Ezequiel 16 - Old Testament Quechua Wanca（QVW）

Watica walmipïpis mas piyurlä Jerusalen ipanchaśhanpïmi nin

1Chaypïta Tayta Diosmi niman:

2“Wañucülla nuna, Jerusalen malca millachicuy lulaśhancunacta licaycachiy.

3Yaꞌa Tayta Diosnin caynu nishäta niycuy: ‘Am Jerusalen nasïduyquipïmi Canaan lädu canqui; taytayquim Amhor lädu, mamayquiñatac Het lädu.

4Näsishayqui muyun pupuyquita manamá cuchuśhulanquichu, nï almachishulanquichu, nï caćhiwanpis llushiycuśhulanquichu, nïtac illpuycuśhulanquipischu.

5Näsishayquita licäcunaca manamá mayanllanpis llaquipaycuśhulanquichu nï imallactapis lulaycälilachu. Aśhwanpam näsimuptiqui millachicuy-yupayta waśhaman wicapälälishulanqui.

6“ ‘Yaꞌañatacmi chayninpa pasayal yawarniquićhu cućhpaycaćhayäta licälul “Cawsay” nilac. Masqui yawarpa janallanćhu cayaptiquipis “Cawsay;

7ćhaclaćhu ula wiñäcänu wiñay” nilacmá. Chay nishänu wiñalmari jatunyälul lasacyälanqui. Ñunuyquipis wiñämulañamá; wachayquicunapis yalämulañamá. Ñatac pasaypi calanllanlämi cayälanqui.

8“ ‘Chaypïta läduyquip yapa pasalmi licälac, cuscanayqui timpućhüña caśhayquita. Chaymi calanllan mana cayänayquipä punchüwan lancayculac. Jinalcul amwan cuscanapä limalicuptïmi yaꞌapäña calanqui.Jer 31.3-4; Ose 2—3. Yaꞌa Tayta Diosmari niyá.

9“ ‘Yacuwan almaycachilmari yawarniquitapis pichayculac. Jinaman pirfümiwanlämi pasayculacpis.

10Jinalcul tuquish burdäśha müdanawan müdaycachilac, fïnunnin śhucuywan ćhulayculac, allinnin lïnupi sïdapi luläśha müdanawanmi müdaycachilacpis.

11Jinalculmi tuquish aläjacunactalä ćhulayculacpis: pulsïracta, cullarta,

12arïticta, sinꞌayquiman surtijacta, umayquimanñatac curunacta.

13Chaynu ürupi, illaypi aläjawan ćhulapacüśha, burdäśha allin lïnu sïda müdanawan müdapacüśhamá quïdälanqui. Allinnin trïgucta, mishquicta, asaytictalämá miculanquipis. Jinaman mandacüpa walminnu sumä tuquish-tuquishmanmá muyülanquipis.

14Chay tuquish cayniqui lluy nasyunmanmá ćhäla. Yaꞌa sumä caynïwan adurnäluptïmá sumä tuquish-tuquish caculanqui. Yaꞌa Tayta Diosmi niyá.

15“ ‘Ñatac tuquish cayniquiman, lisisha-lisisha cayniquiman chalapaculculmá waticaculanqui. Imactapis mana uculmi mayan pasäwanpis caculanqui.

16Chay quiquiquip müdanayquiwan uycuna patacta lulayculmá taytachacunacta alawayniquiwan waticaculanqui. Chaynu manamá imaypis pasalachu nïtac imaypis pasanmanchu.

17Chaynütacmi ürupi, illaypi tuquish-cama aläja uycuśhäcäwanpis umri taytachacunacta lulaculcul waticaculanqui.

18Chay sumä burdäśha müdanayquicunawanpis müdalcachilmi asayticunacta, insinsiucunactalä uyculanquipis.

19Allinnin trïgu, ulïbus asayti, urunwaypa mishquinta uycuśhactamá uycülunquipis. Yaꞌa Tayta Diosmari niyá.

20“ ‘Chaynütac yaꞌa chulicuśhá wamla walaśh wawiquicunactapis taytachayquiman micuytanu uycuyänayquipä, ¿manachun waticacuśhallayquiwanpis jawcaña caycunquiman cala imamá?

21Chulïcunactamari uycülunqui. Chay taytachayquimanmari cañaywan uycülunqui.

22Waticacuyal, millachicuy lulaycunacta lulayal, ¿manachun yalpalculanqui wamlalla cayal pasaypi calalla, yawarniquićhu cućhpaycaćhayäśhayquitapis imamá?

23“ ‘Ay, imanuylä am canqui, caynu mana allin juchacunallacta lulaśhayquipi. Yaꞌa Tayta Diosmari niyá.

