Levitico 25 - Old Testament Quechua Wanca（QVW）

Ćhaclacunäta jamachinanpä, jinaman cutiycachinanpämi nin

1Sinai ulüćhümi Moisesta Tayta Dios nin:

2“Israel caśhtacunäta caynu nimuy: ‘Uycuśhä allpaman yaycälälilmi Tayta Diosta alawayniquiwan chay ćhaclaca jamanꞌa.

3Süta watam ćhaclayquicunacta talpupäcunqui, üba lantayquicunactapis püdapanqui, cusichanqui.

4Anćhish watäćhüñatacmi ichá Tayta Diosta alawayniquiwan ćhaclayquicuna jamanꞌa; amam talpunquichu nï üba lantayquicunactapis püdanquichu.

5Chay watäćhu quiquillanpi wiñamücunätapis amam cusichanquichu nïtac übayquicunap wayuynintapis pallanquichu. Chay wata-intïru ćhaclayquicunapä jamanan watam canꞌa.

6Chaynu captinpis chay jamanan wataćhu wayuśhancunäta micunquim ampis, uyway nunayquicunapis, lulapacüniquicunapis, mana Israel caśhta amcunawan yaćhäcunäpis.

7Chaynütacmi chay wiñaśhancunaca uywayquicuna, malcayquićhu yaćhä lluy munti uywacunapis micapäcunanpä canꞌa.Libricta caćhaycunan watapïmi nin

8“ ‘Chay anćhish watacunäta anćhish cutim fintanqui. Chaymi tawa ćhunca isunniyu watacuna canꞌa.

9Chay anćhish quillap ćhunca muyunninćhu, jucha pampachanacuy muyuncäćhümari jinantin malcantinćhu curnitillacta tucanqui.

10Chay picha ćhunca (50) wata cäcämari chuya wata, libri canan wata caycunꞌa. Chaymi lluy imactapis, uyway nunacunätapis libricta caćhaycuna wata canꞌa. Chay wataćhu lluymi ćhaclancunaman, aylluncunaman cuticulcanꞌa.

11Chay picha ćhunca wataca amcunapä canꞌa libri cä watam. Chay wata amam talpupäcunquichu nï quiquillanpi wiñäcunätapis cusichapäcunquichu, nïtac üba lantayquicunapïpis pallapäcunquichu.

12Chay wataca amcunapä canꞌa chuyam, libri cä watam. Ñatac quiquillanpi ćhaclacunäćhu wiñäcunällapïtam micapäcunquipis.

13“ ‘Cay libri cä wataćhu lluymi ćhaclayquicunacta caśhan cutichiculcanqui.

14Mayanniquipis ćhaclacta lantinaculcalꞌa ama quiquiquipula ingañacuyalcaychu.

15Lantilꞌa libri cä watapi fintayculmi lantinꞌa. Chaynütacmi lanticücäpis ayca cusichala faltaśhanta fintaycul mañanꞌa.

16Achca watala libri cä watapä faltaptinꞌa mas ćhaniyümi canꞌa; minus wata faltaptinꞌa minusmi ćhanin canꞌa. Ayca cusicha julunanpä faltaśhanmannümi lanticunꞌa.

17“ ‘Amari quiquiquipula ingañanacuyalcaychu. Aśhwanpa Tayta Diosniquita manchaculcay. Yaꞌamari Tayta Diosniqui cayá.

18Camachicuynïta lulayman ćhulaycäliy; yaćhachicuynïta cäsuculcay. Chaynu cawsapäculꞌa chay malcaćhu jawcam cawsapäcunqui.

19Ćhaclacunäpis allinta wayuptinmi maćhaycunayquicama micapäcunquipis. Jinalmi chayćhu jawca yaćhapäcunqui.

20“ ‘Ichapis am nipäcunqui: “Anćhish watäćhu mana talpucuyalcal, mana cusichayalcal, ¿imactaćh micapäcuśhä?” nil.

21Ñatac yaꞌamari chay süta watäćhu allin cusichacta ishpiycachishä. Chaymi quimsa watapäla cacunꞌapis.

22Chayćha pusä watäćhu talpuyalcaptiquipis anyan wata talpuyniquipi micapäcunayquipä cayanꞌala. Chaynüćha isun watäćhüpis cusichanayquicamapis micapäcunayquipä cayanꞌalätac’ nil.

