Jeremias 4 - Old Testament Quechua Wanca（QVW）

1Niptinmi Tayta Dios nin: “Israel, cutimuyta munalꞌa yaꞌamanmi cuticamunayqui. Chay millachicuy taytachayquicunacta ñawpänïpi wicapalcul yaꞌallaćhu masïsu tacyaycuy.

2Limaliculꞌa rasuncällawan, cällanman, tincüllanman yaꞌa Tayta Diospa śhutïćhu limalicuy. Chayćha lluy nasyuncunaca allinpä licaycuśha capäcunꞌa; jinaptinćha lluy nunacunaca altuman julaycälimanꞌa” nil.

3Judaćhu, Jerusalenćhu cä nunacunätam Tayta Dios nin:

“Pulunyäśha ćhaclanu cä śhunꞌuyquicunaćhu talpupäcuy;

allin mujucta caśhacunäćhuꞌa ama usuchipäcuychu.

4Juda, Jerusalen cäcuna, śhunꞌuyquita

Tayta Diospä siñalachiculcay.

Yanꞌalätac chay mana allinniquicunapi

piñacuyní ninanu walälü imanman.

Jinaptin mayanpis wañuchiyta nï atipanmanñachu.

Juda läduman juc nasyun yaycunanpämi willacun

5“Juda lädućhu cäcunäman willacalcämuy;

Jerusalenćhu cäcunäta nipämuy:

Jinantin nasyunćhu curnitillacta tucapämul ayaycaćhapäcuy:

‘Jucllaña, murälläśha

malcacunäman ayicuśhun’ nil.

6Nurti lädupïmari sumä camacaycuyta, ñacayta caćhayämú.

Jerusalen lädućhu bandirayquita śhaycachipäcuy;

chayman mana śhaycuycullal pacaculcänayquipäri juclla lipäcuy.

7“Awari, munti-munti caśhancunäpïtamá juc liyunnu yalayämun;

nasyuncunacta camacaycümi śhacayämun.

Chay caśhancäpïmi allpayquita mana caśhanman muyüchinanpä yalämun.

Malcayquicuna pasaypi pampaman muyüchisha,

pulumäśhamá cacunꞌa.

8Chayurá shicacü müdanacunawan

müdaculcay, waꞌapäcuy, awćhupäcuy.

Nina sumä walayäcänümá yaꞌaTayta Diospa

sumä piñacuyní amcunapä jinallalä cayan” nil.

9ChaynütacmiTayta Dios nin:

“Chay muyun ćhämuptin mandacücäpa,

puydïcäpa śhunꞌunpis manchacuypïmá tic-ticyanꞌa.

Sasirdüticunäpis chucchupäcunꞌam;

Tayta Diospa willacünincunapis

sumä-sumä manchäśham capäcunꞌa” nil.

10Niptinmi yaꞌa Jeremias nilá: “Tayta Diosllay, cay malcayquita, Jerusalenta anchapñam ingañälunqui. Am limaliculanqui jawca allinlla cawsananpämi; cananñatacmi cuncanćhu ispädaca cacuyan” nil.

11Niptïmi Tayta Dios niman: “Chay muyun ćhämuptinmi Jerusalen malcacta nishä: ‘Chunyä aꞌu ulꞌucunäpïtam malcá caśhanman, sumä unuyä waywa pücamunꞌa. Chay waywa manamá trïgucta waywachinapä waywanüllachu canꞌa.

12Chay waywapïtapis mas-maslämari waywachimuśhäca cacunꞌa. Yaꞌa quiquïmi Jerusalenta cäraycuśhä’ ” nil.

13Jerusalen nunacunäñatacmi nipäcunꞌa:

“Licapäcuy, ćhïnicüninchiccuna pucutaycänümá śhacayalcämun.

Gïrrapä cä carritancuna sumä-sumä waywänümá śhacayalcämun.

Cawalluncuna ancapïtapis mas-maslämá cürricayalcämun.

Imanuylä calläśhun; camacaycämäśhunćha” nil.

14Jerusalen malca,

salbaycuśha canayquipä mana allincunäta

śhunꞌuyquipi juluycuy.

¿Imaycamamá mana allin tantiaycuna

umayquićhu muyuyanꞌa?

15Dan ayllu caśhanpïta, Efrain ayllup ulꞌunninpïtamá

mana allin willacuycuna ćhämun.

