalcunꞌa. Paymi alcabälacunacta mañachinꞌa gubirnun alli cäniyu cananpä. Ñatac chay mandacüca ishcay quimsa muyunllapïmi wañüchisha canꞌa; manamá piñanacuyćhüchu nï pilyaćhüchu wañunꞌa.

21“Paypa pudirninꞌa manamá mandacüpa milayninpïchu canꞌa; aśhwanpam licayta mana munaśha, juyu nuna śhalcunꞌa. Ñatac nasyunca allin jawca cayalcaptinmari articuyllanwan mandacüman yaycülunꞌa.

22Paymá llüllanu mayan cuntran śhalcünincunactapis pichaypa-pichaycülunꞌa; lluy-lluymá camacaycüśha cacunꞌa; aśhta Tayta Diosta sirbï sasirdütipis wañüchisham canꞌa.

23Paywan limalinaculcäśhancunactapis ipanchanꞌamá. Ashllay yanapänincunallawanmá llalliycunꞌa.

24Imapapis janallanćhu jawca cayalcä malcacunaman unꞌaypi yaycuyculmi taytancuna, awquilluncuna mana lulaśhancunacta lulaycunꞌa. Paymi waycapämuśhan lluy ima cänincunactapis pilyänincunaman aypuycunꞌa. Chaynütacmi sumä murällayu malcacunäman yaycunanpäpis umachacunꞌa. Ñatac chay umachacuśhancunaca pasällamá canꞌa.

25“Chaypïta nurti lädu munayninman, alli cayninman atinïdu achca-achca pilyänincunawanmi Egipto lädu mandacücäman linꞌa. Chaymi Egipto lädu mandacücäpis achca, sumä-cama pilyänincunawan pilyä yalapäcunꞌa. Ñatac pilyänincunap puydïnincuna ipanchäluptinmá Egipto llalliyta mana atipanꞌachu.

26Cusca micapäcuśhan nunacunälämari pampaman muyuchiyta ashipäcunꞌa. Chayćhümi camacaycüśha capäcunꞌa; achca pilyänincunapis pilyućhümá wañupäcunꞌa.

27Cay ishcay mandacücunaca camacanacuyllactamá ashipäcunꞌa. Chaymi cusca micuyalcalpis janä shimillanwanꞌa tuquillacta ninaculcanꞌa. Ñatac Tayta Dios unanchaycuśhan muyunca manalä ćhämuptinmá chay lulay munaśhancuna yanꞌalpa canꞌa.

28“Chay nurti lädu mandacüca pilyućhu lluy-lluy waycaśhan cänincunacta apaculculmi nasyunninta cuticunꞌa. Chaynu cutiyalmi chuya alawana wasictapis anlaman muyuycachinꞌa. Lluy ima pinsaśhancunactapis lulayculmá malcanta cuticunꞌa.

29“Chay mandacüca unanchaśhan timpućhümi sur läduman cutinꞌa. Ñatac chayćhuꞌa puntanüchu manamá llallinꞌa.

30Paymá inti yaycunan lädupi śhamü barcucunaca cuntran śhacayämuptin manchälul cuticunꞌa. Jinalmi sumä piñacuyninta Tayta Diosta alawäcunäwan cutichicülunꞌa. Tayta Diospa chuya limalicuyninta ipanchäcunätañatacmi ichá yanapapäcunꞌa.

31“Paypa pilyänincuna Tayta Diospa sumä cä alawana wasictapis millachicuymanmá muyuchipäcunꞌa;Mat 24.15; Mar 13.14. muyun-muyun uycunacunactapis manalcachinꞌamá. Jinalculmi chayman millachicuy anlacta ćhulaycunꞌa.

32Chay mandacüca Tayta Diospa limalicuyninta ipanchäcunäta uchuy shimillanwanmá munaśhanman palpachinꞌa. Ñatac Tayta Diosta rasunpa lisïcunacá callpanchaculmi chalanaculcanꞌa.

