Jueces 19 - Old Testament Quechua Wanca（QVW）

Levi ayllu nunap uywanacuśhan walmin

1Chay timpu Israel caśhtacunaca mana mandacüniyümi cayalcäla. Efrainpa calu ulꞌuncunaćhüñatacmi Levi ayllu nuna yaćhala. Paymi Juda lädu Belen malcapi juc wamlacta puśhal chayćhu uywanaculcäla.

2Chay uywanacuśhan walmïñatacmi piñacülul Juda lädu Belenćhu cä taytanman cuticula. Chayćhu tawa quillamari cayäla.

3Wayapanñatacmi tuquillap awnilcachil cutichimunanpä uyway nunanwan ishcay aśhnunta aticulcul lila. Ćhäläliptinmi walmin taytanpa wasinćhu allinpä ćhasquila.

4Taytanpis cushisha allinpä ćhasquiyculmi “caycuśhunläri” nin. Chaymi micapäcul, upyapäcul quimsa muyun chayćhu jamapäcula.

5Tawa muyuncäćhüñatacmi wälalla śhalcälälin liculcänanpä. Chaynu yalućhaculcaptinmi wamläpa taytan maśhanta nin: “Licunayquipä ashllactapis micucuycuylä callpayqui cananpä” nil.

6Niptinmi pulan taycacaycälil micapäcula, upyapäcula. Chaypïmi walminpa taytan: “Canan tutapis quïdaycuylä cushicunayquipä” nin.

7Niptinpis śhalcuculcul lićhacuptinmi suydrun ruygapayaptin chay tutapis quïdayculalä.

8Picha muyuncäñatacmi liculcänanpä wälalla śhalcäläliptin suydrun nin: “Imallactapis micucuycuylä callpayqui cananpä, aśhta inti muyulpunancama” nil. Niptinmi chayćhu ishcaynin micapäcula.

9Chayćhu wayapaca licunanpäña uywanacuśhan walminwan, uywayninwan śhalcućhacuptinñatacmi suydrun nin: “Inti patacñam cacuyan; cay tutallá quïdacullayñari cushicunayquipä. Wälamanñaćh tuta-tutälla wasiquita licunqui” nil.

10Niptinpis wayapaca chay tuta mana quïdayta munayninwanmi licula. Chaynüpam uywanacuśhan walminwan, ishcay aśhnunwan Jerusalenpa ütac Jebus nipäcuśhanpa sircanman ćhälälila.

11Chayćhu cayalcaptinmi inti patacña cacuyäla. Chaymi uyway nunan nin: “Cay Jebus läducunäpa malcallanćhüña jamapacuptinchic allinćha canman” nil.

12Niptinmi wayapaca: “Mana Israel caśhtap malcancunamanꞌa manam lichwanchu. Aśhwanpa Gabaa malcäcamaña pasaśhun.

13Acuchun, Gabaa malcaćhu ütac Rama malcaćhüñam jamapacuśhun” nin.

14Chaynu pasaculcalmi inti jiꞌalpüśhaña Benjamin ayllup Gabaa malcanpa chimpanman ćhälälin.

15Chaymi Gabaa malcaman yaycapäcula jamapaculcänanpä. Chayćhu mana mayanpis jamaycachiptinmi läsaćhu täcuyalcäla.

16Tutalpüśhañam yaśha nuna ćhaclanpi jamayämuña. Pay Efrain ayllup ulꞌuncunapïta calmi Gabaa malcaćhu pulicünülla yaćhala. Chayćhu yaćhäcunäñatacmi Benjamin ayllucuna capäcula.

17Paymi chay läsaćhu tacuyalcäta licälul tapula: “¿Maypïmi śhayalcämunqui? ¿Maytam liyalcanqui?” nil.

18Niptinmi: “Yaꞌacuna, Juda lädu Belenpïtam śhayalcämú. Ñatac Efrain ayllup calu ulꞌunćhu yaćhapäcuśhämanmi cutiyalcá. Lipäculá Juda lädu Belenmanmari; cananñatacmi Tayta Diospa wasinmam cutiyalcá. Manam mayanpis jamaycälichimanchu.

19Ñatac aśhnüpäpis micunancuná cayanmi; yaꞌapäpis, walmïpäpis, uyway nunäpäpis tantäpis bïnüpis cayantacmi. Manam imapis pishiycälimanchu” nin.

20Niptinmi yaśha nunaca: “¿¡Imanuypamá cay läsaćhu wälapäcunquiman!? Wasïta lishun. Ima pishipacuśhayquitapis yaꞌami uycuśhayqui” nin.

21Nilcul wasinman puśhaculmi aśhnuncunacta alaycapula. Jamapacücunäñatacmi ćhaquincunacta paꞌacalcälil micapäcula, upyapäcula.

22Chaynu allin cayalcaptinmi chay malcaćhu mana allin nunacunaca wasiman juntälälimun. Chaynu cunćhacaycälilmi wasip puncunta tacacayalcämun: “¡Chay jamachishayqui nunacta abusapäcunäpä wicapamuy!” nil.

23Nicuyaptinmi wasiyüca yalulcul ruygacula: “Taytacuna, amari chaynu millachicuytá lulaycälillaychu. Jamachishá nuna caśhan-laycu juyu lulaytá amari lulapäcullaychu.

24Aśhwanpam manalä umricta lisï wamla chulïwan jamapacücäpa uywanacuśhan walmin cayćhu cayalcan. Paycunacta yalächimuśhä munaśhayquita lulapäcunayquipä. Cay jamapacücäwan amari millachicuy lulaytá lulaycälillaychu” nil.

25Niptinpis paycuna imactapis manamari uyalïtuculcälachu. Chaymi walmicta waśhaman yalächiptin chay nunacunaca walächi firsälälila, abusälälila. Achicalcuyaptinñam caćhaycälälila.

26Chaymi chay walmica wayapan caśhancäman cutimul yaśha nunap wasinpa puncunćhu achicänancama chutalayäña.

27Wayapanñatacmi wälalla śhalcuculcul pasananpä puncucta quićhaycula. Jinaptinmi chayćhu puncuman chalacüśha uywanacuśhan walmin chutalayäña.

28Chayćhümi wayapan nicuyan: “Śhalcuy, acuchun pasaśhunña” nil. Niptinpis manañam limalilachu. Chaymi aśhnunman ćhulculcul lipäcuśhancäman pasaculcäla.

29Wasinta ćhayculmi cuchillucta chalalcul walminta ćhunca ishcayniyüman cuchülun. Jinalculmi Israel caśhtaćhu ayllucunäman jucnincä-cama apächila.

30Chayta licäcunämi nicuyalcan: “Israel caśhtacunaca Egiptopi yalamuśhanchicpi canancama manamá licalanchicchu caynu pasätá. Cay pasaśhanpïta, sumätari tantiaycuśhun imacta lulananchicpäpis” nil.