24Aśhta läsacunäćhu mayanwanñapis waticacunayquipälämari uycuna pataccunactapis lulacülunqui.

25Cällicunäpa isquinancunaćhümá lulacülunqui tuquish cayniquita millachicuyman muyuchinayquipä. Chayćhu caćhpayquita quićhacuyculmá mayan pasäwanñapis waticaculanqui.

26Jichur aśhnunu cä bisinuyqui Egipto läducunäwanmá waticaculanqui. Piñachimayniquiwanmá mayanwanñapis mansibacuyta ćhapalanqui.

27Chaymi cuntrayqui maquïta ćhulayculá; parti tücäniquitam quitälac. Filisteo lädu ćhïnicüniqui walmicunaca munaśhanta amcunawan lulapäcunanpämi caćhaycülac. Aśhta paycunapis millachicuy lulayniquicunapi pinꞌaculcälamá.

28Am, mana maćhayculmá Asiria läducunäwanpis waticaculanqui. Chaycunawanpis manamari maćhayculanquichu.

29Chaymi nigusyanti Babilonia läducunäwanpis waticacuyta ćhapalanqui. Chaywanpis manamá jawcayälanquichu.

30“ ‘Yaꞌa Tayta Diosmi ní: Maynu anla śhunꞌuyümi canqui, pasaypi mana pinꞌacuyniyu watica walminu lulayänayquipä.

31Cällicunap isquinancunaćhu, läsacunäćhu mayanwanñapis mansibacunayquipämá lulacülunqui. Ñatac waticacücänu mana calanquichu, pägupä mana lulaśhallayquiwanmá.

32Mansibädu walmi, wayapayquitapis unꞌayculmá mana lisishayqui wayapacunacta ashiyta ćhapalanqui.

33Lluy watica walmictamá pägapäcun. Amñatacmi ichá waynayquicunacta pägaycunquilä canpis. Maypïñapis inquitalculmá amwan mansibacunanpä uycunquilä canpis.

34Chay watica walmicunänüchu manamá lulalanqui. Amta umricunächu manamá ashipäcuśhunqui, sinuꞌa am quiquiquim paycunacta ashiycunqui. Paycunachu manamá pägapäcuśhunqui, sinuꞌa amlämá pägaycunquipis. Chay lulaśhayquićhuꞌa watica walmicunäpïpis mas piyurninlämi canqui.

35“ ‘Chayurá yaꞌa Tayta Dios niśhäta, am watica walmi uyalimay.

36Yaꞌa Tayta Diosmi ní: Lluy pinꞌayniquicunactamá waticacuyniquićhu licachilanqui. Calayquitamá waynayquicunaman, millachicuy taytachayquicunaman camalachilanqui. Chaycunamanmá wawiquicunap yawarnintapis uyculanqui.

37Chayurá juntuycamuśhämi lluy-lluy caśhayqui waynayquicunacta, lluy cuyaśhayquicunacta, jinaman lluy ćhïnicuśhayquicunactapis. Paycunacta muyülïniquiman juntuycamul paycunap ñawpäninćhu müdanayquita lluśhtïluptïmi calanllacta licapäcuśhunqui. Chay pinꞌayniquitamá lluy licapäcuśhunqui.Apo 17.16.

38Chayćhümá nuna wañuchicü walmictanu, mansibädu walmictanu cäraycuśhayqui. Sumä piñacuśhämannu, sïlacuśhämannümá camacaycüśhayqui.

39Paycunap maquinman ćhulaycuptïmi waticacunayquipä cäcunäta pampaman muyüchinꞌa; taytachayquicunacta uycunayquipä cäcunätapis camacaycälälinꞌa. Müdanayquicunactamá lluśhtïlälishunqui; aläjayquicunactapis apaculcalmá pasaypi calallacta caćhaycälälishunqui.

40Paycuna alli-alli nunacunacta cuntrayqui juntuyculmá lumiwan tamshälälishunqui; ispädawanmá uchuy-uchuyllacta camacaycälälishunqui.

41Awari, wasiquicunactapis cañaycälälinꞌamá, achca-achca walmicunap puntanćhümari camacaycälälishunquipis. Chaynüpamá waticacuyniquita yaꞌa camacaycüśhä; waynayquicunamanpis manañamá pägayanquiñachu.

42Chaynüpamá piñacuynïwan sïlacuyní pasaycunꞌa. Jawcayälul manañamá piñacuśhäñachu.

43“ ‘Rasunpa, lluy lulaśhayquiwanmá piñachimälanqui. Lasac caśhayquipïta manamá yalpalcamälanquichu, nï millachicuy lulayniquicuna imapis ucuśhulanquichu. Chay lulaśhayquimannümari cunca cuchuyniqui caycunꞌa. Yaꞌa Tayta Diosmari niyá.

