1Ishcay ćhunca pichayu (25) watanta liyalmi Jotam mandacuyta allaycula. Jerusalenpïta ćhunca sütayu (16) watam mandacula. Mamanñatacmi Sadocpa chulin Jerusa cala.
2Jotamꞌa papänin Uzias allin lulaśhantanu Tayta Diospa ñawquin allincällacta lulaycuyalpis manatacmi alawana wasinmanꞌa cañaycü yayculachu. Malcäñatacmi ichá jinalla mana allinta lulayalcäla.
3Paytacmi Tayta Diospa alawana wasi murällanpa altuscanćhu cä puncun cäcäta lulachila. Jinaman Ofel murällaćhüpis mascunactamari lulachila.
4Jinaman Judapa ulꞌuncunaćhüpis malcacunactam lulachila. Chaynütac munticunäćhüpis sumä siguru-cama malcacunactam, täpananpä türrintinta-cama lulachila.
5Chaynütacmi Amon läducunap mandäninwan pilyaśhanćhüpis Jotam llallïla. Jinaptinmi quimsa wata intïru paycuna alcabälacta pägapäcula: quimsa walanga quimsa paćhac (3,300) quïlu illayta, ćhunca walanga (10,000) säcu trïgucta, ćhunca walanga (10,000) säcu siwätapis.
6Mandacü Jotam Tayta Diosninta cäsuculmari sumä munayniyüman licalïla.
7Ñatac Jotampa mandacuyninćhu lluy lulaśhancuna, pilyaśhancuna, imanuy cawsaśhancunapis Juda lädu, Israel lädu mandacücunap lulaynincuna isquirbishan librunćhümari cayan.
8Chayurá pay mandacuyta allaycula ishcay ćhunca pichayu (25) watanta liyalmi. Jerusalenpïtam ćhunca sütayu (16) wata mandacula.
9Jotam wañucuptinñatacmi awquilluncuna pampaläśhan Davidpa Malcan nishanman pampälälila. Chayurá paypa pudirnin chulin Acazñam mandacüca cala.
Who We AreWhat We EelieveWhat We Do
2025 by iamachristian.org,Inc All rights reserved.
