Isaias 65 - Old Testament Quechua Wanca（QVW）

Mućhuycachinanpäwan salbaycunanpämi nin

1Tayta Diosmi nin:

“Yaꞌapi mana tapucücunämanmi lisichiculá.

Mana ashimäcunämanmi aśhuyculá.

Yaꞌacta mana ayacamäcunätamari nilá:

‘Cayćhümi cayá; cayćhümi cayá’ nil.

2Pasaypi mana uyalicü cullu linli-cama,

uman chalaśhanćhu pulï malcaman,

anyaśh muyunmari maquïta chacchalayá.

3Cay malcaca cäräćhülämá piñachiyta ćhapayalcämanpis;

wirtacunäćhümari taytachancunaman

uycunancunacta uycuyalcan;

ladrillupi luläśha uycuna patacćhümari,

insinsiucunacta cañaycuyalcan.

4Tutapapis sipultüracunäćhülämá pulipäcun;

wañücuna caśhancäćhülämá wälapäcunpis.

Cuchicunap aychantapis micapäcunmá;

anlapä licaśha uywacunap calduncunallamá

mancancunaćhüpis cayan.

5Cay malca nipäcunlämi canpis:

‘Ama aśhuycamumaychu;

chay caśhallayquićhu quïdacuy.

Ampïpis mas chuyam yaꞌa cayá’ nil.

Caycunamari sinꞌäćhu untaynu aśhnapayäman;

anyaśh muyun walayäcänümi aśhnayan.

6“Lluy caycuna puntäćhümari isquirbïsha cayan.

Manamari upällachu caycuśhä.

Tincüninmanmi cutiycachishä;

quiquinpa aychanćhümá ñacaycäta apaycälinꞌa.

7Yaꞌa Tayta Diosmi ní: ‘Amcunap,

taytayquicunap mana allinniquicunapïtamá

mućhuycachisha capäcunqui,

ulꞌucunäćhu insinsiucta cañapäcuśhayquipïmari,

tacsha ulꞌuchacunäćhu jalutacamäśhayquipïmari.

Chaymi chay tincüniquimannu aychayquićhu ñacachipäcuśhayqui’ nil.

8“Awari, yaꞌaTayta Diosmi niyá:

‘Mayanpis übacunäpi yacusapa allinnin sarta übacta talilculmi:

“Cayta manamá imanaśhäpischu;

yacun cayäñälämi” nin.

Chaynümi sirbïnïcunawan yaꞌa lulaycuśhä.

Manamari lluytachu camacaycüśhä.

9Jacobpa milaynincunactamá milachishä;

Judapa milaynincunamá tücachishá

ulꞌücunäćhu yaćhapäcunꞌa.

Aclacuśhäcunämari tücachishá allpacta ćhasquipäcunꞌa;

chayćhümari sirbïnïcuna yaćhapäcunꞌa.

10Yaꞌacta ashimä malcäpämi,

Saron lädu pampa uwishnincunapä canꞌa;

Acor

13“Chayurá yaꞌa Tayta Diosmicaynu niyá:

‘Sirbïnïcuna micapäcunꞌamá;

amcunañatacmi ichá micuypi wañupäcunqui.

Sirbïnïcuna upyapäcunꞌamá;

amcunañatacmi ichá yacupi wañupäcunqui.

Sirbïnïcuna cushiculcanꞌamá;

amcunañatacmi ichá pinꞌayćhu capäcunqui.

14Sirbïnïcuna cushicuy śhunꞌuwanmi taquipäcunꞌa;

amcunañatacmi ichá llaquisha śhunꞌuyü-cama ayaculcanqui;

alaläśha śhunꞌuyü-camam awćhupäcunqui.

15Sirbïnïcunactam muśhü śhutiwan śhutichaycuśhä;

amcunap śhutiquim ichá mana allin

capäcunayquipä limaśha canꞌa;

Tayta Diosmari amcunacta wañülächishunqui.

16Mayanpis allin caycunanpä niycücá

chalapacuna rasun Tayta Diospa śhutinćhümá niycunꞌa.

Cay pachäćhu Diospa śhutinta ćhulaycul

limalicücá chalapacuna rasun Tayta Diospa śhutinćhümi limalicunꞌa.

Punta llaquicuycunaca unꞌaśhañamá cayan;

ñawïpïta chincäśhañamá cayan.

17“ ‘Tuquicta uyalipämay.

Muśhü sïluctawan muśhü allpactamá lulaycuśhä.

Punta pasaśhancunaca unꞌäśhañamá canꞌa;

manañamari yalpalcuśhapischu canꞌa.

18Chaynu lulaycunäcäpi amcuna sumämi

imaypis cushiculcanqui.

Licapäcuy, sumä cushicuna Jerusalentamá lulaycuśhä;

cushicuywan juntäśha malcactamari lulaycuśhä.

19Jerusalenpïtamá sumä cushicuśhä;

malcäpïmá anchap cushicuśhä.

Cay malcäćhu manañamá ayaycaćhayta,

waꞌacuyta mayanpis uyalinꞌañachu.

20“ ‘Chayćhu cä iñachacunaca manañamá wañupäcunꞌachu;

awquishcunäpis yaśhayänancamalämá cawsapäcunꞌa.

Paćhac (100) watanta liyäca manamá awquish nishachu canꞌa;

juchasapacunällamá chay watacama manaña ćhäpäcunꞌachu.

21Nunacunaca wasicunacta lulayculmá yaćhapäcunꞌa.

Übacunacta lantapäculmá wayuyninpi micapäcunꞌa.

22Juccuna yaćhapäcunanpächu

manañamá wasicunacta lulapäcunꞌa;

juccuna micapäcunanpächu manañamá

übacunactapis lantapäcunꞌa.

Malcäpa watancuna lantap watancunanüñamari caycunꞌa.

Aclacuśhäcunaca maquinwan lulacuśhancunapïñamá micapäcunꞌa.

23Yanꞌalpächu manañamá lulapäcunꞌa;

chulincunapis manañamá mana allincäćhüchu capäcunꞌa.

Paycunawan milaynincuna allin caycälinanpäñamá

Tayta Dios niycunꞌa.

24Paycuna manaläpis ayacalcämaptinmá

yaꞌa uyaliycuśhäña.

Manaläpis limayta camacapäcuptinmá yaꞌa uycuśhäña.

25Malta uwishcäwan cuscamá atüca micapäcunꞌa.

Liyunca wäcanümi pastucta micunꞌa.

Culibraycämi pulbucta micunꞌa.

Jinantin chuya ulꞌüćhu manañamá llaquicuycuna canꞌachu,

nï ima mana allinta luläpis canꞌañachu.

Yaꞌa Tayta Diosmari chaynu niyá’ ” nil.