Salmos 105 - Old Testament Quechua Wanca（QVW）

Israelcunäpa allinninpämi Tayta Dios lulaycun1Cro 16.7-22.

1 Tayta Diosta sulpäta uculcay; śhutinta altuman julaycäliy.

Sumä lulaynincunapïta jinantin malcacunäćhu willaculcay.

2Alawapäcuy; taquicunawanꞌari alawapäcuy.

Sumä-cama lulaynincunapïta willaculcay.

3Sumä chuya śhutinta lisishayquipïtari alawaculcay.

Tayta Diosta ashïcuna llapan śhunꞌuyquiwan cushiculcay.

4 Tayta Diostawan munaynintari ashiycäliy.

Payllactari imaypis ashiycäliy.

5Milagrucunacta, äśhalayllaman camana lulaśhancunacta yalpalcäliy.

Tincüninman licaycuynincunacta yalpalcäliy,

6uyway nunan Abrahampa milaynincuna,

Jacobpa aclacuśhan chulincuna.

7Paymá Tayta Diosninchic.

Jinantin allpäćhümá camachicuynin cayan.

8Limalicuśhancäta imaypis yalpalayanmá.

Walanganpi milaycuna pasaptinpis manamá unꞌaycunchu.

9Abrahamman limalicuśhanta,

Isaacman tacyalpachishanta manamá unꞌaycunchu.

10Jacobwanmi camachicuynincunacta tacyalpachila.

Wiña-wiñaypä limalicuynin cananpä Israelwanmari caynu tacyalpachila:

11“Canaan nishan allpactam uycuśhayqui.

Tücäniquipämá uycuśhayqui” nil.

12Paycuna masqui ashllaylla cayalcaptinpis,

purinquichunu cayalcaptinpis,

13malcan-malcan pulicü cayalcaptinpis,

mandacünin-mandacünin pasayalcaptinpis,

14mayanllan ñacachinallantapis manamá cunsintiyculachu.

Aśhwanpam mandacücunäta anyapaycula:

15“Japächaśhäcunäta amam tupaycapäcunquichu.

Willacünïcunacta amamá imanaycullanquipischu” nil.

16Cay pachäman micuy wanactamá ćhächimula.

Lluy micuycunactamá chincächila.

17Chay micuy wanay pasanan puntantañatacmi Joseta ñawpachila.

Chay uyway nunapä lanticulcäśhancätamari puntachila.

18Cadinawanmá ćhaquinta cadinäla.

Jïrru cadinawanmá cuncapïpis cadinäśha cala.

19Chaynu Joseta imaymana ñacaycunap

Tayta Dios pasaycachila allincäman julunanpämá.

Chaynu pasaycachila Jose nishanca lulacacunancamamá.

20Mandacücämi Joseta caćhaycachila,

malcap puydïninmi libriña cananpä caćhaycachila.

21Jinalculmá wasinćhu licaycünin cananpä ćhulaycula.

Lluy cänincunactamá maquinman ćhulaycula.

22Puydïnincunactapis, awquishnincunactapis

yaćhaycachinanpämá ćhulaycula.

23Chaypïtam Egiptuman Israel śhamula.

Cam allpanćhümi Jacob yaćhala.

24Tayta Diosmi malcanta achca-achcaman milachila.

Ćhïnïcünin Egiptocunapïtapis mas achca-achcamanlämari muyuycachila.

25Ñatac Egipto nunacunäpä śhunꞌunta lumiyächila Tayta Diospa

malcanta ćhïnicunanpämi; nunancunacta ipanchananpämi.

26Chaypïtam nunan Moisesta aclacuśhan Aarontawan caćhala.

27Paycunawanmá sumä lulaynincunacta camalaycachila.

Sumä milagrucunactamá Cam allpäćhu lulaycula.

28Tayta Diostacmi Egiptumanpis tutawyayta caćhamula.

Jinaptinpis paycuna caćhaycunanpä manamá uyalïtuculcälachu.

29Yacunpis yawarman muyulculmá

lluy challwancunacta camacaycüla.

30Jinantin malcanmanmá ucucuycuna lancäla,

aśhta mandacücäpa puñunanpä cäcunämanpis mallülamá.

31Tayta Dios limalcullaptinmá achca-achca

tanracunawan caćhucü chuspicunapis mallüla.

32Tamyacta tamyachimunantá luntuctawan

latayä ninactamá jinantin allpäman ćhächimula.

33Chaymi üba, ïgus talpuynincunacta camacaycüla.

Jinantin malcaćhümá lantacunäta paquiypa pawäla.

34Limalcullaptinmá fintaytapis mana atipana

achca-achca paćhcaśhcuna mallülälimula.

35Chaymi ćhaclaćhu wiñäcunäta lluy-lluy camacaycälälin.

Jinantin allpaćhu ima wiñäcunätapis chincälälichinmá.

36Jinantin Egiptoćhu nunacunäpa

wamä chulincunactamá camacaycüla.

Chay wamä cushicuynintamari camacaycüla.

37Chaypïtam nunancunacta julaycamula illaynin,

ürun ipipacälälisha-camacta.

Paycunaćhu manamá mayan ayllullanpis mitcaculachu.

38Chaynu yalapäcuptin Egipto nunacunaca cushiculcälamá.

Chay israelcunämari sumä-sumäña manchäśha cayalcäla.

39Tayta Diosmi pucutayta maśhtaycula malcanta licaycunanpä,

ninactañatacmi tutanpa acchiycunanpä.

40Micuyta mañaculcaptin llutuctamá caćhamula.

Janay pachäpi tantawanmá maćhaycachipäcula.

41Wancacta laꞌalaycachiptinmá yacupis yalaycamula.

Mayunümá chunyäcäpa liycula.

42Caynu lulaycula nunan

Abrahamman limalicuśhanta yalpalmá.

43Chaynüpamá Tayta Dios nunancunacta cushishacta julaycamula.

Chaynüpamá aclaśhancunaca cushicuypi apalishtin yalapämula.

44Juc nasyuncunap allpancunactamá uycüla.

Juc malcacunap talpuynincunactamá duyñuchacaycälila.

45Chaynu pasaycachila camachicuynincunacta

śhunꞌunman ćhulaycälinanpämá;

nishancunäta lulaycälinanpämá.

¡Tayta Diosta alawapäcuy!