Levitico 22 - Old Testament Quechua Wanca（QVW）

Tayta Diosman uycuśhancunapïta mayancuna micunanpämi nin

1-2Chaypïtam caynu ninanpä Moisesta Tayta Dios nin: “Chuya caynïta mana jalutacunanpä Israel caśhtacunaca japächaycapamäśhancunacta manchacuywan licaycälichun. Yaꞌamari Tayta Diosniqui cayá.

3“Chaynütac cananpis śhamü timpucunaćhüpis Israel caśhtacunaca Tayta Diospä japächaycuśhanta Aaronpa milaynincuna anla cayalcal aśhuycuptinꞌa ñawpänïpïta wicapäśham canꞌa. Yaꞌamari Tayta Diosniqui cayá.

4“Chaynütac Aaronpa milaynincuna liprawan cayalcal ütac umri cayninwan ishyayalcal uycuśha japächäśhacunäpïta chuyanchaculcänancama manamá micapäcunmanchu.

“Chaynütac ima wañüśhactapis ütac chulicuynin ćhalćhaywan ishyä nunacta,

5ütac ima culuctapis, ütac anla nunacta yataycüca

6tutalpunancamam anlapä licaśha canꞌa. Manalä lluy almaculꞌa japächäśhan uycuśhancunapïta manam micunmanchu.

7Inti ishpïmuptinlämi chuyanchaycuśhaña canꞌa. Chaylämi micunanpä cä japächaśhacunäta micunman, uycuśhan micuynin caśhan-laycu.

8Ñatac anlaman mana muyunanpä wañüśha uywap aychanta ütac munti uywap ticshïsha aychanta manam micunanchu. Yaꞌamari Tayta Diosniqui cayá.

9“Chayurá cay yaćhachishäcunacta sasirdüticunaca lulaycälinanmi. Chaynüpaćh uycamäśhancunacta millachicuy anlaman mana muyuchipäcunꞌachu, nï juchaculcanꞌachu, nïtac wañupäcunꞌapischu. Yaꞌamari Tayta Diosniqui chuyaman muyuycachïca cayá.

10“Chay japächäśha uycuśhancunäta manam micunmanchu sasirdütip mana ayllun cayalꞌa ütac jamapacünin, lulapacünin cayalꞌa.

11“Ñatac sasirdüticunap lantishan uywayninwan, wasinćhu näsi uywaycunämi ichá micapäcunman uycuśhan micuypïta.

12“Chaynütacmi sasirdütipa wamla chulin mana sasirdütiwan casaraculꞌa uycuśhan micuypi mana micapäcunmanchu.

13Ñatac sasirdütip wamla chulin mana wawiyu japanyälul ütac jitanacülul papäninpa wasinta cuticamul japallan caśhannümi uycuśhan micuyta micunman. Ñatac juccuná manamari micapäcunmanchu.

14“Mayanpis mana tantial uycuśhan micuyta micülulꞌa sasirdütimanmi lluyta cutiycachinꞌa, jinaman picha partipi jucnin partin mastalämi cutiycachinꞌapis.

15Chaynu Israel caśhtacunaca Tayta Diosman uycälinanpä cäcunäta millachicuy anlaman mana muyuchipäcunanpämari sasirdüticunaca licaycälinan.

16Chaynu micapäculꞌa quiquincunam juchacta tawacuyalcan. Chaycunacta yaꞌa Tayta Diosmari chuyanchaycüca cayá” nil.

Imanuy uywacunacta Tayta Diosman uycunanpämi nin

17-18Chaypïtam Aaronta, milaynincunacta lluy Israel caśhtacunäta caynu ninanpä Moisesta Tayta Dios nin: “Mayan Israel caśhta ütac chayćhu yaćha juc caśhtapis limalicuśhanpi ütac śhunꞌunpi yalamuśhanpi Tayta Diosman cañaywan uycuśhanca,

19ćhasquisha cananpä allinnin ulu uywactam uycunꞌa: wäcacta, uwishta ütac capishtapis.

20Amatac mana allin uywacunactá uycapäcuychu; chaycuna manamari ćhasquishachu canꞌa.

21“Mayanpis śhunꞌunpi yalamuśhanpi ütac limalicuśhanpi Tayta Diosman allin cawsaśhanpi uycuśhanca ćhasquisha cananpä allinnin wäcacta ütac uwishtam uycunꞌa.

22Manatacmi Tayta Diosman uycunmanchu: aplacta, wishtucta, cutucta, iliyüta, sarnayüta ütac ñawin ñibïshactapis. Chaynu uywacunacta uycuna patacćhu cañaywan amari uycapäcuychu.

23Ñatac śhunꞌuyquipi yalamuśhan uycunacta uycunquimanmi mana allinnin ütac umpunnin wäcacta ütac uwishtapis. Chaynu uywacunacta limalicuśhayquipi uycuyćhuꞌa manamá uycunquimanchu.

24Amatacmi Tayta Diosman uycunquichu wäcapis ütac uwishpis luntunćhu imapis dañäduyüta, llapïshacta, cuchüśhacta, chutäśhactapis. Chay yaćhapäcunayquićhu amamari caytanuꞌa uycapäcunquichu.

25Chaynu uywacunactá mana Israel caśhtacunapïpis manamá ćhasquipäcunquimanchu Tayta Diosniquita uycälinayquipä. Mana allin uywa caśhanpamá uycuśha mana canmanchu” nil.

26Chaypïtam Moisesta Tayta Dios nin:

27“Juc malta wäca, uña uwish, uña capish näsïlul anćhish muyunmi mamanwan quïdacunꞌa. Pusä muyunpi puntamanmi ichá Tayta Diosman cañaywan uycunapä ćhasquisha canman.

28“Ñatac juc muyunllaćhuꞌa manam juc uwishta wawintintá ütac wäcactapis wawintintá ćhipipäcunquimanchu.

29“Allin cawsaśhanpi Tayta Diosman uycuśhayquićhuꞌa paypa munayninmannu uycuy ćhasquiycuśhunayquipä.

30Chay aychacta chay muyunllatac micapäcuy; chay walantinpá ama caćhaycuychu. Yaꞌamari Tayta Diosniqui cayá.

31“Cay camachicuynïmannu lulaycälil cawsaycäliy. Yaꞌamari Tayta Diosniqui cayá.

32“Sumä chuya caynïta ama jalutacalcämaychu. Aśhwanpa israelcunäpa ćhawpinćhu chuya caśhäta camalachipäcuy. Yaꞌamari japächaycü Tayta Diosniqui cayá.

33Egiptocunäpa maquinpi julamulac Tayta Diosniqui canäpämi. Yaꞌamari Tayta Diosniqui cayá” nil.