Proverbios 15 - Old Testament Quechua Wanca（QVW）

1Tuqui shimillawan limäcá maynu piñäśhactapis jawcayaycachinmi;

nanä shimiwan limäcäñatacmi ichá mastalä malluchinpis.

2Yaćhayniyücäpa shiminpïta tuqui yaćhaymi yalaycamun;

luclucunäpa shiminpïtañatacmi ichá mana allin limaycunalla yalaycamun.

3 Tayta Diospa ñawinꞌa jinantin allpäćhümá cayan;

allin mana allin nunactapis licayanmá.

4Tuqui limayca cawsayta uycü lantanümá;

mana allin limaycäñatacmi ichá pasaypi jucmanyachin.

5Luclucá taytan anyapäśhanta manamá uyalïtucunchu;

yaćhayniyücäñatacmi ichá anyapäśhanta ćhasquicun.

6Allin nunap wasinćhuꞌa imanpis manamá faltaycunchu;

juyu mana allin nunäpañatacmi ichá maychica gänaśhanpis uma nanayta apaycamun.

7Yaćhayniyücunaca limaynincunawan yaćhayllactamá talpuycun;

luclucunäñatacmi ichá pinsayllapis nï pinsalcunchu.

8Juchasapacunäpa uycuśhanta Tayta Dios millachicunmá;

allin nunacunäpa mañacuyninpïñatacmi ichá cushicun.

9Mana allin luläcunap cawsayninta Tayta Dios millachicunmá;

allin tincüllanman luläcunätañatacmi ichá cuyan.

10Allincäpi japächacücätá sumä lawćhaycunam;

lawćhaycuyta mana ćhasquïtucücá wañunꞌamari.

11 Tayta Diospa ñawillanćhu wañuycäpis sipultürapis cayaptinchun,

¿nunap śhunꞌunćhu imacuna caśhanpis mana licaśha canman imatá?

12Pasaypi jamuyäcunaca anyapänincunactá manamá cuyanchu;

yaćhayniyücunäwanpis manamá jucllachanacunchu.

13Cushisha śhunꞌuyücäpa cäranpis cushishamá;

llaquisha śhunꞌuyücäpa cäranpis jucmanyäśhamá.

14Allin tantiayniyüca yaćhaycätamá ashiycun;

luclucunäñatacmi ichá mana cäcunallacta liman.

15Mana allinllacta pasäcäpá lluy muyuncunapis llaquillamá;

cushisha śhunꞌuyücäpäñatacmi ichá imaypis cushicuylla.

16Alli cäniyu cayalpis uman tumanyäśha cawsaypïtá,

mas allin waccha calpis Tayta Diosllacta manchacuymi.

17Wira wäcacta ćhïninacuywan micuypïtá mas allinmi

imanilä micuyllactapis cuyanacul micuycuy.

18Piñacü nunaca pilyallactamá talcachin;

juclla mana piñacücäñatacmi ichá pilyacta jawcayalpachin.

19Illacunäpa pulinancá caśhawan inćhaśhanumá cayan;

allin nunap pulinancäñatacmi ichá tuqui pulipaśhlla cayan.

20Yaćhayniyu chulica taytanta cushichinmá;

luclu wawiñatacmi ichá mamanpa pinꞌaynin.

21Luclucunaca mana fisyuyu lulaynincunapi cushicunmá;

tantiayniyücäñatacmi ichá cawsayninta allichacun.

22Mana mayanpis limapä nuna captinꞌa lulananpä caśhanca manamá lulacacunchu;

achca limapä nunacuna captinñatacmi ichá allin yaluycunꞌa.

23Tuqui shimiwan niycücá cushichinmá;

timpullanćhu niycücá mas allinlämari canpis.

24Yaćhayniyüca cawsaycäman lï caminupamá ishpiyan;

chaynüpamá wañücuna canancäman jiꞌalpunanpïta libracun.

25Nunatucücunap wasinta Tayta Diosmi mana cäman muyuchin;

japanyäśha walmicunap ćhaclancunactañatacmi ichá ñawillanćhu caycachin.

26Mana allin pinsaycunäta Tayta Dios millachicunmá;

allin limaycunäñatacmi ichá śhunꞌunpänu chuya.

27Quiquillanpä imactapis munayäcunaca wasintinmá pampaman muyupäcunꞌa;

yanꞌalpïta masta ćhasquiyta ćhïnicücämi ichá allin cawsanꞌa.

28Allin śhunꞌuyu nunaca imacta limananpäpis tuquictalämi tantiaycun;

mana allin nunäñatacmi ichá shimin chalaśhanta liman.

29Juyu mana allin nunacunäpïta Tayta Dios calućhümi cayan;

allin nunacunap mañacuynintam ichá ćhasquiycun.

30Allin ñawiwan licaycuyca śhunꞌuctamá cushichin;

allin willacuyta willaycuyca muśhü callpactamá licalichin.

31Allin cawsananpä anyapaycuyta ćhasquicücá

yaćhayniyücunäwanmá yaćhanꞌa.

32Limapäśhanta jalutacücá quiquillanmi mana allinninta ashicun;

limapäśhanta uyalicücäñatacmi ichá tantiayta ćhasquiycun.

33 Tayta Diosta manchacuywan cäsucücá yaćhaycätamá taliycun;

altuman juluycuśha canapä manamá nunatucunachu.