Miqueas 3 - Old Testament Quechua Wanca（QVW）

Israel lädup puydïnincunap cuntranmi willacun

1Chaypïtam yaꞌa nilá: “Jacobpa puydïnincuna,

Israelpa puydïnincuna uyalipäcuy.

¿Manachun tantiapäcunqui mayannin

allin ütac mana allin caśhantapis imatá?

2Amcuna allincäta ćhïniculcanquimá;

mana allincätañatacmi ichá ama-pacha niyalcanqui.

Nunäcunap aychanpïtamá utanta shiltayalcanqui;

tullunpïtañatacmi aychanta lawćhayalcanqui.

3Awari, malcäpa aychanta lacsayalcanquimá;

tullunpïtamá aychanta lawćhayalcanqui;

tulluntamá paquiyalcanqui.

Calducta yanunayquipänümá, mancaman aychanta

jitalpunayquipänümá paquiy pawälunqui.

4Chaynu cayalcal Tayta Diosta ayaculcaptiqui,

¿pay uyaliycuśhunquichun imatá?

Chaynu mana allincunallacta lulapäcuśhayquipïta

manamá licaytapis munapäcuśhunquichu” nil.

5Malcäta pantachï willacücunätam Tayta Dios nin:

“Amcuna maćhaycälichishüniquitá ‘jawcalla caycuy’ nipäcunquimá.

Micunayquipä mana uycälishuptiquiñatacmi ichá

ñacayćhu capäcunanpä nicuyalcanqui.

6Chaymi am willacücäta tutapächishunqui;

amta yanawyayämanmá muyüchishunqui.

Manañamá willacuycunacta ćhasquipäcunquiñachu

Am willacücunäpi intica pacacuycunꞌamá;

muyuncäpis tutapanꞌamá.

7Am willacücuna, pinꞌayćhümá uyshulapäcunqui;

am licacücunaca, pinꞌayćhümá licalipäcunqui.

Tayta Dios imallactapis manaña niycuptinmá

ima ninayquipäpis manaña canꞌañachu.

8“Yaꞌañatacmi ichá Tayta Diospa Ispiritunwan,

cällanman licaycuyninwan, chaynütac munayninwan juntäśha cayá.

Chaymi niycüman Jacobpa ima mana cäsucuynin caśhantapis,

Israelpa ima juchan caśhantapis.

9Chayurá má, Jacobpa puydïnincuna,

Israelpa mandänincuna cayta uyalipäcuy.

Tincüninman licaycuycäta amcuna millachiculcanquimari;

rasun allincäta iwipäcunquimari.

10Sionta yawarcunawanmá śhalcachipäcunqui;

Jerusalenta mana allin lulaycunallawanmá ishpichipäcunqui.

11Am licaycü nunacunaca,

mayanninman śhalcunayquipäpis mañapacuyllactamá ćhapayalcanqui.

Am sasirdüticuna, illayllapämari yaćhaycälichinqui.

Am willacücuna, pägullapämá willaculcanqui.

Ñatac Tayta Diosman chalapacütuculculmi nipäcunquilä canpis:

‘Tayta Dios yaꞌanchicwanmá cayan.

Ima mana allinllapis manamari ćhaycamäśhunchu’ nil.

12Chayurá amcunap janayquimá,

äräśhanu Sion licalinꞌa.

Pampaman muyüchishamá Jerusalen canꞌa.

Alawana wasi caśhan ulꞌupis jaćhacunap juntäśhallañamá cacunꞌa” nil.