Salmos 71 - Old Testament Quechua Wanca（QVW）

Awquishyäśha nunam mañacun

1 Tayta Diosllay, amllamanmá pacacú;

amari imaypis pinꞌayćhu caćhaycallämaychu.

2Tincüninman licaycü caśhayqui-laycuꞌari

yanapaycallämay, libraycallämay.

Uyaliycallämalꞌari salbaycallämay.

3Am, wancanu imaypis pacaycamäní,

salbaycamäní caycuy amllaman pacacuycunäpä.

Anmá wanca-yupayní, sumä murälläśha sigüru malcanu canqui.

4Tayta Diosllay, mana allin nunacunäpa maquincunapi libraycallämay.

Juyu nunacunap, pasaypi nunacunap maquinpïta julaycallämay.

5Am Tayta Diosllätamá alcaycullá.

Müsu caśhäpïmá amllaman chalapacamulá.

6Mamäpa patanpïtamá amllaman chalapacamulá.

Anmá näsichimäca canqui.

Imaycamapis amllactamá alawaycuśhayqui.

7Yaꞌacta licapämal äśhalayllaman achcam camapäcun.

Amñatacmi ichá sigüru pacaycamäní caycunqui.

8Sumä cayniquipi shimi puntalläćhümá cayan.

Walan-walanpis sumä cayniquipïmá alawaycuc.

9Awquishyäluptí amari jitällämaychu.

Mana callpayüña cayaptí amari caćhaycallämaychu.

10Ñatac ćhïnicünïcunam cuntrá limapäcun.

Mana allinnïta ashïcunämi limanaculcan:

11“Tayta Diosnin caćhaycülunñamá.

Atipalcul chalämuśhun;

manañamá pipis śhalcünin canñachu” nil.

12Tayta Diosllay, yaꞌacta amari caćhaycallämaychu.

Tayta Diosllay, yanapaycamänayquipä jucllañari śhaycamuy.

13Cuntrá śhalcücunaca pinꞌayman ćhulaycuśhari cachun.

Pampaman muyuchiyta munämänïcunaca

pantächisha, uyshulächiśhari cachun.

14Yaꞌañatacmi ichá amllaman imaypis chalapacamuśhä.

Mas-mastalämá alawaycuśhayquipis.

15Masqui achca-achca lulaśhayquita mana tantiayta atipayalpis

tincüninman licaycü caśhayquipïtamá willacuśhä.

Salbacu caśhayquipïta walan-walanmi limalläśhä.

16Am Tayta Diosllá sumä-cama

lulaycunacta lulaśhayquipïtamá willacuśhä.

Am tincüninman-cama licaycüca caśhayquitamá niycuśhä.

17Tayta Diosllay, müsu caśhäpïtamá yaćhaycachimälanqui.

Canancamapis sumä-sumäcunacta lulaśhayquipïtamá willacuyällá.

18Tayta Diosllay, yulä umäśha awquishña

cayaptïpis amari caćhaycallämaychu.

Śhamü nunacunäta sumä munayniquipi willaycunälämari cayan.

Milaynïcunacta sumä lulaycuśhayquipi lisiycachinälämari cayan.

19Tayta Diosllay, tincüninman-cama

licaycuyniqui sïlücamamá ćhaycun.

Sumä-cama lulaycunactamá lulayculanqui.

¡Amnuꞌa manamá mayanpis canchu!

20Masqui imaymana llaquicunap, ñacaycunap

pasayächimalpis caśhanmá cawsayta uycamanqui,

allpap śhunꞌunpïtamá śhalcaycachimanqui.

21Altunninmanlämi ćhulaycamanquipis.

Caśhanmi cunsuylaycamanquipis.

22Tayta Diosllay, chalapacuna caśhayquipïtamá

tucanacunawan alawaycuśhayqui.

Israelpa Chuya am Diosninta arpacunawanmá alawaycuśhayqui.

23Cawsaynïta salbaycamäśhayquipi taquicunawan

cushisha apalishtinmá alawaycuśhayqui.

24Mana allinnïta ashïcunaca pantäśha,

pinꞌayćhümi camacälälin.

Chaynu tincüllanman licaycü caśhayquipïtamá walan-walan willaculläśhä.