Deuteronomio 29 - Old Testament Quechua Wanca（QVW）

Israel caśhtacunaca Moab nasyunćhu cayalcaptinmi camachicuyta yalpachin

1Moab nasyunćhu Israel caśhtacunaca cayalcaptinmi Tayta Dios Moisesta nila paycunaman limalicuśhanta yalpachinanpä. Chaynu limalicula Horeb ulꞌüćhu cayaptinlämi.

2Chaymi Israel caśhtacunäta juntuycul Moises nin: “Egiptoćhu cayalcaptiqui Faraoncäwan, lluy puydïnincunawan, jinantin malcantinwan Tayta Diosniqui ima lulaśhantapis licapäculanquim.

3Sumä lulaycunacta, jatun milagrucunacta, äśhalayllaman camanacunacta lulaśhanta amcuna ñawiquiwanmari licapäculanqui.

4Ñatac canancamapis Tayta Dios manamá tantiayta uycälishulanquichu imapä caśhantapis tantiaycälinayquipä. Chaymi licayalcalpis mana licapäcunquichu, uyaliyalcalpis mana uyalipäcunquichu.Rom 11.8.

5Chay tawa ćhunca (40) wata jinantin chunyäcäpa puśhayaptïpis manamari müdanayquipis, nï śhucuyniquipis camacälachu.

6Chayćhu manatacmá tantactapis micapäculanquichu, bïnuctapis nï ima puꞌuśha aswactapis upyapäculanquipischu. Caycunacta lulaycula Tayta Diosniqui caśhanta yaćhaycälinayquipämari.

7“Cay allpäman ćhämuptinchicmi yaꞌanchiccunawan pilyananpä HesbonNum 21.21-30. malcap mandacünin Sehonwan, BasanNum 21.31-35. malcap mandacünin Og śhapämula. Chay pilyućhu yaꞌanchicmari llallïlanchic.

8Chaynu allpancunacta maquinchicćhu cayächilñam Ruben, Gad aylluman, jinanan Manasespa ćhawpi ayllunman tücaycachilanchic.Num 32.33.

9Chayurá cay limanacuycunacta lulayman sumäpa ćhulaycäliptiquiꞌa ima lulapäcuśhayquicunäpis allinmi caycunꞌa.

10“Canan Tayta Diospa ñawpäninćhümi amcuna cayalcanqui: Ayllucunäpa puydïniquicuna, yaśhayquicuna, mandäniquicuna, jinantin Israel malcaca,

11chuliquicuna, walmiquicuna, malcayquićhu yaćhä juc caśhtacuna, yamta yacu apamüniquicunapis.

12Lluymi juntunacüśha cayalcanqui Tayta Diosniqui amcunaman limalicuśhanta limalicuywan awnipäcunayquipä.

13Cananpïtá Tayta Diospa malcanñamari capäcunqui; payñatacmi awquilluyqui Abrahamman, Isaacman, Jacobman limalicuśhannu Tayta Diosniqui canꞌa.

14Ñatac Tayta Diosꞌa cay limalicuyta amcunallawanchu manam lulayan;

15sinuꞌa canan cäcunäwanpis jinaman ipa śhamücunäwanpis lulaycuyanmi.

16Amcuna yaćhapäcunquim Egiptoćhu imanuy cawsaśhanchictapis. Yaćhäpäcunquitacmi śhamuśhanchic malcacunäpa imanuy pasamuśhanchiccunactapis.

17Licapäculanquitacmi chay malcacunap alawaśhan millachicuy taytachancuna cullupi, lumipi, illaypi ürupi capäcuśhanta.

18Amam amcunaćhu wayapapis, walmipis, ayllunpis ütac milaynincunapis chay malcacunap taytachancunaman alawä muyucalcälinꞌachu Tayta Diosninchicta ipanchayculꞌa. Yanꞌalätac amcunaćhu ćhacćhä bininuyu sapinu ütac ajinjunu cayalcanquiman.Heb 12.15.

19Sïchuśh mayanniquipis cay limalicuyćhu ñacaycunäta uyaliyalpis śhunꞌuyquićhu alawacunquiman: ‘Śhunꞌú munaśhanta lulacuptïpis imapis allinmi yalaycamanꞌa’ nil. Chaynu cä nunacunaca lluy malcantintam mana cäman muyüchinꞌa.

20Chaynu nunacunäta Tayta Dios manamá pampachaycunꞌachu. Aśhwanpam sumä piñacülul isquirbishanćhu cä ñacaycunäta payman ćhaycachinꞌa; chay nunap milaynincunactapis Tayta Dios cay pachäpïta chincächinꞌam.

21Tayta Diosmari chay nunacta Israel caśhtaćhu ayllucunapïta japächaycunꞌa mana allinpä licaycuśha cananpä. Chay nunactam ñacachinꞌa limalicuy librućhu isquirbïsha lluy ñacaycunawan.

22“Chaymi chuliquicuna, milayniquicuna, calupi śhamü juc caśhtacunäpis licapäcunꞌa malcayquita imaymana sumä ishyaycunawan, mućhuchicuywan Tayta Dios camacaycüśhanta.

23Chayurá jinantin malcäćhu asufrilla, caćhilla, cañäśhallamari cacunꞌa. Chaymi talpunapäpis mana bälinꞌachu, nï imapis wiñanꞌachu, nïtac ulallapis canꞌachu. Tayta Dios sumä piñacuyninćhu Sodomacta, Gomorracta, Admacta, Zeboimta camacaśhannümi canꞌa.

24Jinaptinmi lluy malcacunaca tapuculcanꞌa: ‘¿Imapïtam Tayta Dios cay malcacta caynu camacaycülun? ¿Imapïmi ancha-anchap piñacülun?’ nil.

25Nilculmi nipäcunꞌa: ‘Caynu piñacülun awquilluncunacta Egiptopi julalcamul Tayta Dios limalicuśhancäta mana cäsuculcaptinmari.

26Paycuna mana lisishan, imaćhüpis mana yanapäcü taytachacunamanmari uyshuycälil alawapäcula.

27Chaymi cay malcawan Tayta Dios sumä-sumä piñacüla. Jinalmi cay librućhu isquirbïsha lluy mana allincunäwan camacaycüla.

28Chaynu Tayta Dios anchap piñacülulmi allpanpïta wicapalcul juc malcaman chapiycülun canan licaśhanchicnüpis’ nil.

29“Cayanmá mana yaćhaśhanchic pacäśha cäcuna; chaycunacta Tayta Diosllam yaćhan. Cayantacmi yaꞌanchiccuna, chulinchiccuna wiñaypä lisishanchiccuna; caycunañatacmi cayan lluy camachicuycunacta lulaycunapä.