1 Cronicas 4 - Old Testament Quechua Wanca（QVW）

Judapa milaynincuna

1Judapa chulincunam: Fares, Hezron, Carmi, Hur, Sobalpis.

2Sobalpa chulinñatac Reaia, Reaiapañatac Jahat, Jahatpañatac Ahumaiwan Lahad. Lluy paycunamari Zora ayllucuna capäcula.

3Etampa chulincunañatacmi: Jezreel, Isma, Ibdas; paycunap paninmi Haze-lelponi cala.

4Penuelpa chulinñatacmi Gedor. Ezerpa chulinñatacmi Husa. Lluy paycunamari Hurpa chulincuna capäcula. Hurꞌa Efratap wamä chulinmi cala. Efratañatacmi Belenpa taytan cala.

5Tecoap papänin Asurpa ishcaymi walmin cala: Helawan Naara.

6Naarap wawincunam cala: Ahuzam, Hefer, Temeni, Ahastaripis.

7Helapa wawincunañatacmi: Zeret, Jezoar, Etnanpis.

8Cospa chulincunañatacmi Anubwan Zobeba. Paycuna Harumpa milaynin Aharhel ayllucunamari capäcula.

9Jabesta nana-nanaywan maman ishyacülulmi Jabeswan śhutichäla. Paymi lluy wawꞌi-caśhacunapïtapis sumä lisisha-lisisha cacula.

10Jabesmi israelcunäpa Tayta Diosninta mañacula: “Ama chaynu caychu, allinpä licaycamal ćhaclacunacta mas jatunta uycallämay, yanapaycallämay, mana allincunäpïpis libraycallämay mana ñacanäpä” nil. Chay mañacuśhanmannümá Tayta Dios uycula.

11Suhap wawꞌi-caśhan Quelubpa chulinñatacmi Mehir. Mehirpa chulinñatacmi Eston.

12Estonpa chulincunañatacmi: Bet-rafa, Paseah, Tehinapis. Tehinamari Nahas malcacta śhalcachïca cala. Lluy paycunamari Reca lädućhu yaćhapäcula.

13Cenazpa chulincunañatacmi Otonielwan Seraias. Otonielpa chulincunañatacmi Hatatwan,

14Meonotai. Meonotaimi Ofrap papänin cala. Seraiaspa chulinñatacmi Joab; paymi Carisim pampaćhu yaćhäcunäpa taytan cala. Chayćhu yaćhäcunaca jïrru tacäcunamari lluypis capäcula.

15Jefonepa chulinmi Calebpa, Calebpa chulincunañatacmi: Iru, Ela, Naampis. Elapa chulinñatacmi Cenaz.

16Jehalelelpa chulincunañatacmi: Zif, Zifa, Tirias, Asareelpis.

17Esdraspa chulincunañatacmi: Jeter, Mered, Efer, Jalonpis. Mered nishan chulinñatacmi casaracüla Faraonpa wamla chulin Bitiawan. Bitiaćhümi chulincuna cala: Maria, Samai, Isbapis; Isbapa chulinñatacmi Estemoa cala.

18Meredpa walminmari Faraonpa chulin Bitia cala. Jucnin walminñatacmi Juda lädu walmi cala. Payćhümi chulincuna cala: Jered, Heber, Jecutielpis. Jeredꞌa Gedorpa papäninmi, Heberñatacmi Socop papänin, Jecutielñatac Zanoapa papänin cala.

19Nahampa paninwanmi Hodias casaracüla. Payćhümi chulin cala: Garma lädu Keila, Maacaćhu cä Estemoapis.

20Simonpa chulincunañatacmi: Amnon, Rina, Ben-hanan, Tilonpis.

Isipa chulincunañatacmi Zohetwan Benzohet.

21Judapa chulin Selap chulincunañatacmi: Leca malcacta śhalcachï Er, Maresa malcacta śhalcachï Laada, jinaman Bet-asbeaćhu lïnupi lulä ayllucunaca,

22chaynütac Joacim, Cozeba lädućhu yaćhäcunaca, Joas, Sarafpis. Paycunamari Moab walmicunawan casaracalcälil Belen malcaman cuticulcäla. Caynu pasaśhanta punta isquirbïcunaca nishanćhümari niyan.

23Paycuna cutuśh wacuycunacta ñincapi luläcuna calmi Netaimćhu, Guederaćhu yaćhapäcula, mandacücäta sirbishtin.

Simeonpa milaynincuna

24Simeonpa chulincunam: Nemuel, Jamin, Jarib, Zera, Saulpis.

25Saulpa chulinñatacmi Salum, Salumpañatac Mibsam, Mibsampañatac Misma,

26Mismapañatac Hamuel, Hamuelpañatac Zacur, Zacurpañatacmi Simei.

27Simeipa ćhunca sütayu (16) walaśh chulincuna, süta wamla chulincunam cala. Ñatac wawꞌi-caśhancunap chulincuna manam achcachu cala. Chaymari Juda ayllucunänüchu achcachu nï capäcula.

28Paycunamari yaćhapäcula: Beerseba, Molada, Hazar-sual,

29Bilha, Ezem, Tolad,

30Betuel, Horma, Siclag,

31Bet-marcabot, Hazar-susim, Bet-birai, Saaraim läducunaćhu. Chay malcacunäćhümi yaćhapäcula David mandacü canancama.

32Tacsha malcachancunañatacmi picha cala: Etam, Ain, Rimon, Toquen, Asanpis.

33Chaynütacmi chay jatućha malcacunap muyülïninćhu Baalcama tacsha malcachancunapis cala. Chaycunamari paycunapäpis milaynincunapäpis yaćhapäcuśhan malcancuna capäcula.

34Wasinpa-cama Simeon ayllup puydïnincunam: Mesobab, Jamlec, Amasiaspa chulin Josias,

35Joel, Josibiaspa chulin Jehupis; Josibiasꞌa Seraiaspa chulinmi, Seraiasñatacmi Asielpa chulin cala.

36Jinaman Simeon ayllup waquin puydïnincunam: Elioenai, Jaacoba, Jesohaia, Asaias, Adiel, Jesimiel, Benaia,

37Sifip chulin Zizapis cala. Sifiꞌa Alonpa chulinmi, Alonñatac Jedaiaspa, Jedaiasñatac Simrip, Simriñatac Semaiaspa chulin cala.

38Lluy paycunamari ayllunpa-cama puydï mandacü-cama capäcula. Paycuna achca-achamanmi milälälila.

39Jinalmi uywancunapä pastucunacta ashishtin pampap inti ishpimunan lädu Gedor malcap yaycunancama ćhälälila.

40Chayćhümi jatu-jatun pampacta, sumä alli-cama pastucunacta, jawca yaćhanacta talïlälila. Chayćhu Cam caśhtap milaynincunam puntacta yaćhapäcula.

41Ñatac Judaćhu Ezequias mandacü cayaptinmari chay nishan nunacunaca śhapämula. Paycunam chayćhu Cam caśhta punta yaćhäcunäpä carpancunacta, chucllancunacta pampaman muyülächila. Jinalculmi chayćhu sumä allin pastucuna uywancunapä captin paycunaña canancama yaćhayalcan.

42Ñatac Simeon ayllup picha paćhac (500) pilyänincunam Seir ulꞌuman liculcäla, puydïninpä Pelatiasta, Neariasta, Refaiasta, Isipa chulin Uzielta ćhulaycälil.

43Paycunam chayćhu Amalec caśhtacuna puchücunäta camacaycälil canancama yaćhayalcan.