2 Samuel 24 - Old Testament Quechua Wanca（QVW）

Davidmi sinsachin 1Cro 21.1-17

1Juc punćhümi Tayta Dios yapatac israelcunäpä sumä piñacüla. Chaymi Davidta jicutayta ćhapala:1Cro 21.1. “Jinantin Israelćhu Juda lädućhu ayca nuna capäcuśhantapis yaćhanayquipä sinsucta lulay” nil.

2Niptinmi mandacü David paywan cusca cä pilyänincunap puydïnin Joabta nin: “Canan jinantin Israel caśhtap aylluncunaman Danpïta allacuycul Beersebacama liy. Chayćhümi sinsamunqui ayca nunacuna pilyananpä capäcuśhantapis yaćhanäpä” nil.

3Niptinmi Joab: “Tayta Diosniqui cay nasyunćhu nunacunäta paćhac (100) cuti mastalä milaycachinanta yaćhaycümi. Am mandacüní taytalläpis milaśhanta licaycunquimari. Ñatac ¿imapätá sinsachiyta ćhapanqui?” nin.

4Niyalpis mandacücäpa nishantam Joab pilyäcunäpa puydïnincunawan lulaycapäcunan cala. Chaymi mandacücäpa dispächunpi yalupäcula israelcunäćhu ayca nunacuna capäcuśhantapis yaćhapämunanpä sinsachila.

5Jinalmi Jordan mayucta chimpalcul sinsayta allaycapäcula pampap ćhawpinćhu cä Aroer malcaćhu; chaypïta Gad lädupi aśhta Jazer malcäcama sinsala.

6Chaypïtam Galaadćhu, Hodsićhu sinsapäcula; jinaman Danjaanćhu, Sidonpa lluy muyulïnincunaćhüpis sinsapäculam.

7Chaypïtam sumä murälläśha Tiro malcaćhu, jinaman Canaan lädu Hev läducunäpa lluy malcancunaćhüpis sinsalam. Chaypïta Judapa Neguev lädućhu cä Beerseba malcaćhüpis sinsalam.

8Chaynu lluy malcacunäta sinsayta camacalculmi isun quilla, ishcay ćhunca muyuntalä Jerusalenman cutipämula.

9Chayćhümi mandacücäman ayca nuna capäcuśhantapis Joab willaycula: Jinantin Israelćhu pusä paćhac walanga (800,000) nunacunam pilyananpä cacula; Judaćhüñatacmi picha pachac walanga (500,000) nunacuna capäcula.

10Ñatac chaynu ayca pilyäcuna caśhantapis sinsachishanca mana allin caśhantam David tantiacülun. Chaymi Tayta Diosta nin: “Jatun juchactam lulällá; luclu-yupaymi lulällá. Ama chaynu callaychu Tayta Diosllay, cay nunallayquip juchanta pampachaycallämayꞌari” nil.

11Ñatac David imaypis tapucula Diospa willacünin Gad nunactamari. Chaymi chay wäla manaläpis śhalcapacuptin Tayta Dios willacünin Gadwan Davidman willaycachila:

12“Davidman willaycamuy yaꞌa Tayta Dios caynu nishäta: ‘Cay quimsa mućhuchicuycäpïta jucninta aclaycuy chaywan mućhuchinacpä’ ” nil.

13Niptinmi Davidman lilcul Gad nin: “¿Mayannintam aclanqui? ¿Malcayquiman quimsa wata intïru micuy wana ćhämunantachun? Ütac ¿ćhïnicüniqui quimsa quilla aticaćhaśhuptiqui ayicaćhaytachun? Ütac ¿malcayqui quimsa muyun juyu ishyaywan ñacanantachun aclanqui? Sumäta tantiaycul aclaycuy caćhamänïta imacta niycunapäpis” nil.

14Niptinmi David nin: “Canan jatun llaquićhümi cacuyällá. Nunacunäpa maquinman palpunäpïtá mas allin canman Tayta Diospa maquinman palpuycuymi. Paypa llaquipäcuyninꞌa jatu-jatunmari” nil.

15Chaymi chay wälapïta aśhta unanchaśhan muyuncäcama jinantin israelcunäman juyu ishyayta Tayta Dios caćhamula. Jinaptinmi Danpïta aśhta Beersebacama anćhish ćhunca walanga (70,000) nunacuna wañülälila.

16Chaypïta anjilca Jerusalenta camacaycüśha nicuyaptinmi chay nunacunäta Tayta Dios caśhan llaquipaculcun. Chaymi anjilcäta nin: “¡Caćhaycuy! Amaña wañuchiychu” nil.

Tayta Diospa anjilnin cayäla Jebus lädu Araunap ïran lädunćhümari.

17Chay anjilca mućhuchishanta licälulmi Tayta Diosta David nicuyan: “Yaꞌami mana allinta lulällá. ¿Cay uwishcunaca ima juchayümi capäcullan? ¡Yaꞌami juchayüca callá! Chayurá ama chaynu caychu, yaꞌactawan ayllücunacta mućhuycachillämay” nil.

Uycuna patactam David śhalcachin 1Cro 21.18-27

18Chay muyunllam David caśhanman willacü Gad cutilcul nin: “Jebus lädu Araunap ïranćhu Tayta Diospa juc patacta śhalcachipuy” nil.

19Chaynu Gadwan Tayta Dios nichishanmannüllam David lulaycula.

20Araunañatacmi licaycaćhaśhanćhu licälun mandacü David pilyänincunawan pay läduman śhapämuśhanta. Chaymi talipalcul puntanman unꞌulacuycul nin:

21“Mandacü taytallay, ¿cay nunallayquita imapïmi watucaycallämanqui?” nil.

Niptinmi David: “Cay ïrayquita lantïmi śhayämú. Chayćhümi Tayta Diospa juc patacta lulaycapuśhä wañuchicü juyu ishyayca malcäćhu śhaycunanpä” nin.

22Niptinmi Arauna nin: “Mandacü taytallay, lluy munaśhayquita chalay jinalla. Cañaywan uycunayquipäpis cayćhu wäcacunapis cayanmi. Walachinayquipäpis jurquitacunawan yügucunapis cayanmi.

23Lluy caycunacta am mandacü taytallämanmi uycuc. ¡Tayta Diosniqui allinpari licaycuśhunqui!” nil.

24Niptinmi mandacü David nin: “Chaynu dinbaldilla manamá canmanchu. ¿Imam ćhaninman tincütam pägaśhayqui? Illaynïpa ćhanintamá Tayta Diosman cañaywan uycüman” nil.

Chaynüpam ïractawan uywacunäta picha ćhunca (50) illaywan David lantila.

25Chayćhu juc patacta lulayculmari Tayta Diospä cañaycapula, jinaman allin cawsaśhanpi uycunactapis uyculam. Jinaptinmi Tayta Dios malcacta llaquipaycul israelcunäpïta wañuchicu juyu ishyayta chincächila.