Ćhaclacta julucunanpämi nin

23“Ćhaclacunäta amam pasaypipä lantinaculcanquichu. Ćhaclacunaca yaꞌapamari; amcuná pasacülla, jamapacüllam cayćhu cayalcanqui.

24Chaymi lantishayqui ćhaclacunacta punta nunan cutichicuyta munalꞌa cutichicunꞌa.

25“Sïchuśh jucnin malca-masiquip imanpis manaña captin ćhaclanta lanticüśhuptiqui, sirca cä ayllunmi chay ćhaclacta julucunꞌa.

26“Sïchuśh chay nunap ćhaclanta julunanpä ayllun mana cayaptinpis quiquinña illayta juntülulꞌa julucunꞌam.

27Chaynu captinꞌa lanticuśhan watapi allayculmi fintanꞌa ayca wataña pasaśhantapis. Chaypi ayca cusicha faltaśhanta tantiayculmi julucunanpä uycunꞌa.

28Ñatac julucunanpä illayta juntuyta mana atipaptinꞌa libri cä watacamam chay lantïcäpa maquinćhu canꞌa. Chay wataćhüñam quiquin duyñuca cutichicunꞌa.

29“Sïchuśh mayanpis murälläśha malcaćhu wasicta lanticülulꞌa, chay lanticuśhanpi juc watam cayan caśhan julucunanpä.

30Ñatac chay wataćhu lanticuśhan wasicta mana julucuyta atipaptinꞌa chay lantïcäpäñam, milaynincunapäñam wiña-wiñaypä caycunꞌa. Libri cä wataćhüpis manañamari cutichicunmanñachu.

31Ñatac mana murällayu malcaćhu cä wasicunacá ćhaclacunäwannümi lulaycuśhä canꞌa: libri cä wataćhu cutichicunmanmi, julucunmanmi.

32“Levitacunäñatacmi ichá yaćhaśhan malcaćhu lanticuśhan wasincunacta imaypis juluculcanman.

33Levitapïta wasicta lantïca libri cä wataćhu chay wasicta caćhaycapulmi malcapi yalucunꞌa. Israel caśhtacunäćhu levitacunäpa cäninmari.

34Ñatac malca yaćhaśhancunap ichadïruncunactá paycunap wiñaypä cänincuna captinmi mana lanticulcanꞌachu.

35“Mayan malca-masiquipis pasaypi palpülul mayan yanapäninpis manaña captinꞌa amcunamari yanapapäcunqui. Mana malcayu ütac jamapacünüñam wasiquićhu pay yaćhanꞌa.

47“Sïchuśh amcunaćhu yaćha mana Israel caśhtaca rïcuyälunꞌa, jinaman Israel caśhtaca pasaypi wacchayalcul chay rïcuya caśhtaman ütac ayllunmanpis quiquinta lanticülunꞌa.

48Chaynu lanticüśha cayalpis dirichun canmi juc Israel caśhta-masin julucunanpä masqui jucpa maquinćhu lanticüśhaña cayaptinpis.

49Julucunmantacmi tiyunpis, prïmunpis ütac mayan ayllunpis. Ñatac illaynin captinꞌa quiquinpis riscatacunmanmi.

50Mayan lulapacütapis uycuśhanmannümi watan-watan lulaśhanpi aycacta uycunanpäpis duyñuwan limanaculcanꞌa lantishan watapïta aśhta libri cä watacama ayca ćhanin caśhantapis.

51Sïchuśh achca watalä libri cä watapä faltaptinꞌa riscataśha cananpä ayca wata faltaśhanmannümi lantïnin nunaman illayninta cutiycachinꞌa.

52Ñatac libri cä watapä ashllaña faltaptinꞌa chay faltaśhanmannüllañam uycunꞌa.

53Chay uyway nunacta watan-watan lulapacü nunactanümi licapäcunqui. Ampa ñawiquićhuꞌa amam mayan lantïpis ñacachipäcunꞌachu.

54“Sïchuśh quiquinpis ütac mayan ayllunpis mana riscatayta atipaptinꞌa, quiquinpis chulincunapis libri cä wataćhüñam libriña capäcunꞌa.

55Awari, Israel caśhtacunaca uywaynïcunamari. Paycunacta uywayní capäcuptinmá Egiptop maquinpïta julamulá. Yaꞌamari Tayta Diosniqui cayá.