Esdras 9 - Old Testament Quechua Wanca（QVW）

Israel lädup mana allin lulayninpïtam Esdras mañacun

1Chaynu lulayta camacäluptïmi puydïcunaca aśhuycul nipäman: “Israel läducunaca aśhta sasirdüticunäpis, levitacunäpis manam japächaculcanchu anla millachicuy lulä Canaan, Het, Ferez, Jebus, Amon, Moab, Egipto, Amhor läducunäpïtapis.

2Chay malcayu wamla chulincunawanmi quiquincunapis chulincunapis casaracälälin. Chaynüpamari Tayta Diospa chuya malcanta millachicuyman ćhulälälin. Chaynu millachicuy lulayta puydïcunäwan caminaycücunälämari puntacta lulaycüca cayalcanpis” nil.

3Chayta uyalïlulmi llaquicuypi müdanäcunacta laćhyacuyälá, ächätapis śhapläcunactapis chutacücuyälá. Sumä llaquisham pampäman taycucuyculá.

4Chaynu prïsu caśhanpi cutimücunaca mana allin lulaśhanpïtamari, Israelpa Tayta Diosnin nishanta cäsucücunaca muyülïnïman aśhuycäliman. Yaꞌañatacmi tardinpa Tayta Diosta uycuna üracama sumä llaquisha täcuyälá.

5Chay uycuna ürañam llaquisha caśhäpïta śhalcuculcul müdanäcunapis laćhyäśha-ima unꞌulacuycul maquïtapis altuman chacchalcul Tayta Diosnïta mañaculá,

6cay nil:

“Tayta Diosnillay, sumä pinꞌacüśha imanaytapis mana atipalmi anman licalcuyta nï atipallächu. Mana allin lulaynïcunawanmari ñitichicälälillá; juchäcunamari janay pachäcama ćhälun.

7Awquillücuna timpupïmi canancama sumä juchallaćhu cawsapäculá. Cay mana allin lulaynïcunapïmari juc nasyuncunap mandacünincunap maquincunaman yaꞌacuna, mandacünïcuna, sasirdütïcuna ćhulaycuśha capäculá. Chaymi ispädawan camacaycäläliman, waycäläliman, prïsu puśhacalcäman. Chaynüllam canancamapis cayalcá.

8Chaynu cayalcaptïpis Tayta Diosnillay, cananꞌa llaquipayniquitam ash timpullapäpis camalaycälichimanqui. Waquinnïcunactamari libricta puchuycälichimanqui; chuya caśhanmanmi jaluycälichimanquipis. Taytallay, amllam acchicta licaycälichimanqui. Uyway nuna cayalcaptïmi cawsayta cutiycälichimanqui.

9Tayta Diosnillay, uyway nunanu sirbipacuyalcaptïpis chayćhu manam caćhaycapämälanquichu. Aśhwanpam llaquipayllayquiwan Persia nasyunpa mandacünincunawanpis allinpä licaycachimälanqui. Am Tayta Diospa alawana wasinta śhalcachipäcunäpäpis, murällancunacta pilapäcunäpäpis callpanchaycälimälanquim. Jinaman Judaćhu Jerusalenćhu anmi ñawillayquićhu caycälichimälanqui.

10Canan Tayta Diosnillay, ¿imactañamá limalcullämanpis caynu mana allinlla lulaśhäcunapïta? Camachicuyniquita manamari cäsupäculächu.

11Awari, willacü nunayquicunamari caynu nipämäla: ‘Yaćhä yaycunayquipä cä malcacunäćhu mana allin lulä nunacunallam juchacuyalcan. Pasaypi anla millachicuy lulaycunallamari chaspuyalcan.

12Chaymá chuliquicuna chay malcacunäpa wamla walaśh chulincunawan ama casaraculcanꞌachu. Amatacmi chay malcacunaca jawca allin caycälinanpä imallactapis ashiycälinquichu. Sïchuśh chaynu cawsalꞌa amcuna sumä munayniyümi capäcunqui. Malcayquićhu wiñaśhancunactapis micaycälinquim; aśhta chuliquicunapäpis tücäninta caćhaycapäcunquilämi canpis’ nil.

13Chaynu mana allin lulaynïcunapi, jatun jucha lulaśhäcunapïmari sumä sasachacuycunacta pasayalcá. Chaynu captinpis am Tayta Diosnillay, manamá juchäcunamannüchu mućhuchipämälanqui. Aśhwanpalämá waquinnïcunacta puchuycälichimälanquipis.

14Chaychun ¿¡camachicuyniquita anlaman muyulcachil chay millachicuy lulä malcacunäwan caśhan casaracuyalcämanlä canpis!? Jinayalcaptí, ¿¡manachun sumä piñacülul jucllactapis mana puchuycul lluy-lluyta camacaycälälimanquimanlä imamá!?

15Israelpa Tayta Diosnin, am canqui sumä allinmi. Chaymi caynu ashchayllactapis cawsayniyüta canan caćhaycälälimanqui. Rasunpa juchasapa capäculmi ñawpäniquiman aśhuycamunäpäpis nï bälipäcullächu” nil.