Levitico 5 - Old Testament Quechua Wanca（QVW）

Anlapä licaśha cäcunäpïmi nin

1“Sïchuśh mayanpis licaśhanpi ütac uyalishanpi tistïgunu śhaycachiptin mana cärayculꞌa juchayüñam. Chay juchanpa wayuyninta apaycunꞌamari.

2“Chaynütacmi mayanpis yataycülunꞌa anlapä licaśhacta: munti uywa ütac mansu uywa wañüśhacta, ütac wañüśha culuctapis yataycülulꞌa anlañam canꞌa. Masqui mana tantial yataycülulpis mana allintañamari lulälun.

3“Chaynütacmi mayanpis mana tantiacul anlapä licaśhacta yataycülunꞌa. Chay lulaśhanta tantiacülulmi ichá mana allinña caśhanta licacunꞌa.

4“Chaynütac mayanpis mana sumäta pinsaycul allinta ütac mana allinta lulananpä limalicuycunacta limaliculꞌa mana allintam lulälun. Ñatac tuquicta tantiacülulꞌa limalicuśhanpi juchayüñam.

5“Chayurá caycunaćhu mayanpis mana allinta lulälulꞌa chay juchacuśhantam willacunꞌa.

6Jinalculmi juchan chuyanchäśha cananpä Tayta Diosman uycunꞌa ćhina uwishta ütac ćhina capishta. Chaytam juchan chuyanchäśha cananpä sasirdütica uycunꞌa.

7“Sïchuśh Tayta Diosta uycunanpä uwishta lantiyta mana atipalꞌa ishcay ulpaytam ütac ishcay mallwa ulpaytam uycunꞌa. Jucninmi juchayqui chuyanchaycuśha cananpä canꞌa, juccätañatacmi cañaywan uycunayquipä.

8Chay chuyanchaycuśha cananpä cä ulpaycunäta sasirdütimanmi apaycunꞌa. Payñatacmi puntallactá cañaycunapä cä ulpaycäta cañaycunꞌa. Cañaycunanpämi ulpaypa cuncanta iwïlunꞌa umanta mana pasachillal.

9Chaypïta chuyanchananpä cä uycuśhanpa parti yawarninwanmi uycuna patacpa juc lädunman chächuycunꞌa. Puchü yawarcätañatacmi uycuna pataccäpa ćhaquinman apchïlunꞌa. Cay canꞌa juchan chuyanchaycuśha cananpä uycunam.

10Chaypïta juc ulpaycätañatacmi camachishämannu cañaycunꞌa. Chaynüpam chay juchanpïta sasirdütica chuyanchaycachinꞌa.

11“Sïchuśh ishcay ulpayta ütac ishcay mallwa ulpayta lantiyta mana atipalꞌa Tayta Diosman juchanpïta uycunꞌa ishcay quïlu allinnin fïnu arinactam. Juchanpi uycuna captinmi asaytictawan insinsiucta ama jucllachaycunꞌachu.

12Chay arinactam sasirdütïman apaycunꞌa. Payñatacmi yalpana uycuy cananpä apti arinacta uycuna patacćhu uycunꞌa, Tayta Diospa cañaywan uycuśhantawan cuscacta. Cay canꞌa juchanpi uycuymari.

13Chaynüpamá mayanpis chuyanchaycuśha cananpä sasirdütica uycunꞌa. Chay parti puchücäñatacmi ćhacla micuycuna uycuśhancäćhünüpis sasirdütipä quïdanꞌa” nil Tayta Dios nin.

Juchanpi uycapäcunanpämi nin

14Chaypïtam Moisesta Tayta Dios nin:

15“Sïchuśh mayanpis mana munayal chuyapa Tayta Dios licaśhancunäta mana allinta lulälulꞌa ipanchälunñam. Chaymi chay jucha lulaśhanpi allinnin ulu uwishta apaycunꞌa. Chay uwishpa ćhanin canꞌa carpaćhu juchacunapä mïdinapä cäcämannümi.

16Chaynütacmi chay nunaca chuya cäcunäpi juchapacuśhanpi lluyta cutiycachil, ćhuncapi picha parti ćhanin mastalä sasirdütiman uycunꞌapis. Payñatacmi uycuśhan ulu uwishcäwan chuyanchaycachinꞌa. Chaynüpamari pampachaycuśha canꞌa.

17“Chaynütacmi Tayta Diospa nishanta mayanpis mana tantiayal, mana allinta lulälulꞌa juchayüña cayan. Chay juchanpa wayuynintamari apaycunꞌa.

18Chaymi chuyanchaycuśha cananpä sasirdütiman apaycunꞌa allinnin ulu uwishninta; ütac illayćhüpis chaypa ćhaninmannu. Chayta sasirdütica uycuptinmi chay nuna mana tantial mana allin lulaśhanca pampachaycuśhaña canꞌa.

19Chaynümari Tayta Dios nishanta jalutaculcul mana allinta lulaśhanpi uycapäcunan” nil.