Daniel 10 - Old Testament Quechua Wanca（QVW）

Mayu patanćhümi suyñuyninćhünu Daniel lican

1Persiap madacünin Ciro quimsa wataña mandacuyaptinmi Beltsasar nishan Danielta suyñuyninćhünu licachiña. Chay licachishanca rasuncämi caña; achca-achca pilyayätamá licäña. Ñatac chay suyñuyninćhünu licaśhanca imapä caśhantapis Danielꞌa tantialam.

2Caytanümi licaña: “Chay muyuncuna yaꞌa Daniel quimsa simänam llaquishalla cayälá.

3Chay simäna manam ima mishqui micuytapis, aychactapis miculächu, nï bïnuctapis upyalächu, nï pirfümiwanpis llushiculächu.

4“Wamä quillap ishcay ćhunca tawayu (24) muyunninćhümi Hidekel nishan jatun mayup patanćhu cayälá.

5Chayćhu licalcuśhäćhümi lïnupi müdanawan müdacuśha, Ufaz lädu ürunllanllanpi waćhacuwan waćhacacüśha nunacta licälú.

6Jinantin aychanmi achichipyayä berilio nishan luminu cacuña, cäranñatac waclinu llipyayäña, ñawinñatac ishcay walayä ninanu cacuña. Liclanwan ćhaquinñatacmi chipipicyayä brunsinülä caña. Limayninñatacmi achca-achca nunacunap lüyayninnülä cacuñäpis.

7“Chay suyñuynïćhünu yaꞌa Daniel-llam licalá. Yaꞌawan cä nunacunaca masqui mana licapäculpis sumä manchalicälälilmi pacaculcä ayiculcan.

8Jinaptin yaꞌa japallá suyñuynïćhünu licaśhtin quïdäluptïmi callpäpis licun, cäräpis yuläyälun; pasaypiñamá licalïlú.

9Chay nuna limapämäśhanta uyalïlulmi wañüśhanu pampäman cärap cućhpälú.

10“Chayćhümi juc maqui yataycamal unꞌulaycachiman, pampäman maquí chalapacüśhacta.

11Chayćhümi niman: ‘Tayta Diospa cuyaśhan Daniel, śhalcuculcul cay nishäta tantiaycuyꞌari. Anmanmi caćhamuśha calá’ nil. Chaynu nimaptinmi chucchuyalpis śhalcüllá.

12“Chay nunäñatacmi niman: ‘Daniel, ama manchacuychu. Sumä sasa cäcunäta tantianayquipä Tayta Diospa ñawpäninman uyshuycuśhayqui muyunpïmi mañacuyniquita uyaliycuśhulanqui. Chay mañacuyniqui-laycumá yaꞌa śhamulá.

13Ñatac Persia läducta maquinćhu cachï puydïninmi ishcay ćhunca jucniyu (21) muyun manalcachimayta ćhapala. Chaymi anjilcunäpïta jucnin puydïnin Miguel nishan yanapaycamäní śhamuña.

14Cananmi śhamulá śhamü timpućhu malcayquiwan ima pasanantapis tantiaycachï. Chay suyñućhu licachishuśhayquica śhamü timpucunapälämari cayan’ nil.

15“Chaynu niyämaptinmi imallactapis mana nillal upälla uyshucuśhalla yaꞌa cayälá.

16Ñatac chayćhu nunanu cäca shimïta yataycämaptinmi limayta allayculá. Chayćhümi nilá: ‘Taytallay, cay suyñuynïćhünu licachimäśhayquica llaquichimaptinmi pasaypi mana callpayüña cayällá.

17Taytallay, cay nunallayqui, ¿imanuypam amwan limäman mana callpayüña cayal, jämaynïpis manaña cayaptin?’ nil.

18“Niptí, nunanu cayäca caśhan yataycämaptinmi callpá licalïmuña.

19Chayćhümi niman: ‘Tayta Diospa cuyaśhan Daniel, jawcalla caycuy; ama manchacuychu. Aśhwanpa callpanchacuy’ nil. Chaynu niyämaptinmi caśhan callpá licalïmuptin: ‘Taytallay, callpanchaycamanquimá; willaycamayꞌari’ nilá.

20“Niptïmi niman: ‘¿Anman, imapä śhamuśhätapis yaćhayanquichun? Cananmi cutiná cayan, Persia lädu puydïcäwan pilyä. Paywan pilyayta camacäluptïñatacmi Grecia lädu puydïca śhamunꞌa.

21Paycunawan pilyaptí manamá mayanpis yanapaycamanchu; am Israel läducunap puydïniqui anjil Miguel-llam yanapäman. Cananmi tantiachishayqui rasuncälla cä librućhu isquirbishaca imanuy cananpäpis’ nil.