1Tayta Diosta alawapäcuy.
Chuya allin nunacunap juntunacuynincunaćhümi
llapan śhunꞌüwan Tayta Diosta alawäśhä.
2 Tayta Diospa lulaynincuna sumä-camamá.
Chaycunacta licäcunäpá chaycunallaćhümá śhunꞌun cayan.
3Maynu tuquish sumä-sumämá lulaynincuna.
Tincüninman-cama licaycuynin wiña-wiñaypämá.
4Sumä-cama lulaycunactamá yalpalcunapä lulaycula.
Tayta Diosꞌa llaquipayniyümá, sumä allinmá.
5Allinpä licachïnincunamanꞌa micuyta uycunmá.
Limalicuśhantapis wiñaypämá yalpalayan.
6Munayninwan lluy lulaśhancunacta nunancunamanmá licaycachila.
Juc nasyuncunap allpantamá paycunaman uycula.
7Paypa lulaycuśhancunaca rasuncämá, tincüninmanmá.
Lluy yaćhachicuynincunapis chalapacunamá,
8imaycamapis wiña-wiñaypä tacyaycachishamá,
rasuncällawan cällanman-cama allin lulaycuśhamá.
9Pägayculmi malcanta juluycula.
Limalicuśhanta wiña-wiñaypämi tacyalpachila.
Śhutinꞌa chuyamá, sumä manchaymá.
10Yaćhaycäpa allaycuyninꞌa Tayta Diosta manchacuymi.
Yaćhachicuyninta cäsucücunämi allin tantiayniyu capäcun.
¡Tayta Dios wiña-wiñaypä alawäśha cachun!
Who We AreWhat We EelieveWhat We Do
2025 by iamachristian.org,Inc All rights reserved.
