Numeros 8 - Old Testament Quechua Wanca（QVW）

Jatun michïructam Aaron latachin

1Chaypïtam Moisesta Tayta Dios nin:

2“Aaronta nimuy: ‘Anćhish walanacunäta latachilꞌa jatun michïrup puntan lädumanmi acchiyäta ćhulanqui’ ” nil.

3Chaynu Tayta Dios Moisesta nishanmannümi Aaron lulaycula; walanancunätam ćhulaycula jatun michïrup puntan lädunman acchiyä-camacta.

4Chay jatun michïruca täcunanpïta aśhta wayta lulaśhancama ürunllanllanpïta martilluwan labräśham cacula. Chaynu Moises lulaycula Tayta Dios nishanmannüllam.Levi ayllucunätam japächalcul chuyanchaycun

5Chaypïtam Moisesta Tayta Dios nin:

6“Israel caśhtacunäpïta Levi ayllucunäta japächalcul chuyanchaycuy.

7Caynümi chuyanchanqui: chuyanchana yacuwanmi chächunqui. Payñatacmi lluy wachanta cuchucunꞌa, müdanancunacta täśhanꞌa. Chaynüpamari chuyanchäśha capäcunꞌa.

8Chaypïtam juc malta wäcacta, fïnunnin arinacta asaytiwan chapüśhactapis uycunꞌa. Ampis juchapi chuyanchacunayquipä juc wäcactam uycunqui.

9Chay Levi ayllucunäta tincuna carpap puncunman puśhayculmi jinantin Israel caśhtacunäta juntuchimunqui.

10Chaynu Levi ayllucunäta Tayta Diosman aśhuycachiptiquim Israel caśhtacunäñatac maquinta paycunaman ćhulaycälinꞌa.

11Chayurá Israel caśhtacunaca altuman pallalcul uycapäcunantanu Tayta Diosman Levi ayllucunäta Aaron uycunꞌa. Chaynüpam Tayta Diosta sirbipäcunanpä listu capäcunꞌa.

12“Chaypïtam Levi ayllucunaca wäcacunäpa umanman maquincunacta ćhulaycälinꞌa. Chay jucnintam chuyanchaycuśha cananpä uycunqui; juccätañatacmi Tayta Diospä cañaycunqui.

13Chaypïtam Levi ayllucunäta Aaronpawan chulincunap puntanman śhaycaycälichinqui. Jinalculmi altuman pallalcul uycunactanu Tayta Diosman uycunqui.

14Chaynüpam Israel caśhtacunäpïta Levi ayllucunäta yaꞌapa cananpä japächaycunqui.

15“Chaynu Levi ayllucunäta chuyanchaycuptiqui, altuman pallalcul uycunactanu paycunacta uycamaptiquim tincuna carpaman śhapämunꞌa, chayćhu sirbipäcunanpä.

16Lluy Israel caśhtacunäpïta paycunam yaꞌallapä capäcunꞌa. Jinantin Israel caśhtap wamä chulincunacta japächaycunapïtamari paycunacta japachaycú.

17Yaꞌapamari jinantin Israel caśhtap wamä chulincunapis, uywancunapis cayan. Egiptocunäpa lluy wamä chulincuna wañüläliptinmi israelcunäpa wamä chulincunacta yaꞌa quiquïpä japächaculá.Exo 13.2, 11-16.

18Jinaman jinantin Israel caśhtacunap wamä chulincunap pudirninpä Levi ayllucunätam japachaycú.

19Jinalculmi Levi ayllucunäta juc rigäluctanu Aaronman chulintinman uycú. Pay Levi ayllucunämi tincuna carpaćhu Israel caśhtacunap allinninpä sirbipäcunꞌa. Chaynu juchancunacta chuyanchaycachiptinmi chuya carpaman aśhuycäliptinpis ima mana allinpis mana ćhaycunꞌachu” nil.

20Chaynu Tayta Dios Moisesta nishanmannümi Moiseswan Aaron, lluy Israel caśhtacunäpis Levi ayllucunäwan lulaycapäcula.

21Levi ayllucunämi chuyanchaculcäla, jinaman müdanancunactapis täśhapäcula. Jinalcuptinmi Aaronñatac altuman pallalcul uycunactanu Levi ayllucunäta Tayta Dios allinpä licaycunanpä chuyanchäla.

22Caycunacta lulayculmi Levi ayllucunaca tincuna carpaman lipäcula Aaronpawan chulincunap ñawquin sirbiyta allaycapäcunanpä. Chaynu Moisesman Tayta Dios nishanmannümi Levi ayllucunäwan lulaycuśha cala.

23Chaypïtam Moisesta Tayta Dios nin:

24“Cay tincuna carpaćhu Levi ayllucunaca sirbipäcunanpä ćhulaśha canꞌa ishcay ćhunca picha (25) watayüpi janamanmi.

25Ñatac picha ćhunca (50) watanman ćhälälilꞌa lulayninpi jamaculcanꞌañam.

26Chay watapïta puntaman juc wawꞌi-caśhancunacta tincuna carpaćhu yanapayllá yanapanmanmi. Ñatac manañam quiquinꞌa sirbinmanchu. Caycunacta lulaycunanpämi Levi ayllucunäta niycunqui” nil.