44“ ‘Má, tincuchiypa limäcunämi ampïta niyalcan “Cay wamla wawinpis mamannüćhá canꞌa” nil.

45Wayapantawan wawincunacta caćhaycü walminümá am cayanqui; wayapantapis wawincunactapis alapacü ñañayquinümari am cayanqui. Awari, ampa mamayqui Het lädumá, taytayquiñatacmi Amhor lädu.

46Mayur ñañayquiꞌa nurti lädućhu cä Samaria lädum lluy malcantin. Śhullca ñañayquiñatacmi sur lädućhu cä Sodoma lädu lluy malcantin.

47Am manamá pay cawsaśhannüllachu cawsayculanqui, nï millachicuy lulaśhannüllachu lulayculanqui, sinuꞌa “chaycuna imallamá” nilmi paycunapïpis mas-mas mana allincunactalä lulayculanquipis.

48Chaymi yaꞌa Tayta Dios rasunpa cawsaśhänu limalicú: Ñañayqui Sodoma lluy wawintinpis manamá am, wawiquiwan lulapäcuśhayquinüchu lulapäcula.

49Ñañayqui Sodoma lluy wawintinpa juchancuna caycunam cala: nunatucuynin, imapapis janallanćhu cayal imactapis mana ucuynin, jinaman mana cäniyücunäta, wacchacunäta mana yanapayninpis.

50Nunatucuyculmá pasaypi millachicuycunacta ñawquí lulala. Chaymi licaśhayquinu camacaycülá.

51Am lulaśhayquipïtá manamá ćhawpillactapis Samaria juchaculachu. Anmi ichá pasaypi millachicuycunallacta sumä-sumä lulalanqui. Amwan tincuycachishá ñañayqui manamá ima juchayüpischu.

52Anmá ñañayquicunapi mas millachicuy juchacuśhayquiwan paycunacta allinpälä, mana juchayüpälä licaycachinquipis. Chayurá cäraycuśha caśhayquita awantayꞌari; ñañayquicunacta mana juchayüpä licachishayquipi pinꞌayćhu caśhayquitawan anyäśha caśhayquitapis awantayꞌari.

53“ ‘Ñatac yaꞌami Sodomacta, Samariacta malcantinta-cama allinman cutiycachishä. Chaynütacmi amtapis cutiycachishayqui.

54Chaymi lluy lulaśhayquipi pinꞌacuyćhu canqui; pampaman uyshulächisha canqui. Chaynu capäcuśhayquipïmá paycuna cushiculcanꞌa.

55Ñañayqui Sodomawan Samaria lluy malcantin-cama punta caśhanmannu cutiycuptinmi ampis lluy malcayquicunawan punta timpućhu caśhayquimannu cutiycunqui.

56¿Manachun nunatucüśha cayal ñañayqui Sodomacta ampis jamuyälanqui imamá?

57Chaynu cayculanqui juchayquicuna manalä camalaycachisha captinmá. Cananñatacmi ichá Siria lädu, Filisteo läducunaca lluy malcantin-cama amta jalutaculcäśhunqui. Lluy-lluymá mana allinpä licapäcuśhunqui.

58Cananꞌa chay mana allincuna lulaśhayquipi, millachicuycunalla lulaśhayquipi tincütamá ćhasquiycunayqui cayan. Yaꞌa Tayta Diosmari niyá.

59“ ‘Jinaman yaꞌa Tayta Diosmi ní: Limalinacuśhanchicta mana caśhanman am muyuchishayquipïtamá, tincüniquiman maquïta ćhulaycuśhayqui.

60Chaynu captinpis yaꞌam ichá lasac cayaptiqui limalicuśhäta yalpalayá; wiña-wiñaypämari amwan limalicuśhä.

61Chaynu mayur, śhullca ñañayquicunacta wawiquipänu maquiquiman ćhulaycuptïmi puntacta imanuy caśhayquita yalpaćhacul sumä pinꞌayćhu canqui. Paycunacta maquiquiman ćhulaycayämú manam am limalicuśhayquipachu,

62sinuꞌa anman yaꞌa limalicuśhäpam. Chaymi yaꞌa Tayta Dios caśhäta yaćhapäcunqui.

63Awari, pampachaycuptïmi lluy lulaśhayquita yalpaćhacul pinꞌacuypïta shimiquita chapacuycul imaypis canqui. Chay pinꞌacuyniquićhu manañamá nunatucunquichu. Yaꞌa Tayta Diosmari niyá’ ” nil.