1Chay muyuncuna chunyäcunäwan
pasaypi chaquicunäpis cushiculcanꞌamá;
mayćhüñapis wayta waytayaptinmá cala pampacunäpis cushiculcanꞌa.
2Awari, sumä-sumäta waytapäculmá cushicuypi taquipäcunꞌa.
Chay chaqui chunyäcunaca Libano,
Carmelo ulꞌucunänülämi ütac Saron pampaćhu
tuqui-tuqui birdi cäśhancänülämi capäcunꞌapis.
Chayćhümá Tayta Diospa sumä cäninta,
Tayta Diosninchicpä chipipicyayninta licapäcunꞌa.
3Chayurá pishipäśha cäcunäta callpanchaycuy;
wällïsha cäcunäta yanapaycuy.
4Manchat-manchat śhunꞌuyücunäta niycuy:
“Ama manchaculcaychu; callpanchacuy.
Tayta Diosniqui salbaśhunayquipäñamá śhayämun;
ćhïnicüniquicunacta tincüninman
camacaycünanpäñamari śhayämun” nil.
5Chayćhümá aplacunaca licapäcunꞌa;
mana uyalï upa linlicunäpis uyalipäcunꞌa.
6Wishtucunäpis luychunümá paćhcaycaćhapäcunꞌa;
mana limäcunäpis cushicuypïmá taquipäcunꞌa.
Chunyäcunäpïpis pucyucunamá paćhyapämunꞌa;
chaqui allpacunäpapis achca-achca yacucunamá linꞌa.
7Chunyäćhu chaqui allpacunapis ućha-ućhacunamanlämá muyunꞌa.
Pucyucunämá chaqui-chaqui allpacunäta maćhaycachinꞌalä canpis.
Atücunaca chunyä yaćhaśhancunäćhüpis
śhuꞌuśhcunawan tuturacunalämá wiñanꞌa.
8Chay chaqui chunyä allpap jatun caminulämá pasanꞌapis.
Chaypa śhutin Chuya Caminu nishamá canꞌa.
Chaymi chay caminunpa
mana allincunaca nï pasapäcunꞌachu;
luclucunäpis chayninpa manamá pulipäcunꞌachu.
Tayta Diospa caminunćhu pulïcunällamá chayninpa pasapäcunꞌa.
9Chayćhu liyuncunäpis manañamá canꞌañachu;
ima juyu uywacunapis chayninpa manañamari pasanꞌachu.
Libraycuśha cäcunällañamá chayninpa pulipäcunꞌa.
10 Tayta Diospa libraycuśhan cäcunällañamá cutipämunꞌa;
sumä cushicuypi taquishtinmari Sionman cutipämunꞌa.
Sumä cushicuywan allincällañamá paycunaćhu timpuycunꞌa;
Ñacaycunawan llaquicuycunacá chincacunꞌañamá.
Who We AreWhat We EelieveWhat We Do
2025 by iamachristian.org,Inc All rights reserved.
