1 Tayta Diosmi nin:
“¿Walminta wayapan alapacüśhannüchun
mamayqui Israelta yaꞌa alapacülá imatá?
¿Icha mänutacüśha cayalchun
uyway nunapä lanticülá imatá?
Manamari. Juchacta lulapäcuśhayquipïtamá
lanticüśha capäculanqui;
pasaypi cullu linli capäcuśhayquipïmari
mamayqui Israel alapacüśha cala.
2Śhamul ¿imapïmi mayantapis mana talilächu?
¿Imapïmi ayaptí mayanpis mana uyaliycamälachu?
¿Libraycunäpä mana callpayüñachun cayä imatá?
¿Libraycuyta manañachun atipä imamá?
Lamarcäta limalcuylläwanmá chaquichí;
mayucunätapis chunyä chaquimanmi muyuchí.
Chayćhu cä challwacunäpis
yacu mana captinmá wañulcälil ismupäcun.
3Sïlütapis yaꞌami yanawan ćhulaycú;
lutu müdanawanmi müdaycachí” nil.
4 Tayta Diosmari allin yaćhayta uycamäla,
pishipäśhacunäta
allin limaywan callpanchaycunäpä.
Walan-walanmi linlilläta quićhaycun
yaćhachicuyninta sumäta uyaliycunäpä.
5 Tayta Diosmari uyalicunäpä linlïta quićhaycaman.
Yaꞌañatacmi uyaliculá;
manamá cullu linlichu calá nï ayïculäpischu.
6Asutimänïcunaman waśhätamá camayculá;
śhapläta chutamänïcunaman cärätamá uyculá.
Jamuyayninwan tuwapamäśhancunäpi
cäräta manamá pacacuyculächu.
7 Tayta Diosmá yanapaycamäní;
manamá pinꞌayćhu caśhächu.
Chaymi cäräta lumictanu ćhulaycú;
tuquictamari yaćhá pinꞌayćhu mana canäta.
8Allinpä licaycamäní yaꞌapa sircalläćhümá cayan.
Má, ¿mayanmá yaꞌawan chalanacuyta munan?
¿Mayćhütá tumpamänïcuna cayan?
Ñawpänïmanꞌari śhapämuchun.
9 Tayta Diosmi yaꞌapa yanapaycamaní.
¿Mayanmá juchachaycamanman?
Ćhïnimänïcuna müdananümá mawcapäcunꞌa;
puyup camäcaśhanümá camacapäcunꞌa.
10¿Mayanmá Tayta Diosta
manchacuywan amcunaćhu licaycälin?
¿Mayanmá willacünincunap
willacuśhanta uyaliculcan?
Tutapäćhu pulilpis Tayta Diosman chalapaculcay;
acchi mana captinpis Tayta Diosllayquita alcaycäliy.
11Ñatac am quiquiquip acchiquićhu cawsäcuna,
chay quiquiquip ninayquićhu unupacücuna,
tuquicta licaculcay.
Tayta Diosmari tincüniquiman uycüśhunqui;
sumä ñacaycunawan chimïchishamari capäcunqui.
Who We AreWhat We EelieveWhat We Do
2025 by iamachristian.org,Inc All rights reserved.