33Chay pasaśhanta achca nuna tantiaycälinanpä yaćhayniyu puydï nunacunämá yanapaycälinꞌa. Masqui chaypïta paycuna ispädawan wañuchisha, cañaycuśha, prïsu puśhaśha, ütac ima cäninta waycaśha capäcunan captinpis yaćhaycachipäcunꞌamá. Chaynu manam ancha unaychu caycunꞌa.

34Paycuna ñacayman ćhäpäcuptin juc ishcayllam yanapaycaćhaycälinꞌa. Waquincuná artillanwanmi paycunaman jucllachacü-tucupäcunꞌa.

35Waquin yaćhayniyücunacá imaymana ñacaycunaman ćhulaycuśham capäcunꞌa. Chaywanmari camacay timpupä chuya, allinllaña caycälinꞌa. Chay unanchaśhan muyunpa timpu cayanlämari.

36“Nurti lädu mandacüca munaśhantamá lulanꞌa. Quiquintamá jatunchacunꞌa; lluy taytachacunapïpis mas allintucunꞌamá;2Tes 2.3-4. mana mayanpis limaśhantamá lluy dioscunap mas munayniyu Tayta Diospa cuntran limanꞌa.Apo 13.5-6. Paypa lluy imapis allinllaña yaluycunꞌa Tayta Diospa piñacuynin ćhämunancamamá. Imay muyunpäpis Tayta Dios nishanꞌa rasunpamá lulacacunꞌa.

37Chay mandacücäta manamá imapis ucunchu awquilluncuna alawaśhan taytachancuna, walmicuna alawaśhan taytachancuna, nï ima taytachacunapis. Payꞌa quiquinta licacun lluy taytachacunap mas munayniyu caśhantamá.

38Pay alawayculꞌa, sumä sigüru cä diostamá alawanꞌa. Awquilluncunapis mana lisishan diostamari üructa, illayta, aläja lumicunacta, sumä ćhaniyu cäcunactapis uycäliyninwan alawaycälinꞌa.

39Chay mana lisishan diospa yanapayninwanmi sumä sigüru cäcätapis camacaycülunꞌa. Allinpä ćhasquiycünin nunacunäta altuman juluyculmá achca malcacunap puydïninpä ćhulaycunꞌa; jinaman yanapäśhanpïtam ćhaclacunactapis aypuycunꞌa.

40“Camacay timpu ćhämuptinñatacmi nurti lädu madacüca sur lädu mandacücäwan chalanacälälinꞌa. Nurti lädu mandacücämi malluypa-mallul pilyapa cä carritancunawan, sillädancunawan, barcucunawan cuntran śhalcülunꞌa. Llüllanümi lluy malcacunaman yaycuycul pichaypa-pichaycülunꞌa.

41Chaynütacmi sumä cuyayllapa cä allpanchicman yaycamul achca-achca nasyuncunacta camacaycülunꞌa. Ñatac Edom, Moab läducunaca, jinaman lluy-yupay Amon lädup puydïnincunapis ayiculcanꞌamá.

42Chaynu munayninwanmari achca nasyuncunacta maquinćhu cachinꞌa; Egipto nasyunpis manamá ayinꞌachu.

43Egiptop ürunta, illayninta, lluy ima cänincunactapis duyñuchacuycunꞌamá. Chaynütacmi Libia, Etiopia läducunäwanpis lulaycunꞌa.

44“Ñatac inti yalamunan lädupïta, nurti lädupïta manchachicuy willacuytam uyalïlunꞌa. Chaymi sumä piñacüśha cuntran lluy-lluy śhalcücunäta camacaycü yalunꞌa.

45Paymi carpancunacta śhalcachinꞌa lamarpi Chuya sumä ulꞌuman linap ćhawpinćhu. Ñatac üran ćhämuptinꞌa mana mayanpis yanapaycünin captinmi payta wañuchinꞌa.