16“Nasyuncunätari willapämuy,

Jerusalenpa cuntran nipämuy:

‘Ćhïnicücunam calu-calu malcacunapïta muyülïniquiman

lluy ćhulacälälinanpä śhacayalcämun.

Juda lädup cuntran apalcaćhashtinmá śhacayalcämun.

17Juda lädu yaꞌapa cuntrá śhalcuśhanpïmi

ćhaclacta täpäcänu paypa muyülïninman ćhulanacälälinꞌa’.

Yaꞌa Tayta Diosmari niyá.

18“Chay quiquiquip lulaśhayquipïta,

jinaman quiquiqui imanuy cawsaśhayquipïmá chaynu pasäśhunqui.

Mana allin lulaśhayquip wayuyninmá

chaynu ćhacćhä cayan;

śhunꞌuyquitapis nana-nanaypam ćhaycun” nil.

Malcanpïmi Jeremias waꞌan

19¡Śhunꞌullay, śhunꞌullay!

Llaquicuypïtam śhunꞌullá tic-ticyäcuyan.

Śhunꞌullá paćhcäluytañamá munacuyällan.

Curnitillap tucaynintamá uyalïlú,

pilyapä ayaycaćhaynintamá uyalïlú.

Manañamá jamalcuytapis atipalläñachu.

20Mana allincällañamá atinacucuyan;

jinantin allpämá camacaycüśha cacuyan.

Unꞌaypïmá carpäcunapis pampaman muyülun;

jucllamá atacuncunapis camacaycüśha licalïlun.

21¿Imaycamamá gïrrapä cä bandiracta licaśhä?

¿Imaycamatá gïrrapä curnitilla tucaśhanta uyalishä?

22Tayta Diosmi nin:

“Cay malcá pasaypi luclum; manam lisimanchu.

Tullu uma chulïcuna mana tantiayniyü-camam.

Mana allincunäta lulananpämi ichá yaćhayniyü-cama;

allincäpá pasaypi mana fisyuyümá” nil.

Śhamü timpucunaćhu mućhuchicuycunapïmi willacun

23Cay allpäta licalcuptí mana imapis

cänu jäcuyämi cayäña;

sïlüta licalcuptí manam acchi cañächu.

24Ulꞌucunäta licalcuptí chucchuyalcäñämá;

lluy-lluy ulꞌuchacunäpis catcatayalcäñämá.

25Licalcuptí manamá jucllay nunallapis cañächu;

lluy pälïcunäpis chincacuñämá.

26Licalcuptí tuqui-tuqui üba lantacunaca

pasaypi pulumäśhamá cayäña;

lluy malcacunäpis pampaman muyüchiśhañamá cayäña.

Chaynu pasayäña Tayta Diospa sumä-sumä piñacuyninwanmá.

27 Tayta Diosmi nin:

“Jinantin allpämi camacaycüśha canꞌa;

ñatac manamá pasaypipächu camacaycüśhä.

28Jinaptinmi cay allpaca llaquicuyćhu canꞌa;

sïlüpis yana-yanaycuśhamá tutapanꞌa.

Caynu cananpä nishäta manamá ipaman cutichishäñachu;

limaśhäta manañamá jucman muyuchishäñachu.

29“Sillädacunap,

flïcha ćhächïcunap apaliyninta

uyalïlulmi jinantin malcaca ayiculcan.

Mana-manañamá sumä munticunäman liculcan;

wancacunämanpis ishpicuyalcanmá.

Jinantin malcam pulumäśha quïdälun;

manamá jucllay nunallapis canñachu.

30“Canan má, camacaycüśha malca, ¿imananquiñamá?

¿Imapäñamá murädu müdanactapis ćhulacunqui?

¿Imapäñamá ürupi aläjacunactapis ćhulacunqui?

¿Imapäñamá ñawiquicunactapis allichacunqui?

Yanꞌal-yanꞌalñamá allichacunqui;

waynayquicuna millachicüśhunquiñamá;

wañucunallayquitañamá ashiyalcanpis.

31“Waćhacü walmip nanaynin chaläluptin

apalcaćhaynintanümá uyalí;

wamä wawinta ishyacul apalcaćhaynintanümá uyalí.

Awari, tuquish Jerusalenpa wañuyä-yupayña apalcaćhayninmá;

ñacayalmari maquinta chacchaycaćhaśhtin ayaycaćhayan:

‘Caycamallañaćh cawsayní cala;

wañuchicücunaca wañüchimanꞌañaćhá’ ” nil.