1 Tayta Diosllay, ima pasapämäśhancunactapis yalpalcullayꞌari.
Maynu-maynu jalutacapämäśhantapis licaycullayꞌari.
2Lluy tücänïcunapis jucpa maquinmanñamá ćhälun;
wasïcunapis mana lisishacunap munayninćhüñamá cayan.
3Mana taytayüñamá cayalcá;
mamäcunapis japanyäśhañamá quïdälälin.
4Upyapäcunäpä yacucunäpïpis illayta pägapäcünäñamá;
quiquïcunap yamtäcunäpïtapis pägapäcunämá.
5Aticaćhamänïcuna janä-janäninchicćhüñamá cacuyalcan.
Pasaypi illacäśha cayalcalpis manamá jamaycuyta talipäcüchu.
6Micuyta uycälimänanpämi Egipto nasyunman maquïta chacchalapäcullá;
micuyta taliycälinäpämi Asiria läducunäta mañaculcällá.
7Awquillücuna juchacta lulälälilmi wañuculcäla;
paycunap mućhuchicuynintamá yaꞌacuna apayalcá.
8Cananꞌa uyway nunacunäpa maquinćhüñam cayalcá;
paycunap maquinpïta libraycüní manamá mayanpis canchu.
9Cawsaynïcunactapis wañuypa patanman ćhulayculmi,
micunäcunacta taliycälí;
chunyäninćhu pilyäcunäpi ayimulmi wañuy cawsay apaycälimú.
10Micuycäpïmá aychanchicpis nina walayänu lupaypa-lupayan;
micanaycäpïmá chaynüña caćhuypa-caćhuyan.
11Sionćhu walminchiccunactamá firsälälin;
Juda lädup malcancunaćhu wamlanchiccunactamá firsälälin.
12Puydïninchiccunacta maquipïmá walcälälin;
yaśhanchiccunactapis manañamá rispitapäcunchu.
13Müsucunätam aꞌananpä cä lumicta tanꞌapäcunanpä ćhulälälin;
walaśhcunätapis lawticacunancamam yamtacta ipichipäcun.
14Malcap puncunćhu yaśha täcücunaca manañamá täcapäcunñachu;
müsucunäpa taquincunacta manañamá uyalinchicñachu.
15Śhunꞌunchicćhu cushicuyca chincacunñamá;
cushicuy paćhcaycaćhayninchiccunapis llaquicuymanñamá muyülun.
16Curuna palpuśhannümá munayniyu caśhäpis palpülun;
jucha lulaśhanchicpi ¡ash, imanuylä caśhun!
17Chaymi śhunꞌücunapis nanaypa-nanaycun;
chaymi ñawïcunapis pasaypi tutapälun.
18Sion ulꞌuca pasaypi pulumäśhañamari cayan;
chayćhu atücunällañamari muyuyalcan.
19Am Tayta Diosñatacmi ichá wiña-wiñaypä mandacü canqui.
Imaycamapis wiña-wiñaypämá mandacuyniqui caycunꞌa.
20¿Imapïmá yaꞌacunacta unꞌälälimanqui?
¿Imapïmá caychica timpu jitälälimanqui?
21 Tayta Diosllay, anman cutipämunäpä cutiycälichillämayꞌari.
Tayta Diosllay, punta cawsapäcuśhänu
cushisha cawsaycälinäpä muyuycälichillämayꞌari.
22Icha ¿pasaypiñachun jitälälimanqui imamá?
¿Jinallalächun yaꞌacunawan sumä piñäśha cayanqui imatá?
Who We AreWhat We EelieveWhat We Do
2025 by iamachristian.org,Inc All rights reserved.
